Allen^a) den, die disen brief ansehent oder horent lesen, kunden wir Bilgri Russinger vogt vnd der rât der statt L ze Rapreschwil¹ vnd veriechen offenlich mit disem brief, daz fur vns kamen fur gericht fro Gut wilent Clausen L Walperspergs saligen elichi wirtinn mit Hansen Vndergarten ir erkornen vogt ze ainem tail vnd der L erwirdig herr abt Bilgri abt dez gotzhus ze Ruti² ze dem andern tail, du vorgenant fro Gut offnot mit irem fursprechen, daz ir Claus Walpersperg salig ir elicher wirt bi sinem leben hundert vnd viertzig guldin geben vnd gesetzt hett vff daz hus vnd hofstatt mit aller zugehord gelegen ze Rapreschwil ob der muli, stosst hindnan an den bach, mit solichem geding, daz sy der selben guldin viertzig wol ordnen machen vnd geben mocht, wem sy wolti, an manglichs summen vnd ierren. Da war sy gesundes libes vnd mutes ze rât worden, daz sy durch got durch ir vnd wilent Clausen Walperspergs saligen vnd ir vordren selen hailes willen dem abt vnd dem conuent ze Ruti funfzehen guldin von den vorgenanten viertzig guldin fugen vnd geben wolt, also daz die selben von Ruti vnd ir nachkomen jarlich vnd eweklich vff^b) der vorgenanten fro Guten vnd Clausen Walperspergs saligen jarlichen tag ir beider iartzit began vnd ainen mut kernen an den tisch dez conuentz ze Ruti vmb win vnd vmb visch geben solten, als daz zwuschen inen beret vnd gedingot ware. Vnd do daz also geoffnot vnd furgeleit ward, do stund du selb fro Gut dar mit Hansen Vndergarten ir erkornem vogt vnd gab die vorgenanten funfzehen guldin vff an den stab ze dez obgenanten abtes handen, vnd beschach daz mit allen den worten vnd werchen, als gericht vnd vrtail gab, daz es billich krafft vnd macht hette nu vnd hie nach. Vnd dez allez ze ainem vrkund der warhait so haben wir die vorgenanten vogt vnd der rât der statt ze Rapreschwil der selben vnser statt insigel vnd ich Hans Vndergarten vogt in diser sach min aigen insigel offenlich gehenkt an disen brief, dar vnder ich Guta Walperspergin mich willeklich gebunden han vnd bind aller dirre ding mit vrkund dis briefs. Dis beschach vnd ist diser brief geben, do man zalt von Crists geburt drutzehenhundert vnd nuntzig jar an dem nachsten zinstag nach sant Bartholomeus tag dez hailgen zwelfbotten. Hie bi warent die rat gemainlich.