Ich^a) Bernhart Blarrer von sant Gallen gesessen ze Wartense¹ tun kunt vnd vergich offenlich an disem brief allen, die in L sehent lesent oder horent lesen, daz mich die fromen wisen der burgermaister vnd der rat gemainlich ze sant Gallen L von miner ernstlichen bet ze burger angenomen vnd enphangen hant von nv sant Martis tag dem nahsten, der nv L kumpt nach dem tag, alz dirre brief geben ist, die nahsten funf gantzi jâr, die ân vnderlass aller schierost nach ain ander koment, vnd och von disem huttigen tag hin vntz ze dem selben nahsten sant Martis tag, mit solichem gedinge vnd in dem rehten, alz hie nach an disem brief geschriben stat vnd mit worten beschaiden ist. Dez ersten ist berett, daz ich nv die nahsten herbst stur, die nv aller schierost an gelait wirt nach dem tag, alz dirre brief geben ist, inen geben vnd alz min ligent vnd varent gut versturen sol in aller der wise vnd mass, alz ich inen min gut vormals versturot han nach dez brieues sag, den su och von mir hant, vnd also daz ich in dannenhin allerjarlich ie ze sant Martis tag zehen phunt guter vnd genamer haller ze rehter stur iekliches jares besunder geben vnd rihten sol vnd niht me die vorgedahten funf jâr vs vnd nach den selben funf jaren, alle die wil ich inen burgerreht niht vf geben han, vnd sol vnd mag och ich in der selben iro stat ald da vor vff miner vesti Wartensê mit hus sitzen, wedrenthalb ich wil ald mir fugklich ist, doch sol ich in vnd der stat ze sant Gallen mit der selben miner vesti Wartensê getrulich gewartig sin die vorgedahten jar zil vs vnd dannenhin alle die wile ich iro burger bin. Och ist berett, daz ich enkaines herren diener niht werden sol noch mich in kain wis hinder dehainen herren noch stat niht verbinden noch verphlihten sol, es beschech denn mit aines burgermaisters vnd dez rates ze sant Gallen gutem willen gunst vnd vrlob. Ich sol och ainem burgermaister vnd dem rat ze sant Gallen gehorsam sin vnd allu jar ainost gehorsami tun vnd in sweren alz ain ander ir ingesessner burger ân geuarde. Wenne och halbi stat ze sant Gallen der tail, der an dem Gnapser an vaht, oder der vierdentail der stat, der och an dem Gnapser an vaht, vs ziehen vnd raisen muss, daz ich och danne mit dem selben halbtail oder mit dem vierdentail ân alle widerred raisen vnd ziehen sol alz ain ander ir ingesessner burger ân geuarde. Vnd wenne ich nach den selben funf jaren inen daz selb burgerreht vf gib, so sol in vnd gemainer stat ze sant Gallen gen mir allu iru reht vnuergriffen vnd behalten sin von der anzal wegen nach dez vorgedahten brieues lut vnd sag, den su och von mir hant. Och ist berett, welhes jares ich burgerreht vf gab nach sant Johans tag des Toffers ze sunnwendi, daz ich in danne die zehen phunt haller ze stur darnach vff den nahsten sant Martis tag dannoht geben sol von dem selben jâre. War aber, daz ich dehaines jâres inen burgerreht vf gab vor sant Johans tag dez Toffers, so sol ich dann der selben zehen phunt haller ze stur von in ledig sin. Su hant mir och all alt stoss in disem burg­reht vsgesetzt. Sunderlich vergich ich, daz ich willeklich vnd mit bedahtem mut offenlich ainen gelerten aid gesworn han mit vf gehabenen vingern zu got vnd ze den hailigen, allu vorgeschribenn stuk stat ze haltenn vnd ze tunne die vor(genanten) jarzil vs ân alle geuarde vnd dannenhin alle die wil ich in burgerreht niht vf geben han. Vnd dez alles ze offemm warem vrkunde so han ich vorgenanter Bernhart Blârrer min insigel offenlich gehenkt an disen brief. Der geben ist ze sant Gallen an der nahsten mitwuchen nach vnser frowen tag ze mittem ogsten in dem jar, do man von Cristus geburt zalt druzehenhundert jar vnd darnach in dem nunzigostem jare.