Wir diz nachgeschribnen Eglolf^a) von Allstetten der elter vnd ich Eglolf¹ sin elicher sun tunt kunt L vnd vergehent dez offenlich mit vrkunt diz briefz fur vns vnd alle vnser erben allen, die^b) in ansehent L oder horent lesen, dz diz nahgenempten erber lut Johans Rutschler, den man nempt Knor, vnd Elsbeht Klokin L sin elichu husfrow, die vnser reht aigen warent, sich selber mit lib mit gut vnd mit aller rehten vnd ansprachen, die wir zu in zu ir lib vnd zu ir gut hattent ald haben mohtent, von vns redlich vnd reht gekoft hand an dz erwirdig gozhus ze sant Gallen, danan sy och vnser lehen warent, vmb an ains trisig pfunt pfening Costentzer muns, der wir gantzlich vnd gar von im gewert sint vnd enphangen habint vnd an vnser offen nutz bewent, den selben vorgenanten Hansen Rutschler, den man nempt Knor, vnd Elsbeht Klokingen sin elichen husfrowen habent wir mit lip vnd mit gut vnd mit allen rehten reht vnd redlich vf geben vnd gevertgot zu dez erwirdigen vnsers gnadigen herren abt Cun von gottez gnaden abt dez vorgenanten gotzhus ze sant Gallen² vnd zu dez selben gotzhus handen also vnd in dem rehten, dz die selben obgeschriben Hans Rutschler, den man nempt Knor, vnd Elsbeht Klokin sin elichi wirtin mit lib vnd mit gut vnd mit allen rehten hinnenhin iemer mer an dz obgenant gotzhus ze sant Gallen gehorren vnd dez reht aigen sin sont, vnd dar vmb so haben wir vns wilklich enzigen vnd enzihent vns mit disem brief gantzlich vnd gar fur vns vnd alle vnser erben vnd nahkomen der obgenant Hans Rutschler, den man nemmet Knor, vnd Elsbeht Klokinen siner elichinen wirtinen mit lib vnd mit gut vnd mit allen rehten aller aigenschaft aller manschaft aller lehenschaft aller kuntschaft aller gewer lut vnd brief allez gaistlichz vnd weltlichs rehten aller vordrung vnd ansprach aller reht vnd rehtung, so wir vnd vnser erben vnd all vnser nahkomen an den zu den vnd von den dik vorgenanten Hansen Rutschler, den man nempt Knor, vnd Elsbeht Klokingen sinr elicher husfrowen lib oder gutez wegen ie gehept haint ald hie nach iemer gehaben oder gewinen mohent, vnd dz wir noch enkain vnser erben noch nachkomen noch niemen ander an vnser statt noch von vnsren wegen dem vorgenanten vnserm gnadigen herren abt Cun noch enkain sim nachkomen noch daz vorgenant gotzhus ze sant Gallen von der vorgenanten Hansen Rutschlerz, den man nempt Knor, vnd Elsbeht Klokingin sinr elichen husfrowen lib noch gutez wegen iemer mer sullint noch wellent ansprechen vf triben bekumbren bekrenken noch in kain wis beschwaren weder mit gaistlichem noch mit weltlichem geriht noch an reht noch mit enkainr lay ander sache an all gevart. Wir habint och gelobt beid mit vnsren truwen vnd lobent mit disem brief fur vns vnd alle vnser erben vnd nahkomen, den vorgenanten Hansen Rutschlers, den man nempt Knor, vnd Elsbeht Klokinnen sinr elicher husfrowen mit lib vnd mit gut vnd mit allen rehten vnd dez kofs reht wer ze sint nach dez landez reht vnd och dez vorgenanten vnsers herren abt Cun vnd sinr nahkomen vnd dez vorgenanten gotzhus ze sant Gallen vnd och der vorgenanten Hansen Rutschlerz, den man nempt Knor, vnd Elsbeht Kloking(in) sinr elichen husfrowen ze versprechen vnd ze verstane an allen stetten gen aller manglich an allen iren schaden, wenn vnd wa vnd wie dik su dar vmb angesprochen geschadigot oder vff getriben werdent. Vnd ist diz allez beschechen vnd volfurt reht vnd redlich mit allen den worten^c) werken vnd getatten, so nach gewonhait vnd nach reht dar zu gehorent ald gehoren soltent vnd notdurftig warent vnd allez ez kraft vnd maht sol vnd mag han nun vnd och hie nach. Vnd dez ze ainem warem vrkunt vnd gantzer sicherhait aller der vorgeschribnen dinge vnd vergich so habint wir die obgeschribnen Eglolf von Allstetten der elter vnd ich Eglolf von Allstetten sin elicher sun fur vns vnd alle vnser erben vnd nahkomen vnsri aigni insigel gehenkt an disen brief. Der geben ist ze Allstetten in der statt an dem nahsten fritag vor sant Vicencien tag in dem jar, do von Cristi geburt warent druzehenhundert jar vnd nuntzig jar.