Allen^a), die disen brief sechent oder horent lesen, kunden^b) wir der burgermeister der nachgeschriben rat vnd die zunftmeister der statt L Zurich, das fro Vrsull Kamrerin Rudolfs Gloggners vnsers burgers elichu wirtin mit desselben ir elichen wirtes vnd rechten vogtes hand vnd L fro Margreth Kamrerin ir swester Vlrich Stukis vnsers burgers elichu wirtin mit desselben ir elichen wirtes vnd rechten vogtes hand si beid mit L gesamnoter hand ir eigen wisen vnd zwen garten, die daran stossent, die selben garten och ir eigen vnd Vlis im Garten vnd Chunis im Garten sines ohems recht erblehen sint jerlich vmb einen mut kernen^c) Wiler¹ messes vnd vmb zwey hunr, die si da von ze zins geben sullent, vnd dieselb wis ze Wil in Thurgo vor der stat gelegen sint zwischen dem mulbach vnd dem gassli, dz man von der statt in die samnung² gat, vnd stossent einhalb an die lantstrass vnd anderhalb an den weg, der von der statt gat zu dem steinin steg, mit steg mit weg vnd mit allen rechten nutzen vnd gewonheiten, so dar zu jendert gehort, vsgenomen vier mut kernen Wiler messes vnd zwen schilling pfenning^d) Costentzer muntz, die ir vatter selig Markus Kamrer vnd sin vordren durch got vnd durch der selen willen dar ab gesetzt hant, vnd dem zehenden, so dar vs gat, fur recht eigen ze koffen geben hant den geistlichen frowen der prijorin vnd dem couent gemeinlich in der samnug vor der vorgenanten statt ze Wil gelegen vnd allen iren nachkomen vmb achtzig pfund alles guter vnd genemer alter haller, dero si nach ir vnd ir obgenanten vogten vergicht gar vnd gentzlich von denselben frowen gewert sint. Vnd dar vmb so hant die vorgenanten fro Vrsull vnd fro Margreth mit den obgenanten ir elichen wirten vnd rechten vogtes hand vnd si beid mit gesamnoter hand fur sich vnd fur ir erben mit guten truwen gelopt, der vorgeseiten wisen vnd der garten dar an mit allen rechten vnd zugehorden vnd dis koffes in aller vor vnd nachgeschribner wise wer ze sin nach recht der egenanten frowen der prijorin vnd des couentes in der obgenanten samnug vnd ir nachkomen fur recht eigen, vsgenomen dz der zehend vnd dz obgeschriben kernen vnd pfenning gelt jerlich dar ab gat vnd dz die garten der obgenanten Vlis vnd Cunis im Garten erblehen sint vmb den vorgeseiten zins, gen allermenlichem vor geistlichen vnd vor weltlichen gerichten vnd mit namen an allen stetten, wo vnd wenn si des notdurftig sint, an all geuerd. Sich hant och die obgenanten fro Vrsull vnd fro Margreth mit den egenanten ir elichen wirten vnd rechten vogtes hand si beid mit gesamnoter hand gar vnd gentzlich entzigen alles rechten vordrung vnd ansprach, so si ald ir erben zu der egenanten wisen vnd den garten dar an mit allem recht, so dar zu gehort, in dehein wise jemer gewinnen mochtin gen den obgenanten frowen der prijorin vnd dem couent gemeinlich in der vorgenanten samnung vnd gen iren nachkomen mit geistlichen oder mit weltlichen gerichten oder mit deheinen andern sachen an all geuerd. Her vber ze einem offennen vrkund, won wir dis horten vnd sahen, so haben wir vnser statt insigel offenlich gehenket an disen brief. Der geben ist an sant Hylarijen tag, do man zalt von gottes geburt druzehnhundert vnd nuntzig jar. Vnser des rates namen sint her Johans von Seon³ ritter, Fridrich Stagel, Rudolf Schonn, Rudger Gru­ninger, Johans Seiler, Rudolf ab Dorf, Johans Thyo, Rudolf Wulflinger, Heinr. Vsserman, Heinr. Landolt, Johans Hentscher, Chunr. Zoller vnd Johans Meijer von Knonow⁴. Der zunftmeister namen sint Johans von Egre⁵, Rudolf Stussi, Rudolf Wetzel, Johans Tallikon, Jacob Glenter, Rudolf Schudi, Johans Vngricht, Rudolf Trechsel, Jacob Roist, Heinr. Stubenrôch, Vlr. Sprungli, Johans von Egg vnd Rudolf Ory.