Allen^a) den, die disen brief ansehent oder horent lesen, kund ich Herman Kupfersmid der elter burger ze L Wil¹ vnd vergich offenlich mit disem brief, daz ich wissentklich vnd wolbedahtklich fur mich vnd L fur alle min erben redlich vnd recht verkoft han allen minen tail vnd allu minu rechtung vorLdrung vnd ansprachen des gu­tes Zyggenzi² zwischan Munchwille³ vnd Trungen⁴ gelegen mit allen rechten nutzen zinsen gewonhaiten vnd mit aller zugehord, alz ich dasselb gut vntz har vff disen hutigen tag har bracht inne gehebt vnd genossen han, vnd han ains vngeuarlichen ewigen kofs ze koffent geben den erwirdigen gaistlichen herren Johansen von gottes verhengnust abt vnd dem couent gemainlich des gotzhus ze Vischinan⁵ sant Benedicten ordens in Costentzer bystum gelegen vnd allen iren nachkomen zu desselben gotzhus handen vmb ains vnd zwaintzig pfund pfen(ning) guter vnd genamer Costentzer muns, dero ich och aller gantzlich vnd gar von inan nach minem nutz vnd willen bezalt bin, vnd han inan allen minen tail vnd minu recht an dem obgenanten gut Ziggenzi ledklich vnd ffrilich fur mich vnd fur alle min erben vff geben vnd fur recht aigen zu ires gotzhus handen bracht vnd geuertgot, alz recht sitt vnd gewonlich was vnd alz es billich kraft hat nu vnd hernach. Vnd han mich hier vber an demselben gut mit allen rechten vnd zugehorden ledklich vnd ffrilich verzigen vnd verzich vnd entwer mich och redlich vnd recht mit disem brief fur mich vnd fur alle min erben aller aigenschaft aller lenhenschaft^b) aller manschaft alles tails aller gemaind aller gewer aller kuntschaft aller zugnust lut vnd briefen alles rechten aller rechtung vordrung vnd ansprachen vnd aller andren sachen vnd geuarden, dar mit ich ald min erben ald ieman andra von vnsern wegen daz obgenant gut mit aller zugehord gantzlich ald an dehainem tail iemer mer kundent ald mohten angesprechen ald dar mit wir wider disen kof ald wider dehainu ding, so an disem brief geschriben stant, in dehain wis kundent ald mohtent getun ald gereden, an geuard. Ich sol vnd geloben och vesteklich mit disem brief fur mich vnd fur alle min erben, alles mines tailes vnd aller miner rechtung an dem obgenanten gut fur aigen vnd dises koffes der obgenanten abt Johansen vnd gemaines couentz des gotzhus ze Vischinan vnd iro nachkomen vnd desselben gotzhus gen allermenglichem allenthalben, da si des noturftig sint ald dar vmb mit dem rechten vffgetriben ald angesprochen werdent, recht wern ze sint nach dem rechten vnd nach des landes sitten vnd gewonhait luterlich an geuard. Vnd des alles ze ainer stater ewigen warhait vnd sicherhait so han ich obgenanter Herman Kupfersmid min insigel fur mich vnd fur alle min erben offenlich gehenkt an disen brief. Der geben ist ze Wil in der statt an dem nahsten zinstag vor sant Johans tag des Toffers ze sunnwendi, do man zalt von Cristus geburt druzehenhundert jar, darnach in dem nuntzigosten jar.