Allen^a) den, die disen brief ansehent oder horent lesen, kunden^b) wir Bilgri Russinger vogt vnd der rât der statt ze Rapreschwil^c)1 vnd veriechent L offenlich mit disem brief, daz fur vns kamen fur offen gericht fro Elsbeth Schenkin vnd Mark Schenk ir elicher wirt sesshafft ze Rapreschwil L ze ainem tail vnd Rudi Tobler burger ze Rapreschwil ze dem andern tail. Fro Elsbeth Schenkin vnd Mark Schenk ir elicher wirt L offnoten mit ir fursprechen vnd sprachen, daz sy mit guter vorbetrachtung vnd mit wolbedahtem mut fur sich vnd iro erben dem selben Rudin Tobler vnd sinen erben vnd nachkomen recht vnd redlich ze koffen geben hetten ains bestaten ewigen koffes ir halb hus vnd hofstatt mit saltzmarkt mit metzibenken vnd mit allem dem, so dar in vnd dar zu gehoret von gewonhait oder von recht, des selben huses daz ander halbtail dem Glenter von Zurich zugehoret, gelegen ze Rapreschwil vff der metzi zwuschen Haini Isenlis vnd dez vorgenanten Rudi Toblers husern vnd hofstetten, vnd war der koff beschehen vmb hundert guldin vnd vier guldin guter vnd gaber an gold vnd an gewiht, der selben guldin sy och gantzlich von im gewert vnd bezalt warint vnd hettin die in iren redlichen nutz bekeret vnd bewendet, als sy vor gericht veriachent, vnd do daz also geoffnot vnd furgeleit ward, do stunden die selben fro Elsbeth vnd Mark Schenk ir elicher wirt dar vnd vertigoten daz vorgenant halb hus vnd hofstatt mit aller zu gehord fur sich vnd ir erben Rudin Tobler vnd sinen erben vnd gabent daz also vff an den stab ze sinen handen vnd entzigent sich dar an aller vordrung vnd ansprach, die sy oder ir erben mit gericht oder an gericht dar zu iemer me gehaben mohtind, vnd taten och dis vertigen vffgeben vnd entzihen mit allen den worten werchen raten vnd getaten, so dar zu hort vnd noturfftig waz vnd als gericht vnd vrtail gab, daz es wol durch reht krafft vnd maht hette nu vnd och hie nach. Dar zu lopten fro Elsbeth Schenkin vnd Mark Schenk ir elicher wirt fur sich vnd ir erben, dis koffes vnd dez vorgeschribenn halben huses recht wern vnd troster ze sind nach gewonhait vnd reht der statt ze Rapreschwil, vntz daz den egenanten Rudin Tobler oder sin erben ain gewer dabi schirme. Vnd dez alles ze ainem vrkund der warhait so haben wir die vorgenanten vogt vnd der rât der statt ze Rapreschwil vnser statt insigel vnd ich Mark Schenk min aigen insigel offenlich gehenkt an disen brief. Dis beschach vnd ist diser brief geben, do man zalt von Crists geburt drutzehenhundert vnd nuntzig jar, an dem nachsten donrstag vor sant Bartholomeus tag dez hailgen zwelffbotten. Hie bi waren Vlrich Kolb, Hans Vndergarten vnd Hans Honburger der junger vnd ander erber lut etc.