Allen^a) den, die disen brief ansehent oder horent lesen, kunden wir Branthoch von Sax Eberhartz sun von Sax¹ vnd Hanni Babi von Frumsi² vnd L veriehent offenlich an disem brief, daz wir mit wolbedahtem mut vnd guter vorbetrahtung der wisen fursihtigen des burgermaisters des rates L vnd der burger gemainlich der stat ze sant Gallen getruwen diener worden sient ainen gantzen manot den nahsten von disem huttigen tag L hin, alz dirre brief ist geben, ze zellenn, mit solicher beschaidenhait vnd gedinge, alz hie nach geschriben stat an disem brief vnd mit worten ist beschaiden. Des ersten daz wir iro helffer vnd diener sin sullent den vorgedahten manot volle vs vnd iro vnd der selben stat nutz êr vnd fromen furderren vnd iro schaden wenden, alz verre wir mugent, ân geuarde, vnd daz wir inen vnd gemainer stat ze sant Gallen beraten vnd beholffen sin sont mit vnsern liben vnd mit vnserm gut wider diz nachgenanten kneht Haintzen Dachsen, Johansen Dachsen sinen bruder, Hainin Strolin, Hainin Hirtzlin, Johansen Swagler, Rudin Wissen, den Ruscher vnd och den Wanner^b) vnd wider alle der selben kneht helffer, wer die sint ald wie die genant sint, vnd die selben kneht vnd iro helffer an griffen ze schadgenn an iro lib vnd an iro gut, alz verre wir vermugent, ân geuarde, den vorgedahten manot volle vs, vmb den selben vnsern dienst vns die vorgenanten der burgermaister vnd der rat ze sant Gallen verhaissen hant ze gebenn ahtzehen phunt guter vnd genamer haller. Es ist och beredt vnd mit namen bedingot, ob daz wari, daz wir oder vnser helffer der vorgenanten kneht ald iro helffer ainen oder mer viengint vnd die in der vorbenanten von sant Gallen band vnd stat brahtint, daz su iro sicher sint, ald ob wir der selben obgenanten kneht oder iro helffer ainen oder mer erstachint vnd totint vnd och daz danne kuntlich wurde, wenne daz beschiht ald wedres wir dann vnder den zwain getan haben, so sont vns baiden die obgenanten der burgermaister der rat vnd gemainu stat ze sant Gallen von ieder person besunder, alz mangen wir in der selben iro vient geuangen brahtint ald totint, alz vor ist beschaiden, zu dem vorgenanten vnserm sold funfzehen phunt guter haller geben vnd weren, war aber, daz wir der vorgenanten vnser herren von sant Gallen helff hier zu bedurffent wurdint vnd die iro helff vns zu schiktint vnd doch die selb getat von vnser kuntschaft vnd rat zv giengi, war danne, daz wir mit der vorgenanten von sant Gallen hilff der obgenanten iro vient ald dero helffer ainen oder mer viengint oder totint, alz vor beschaiden ist, wedres da vnder den zwain beschach vnd daz kuntlich wurd, so sont aber vns baiden die obgenanten der burgermaister der rat vnd gemainu stat ze sant Gallen von ieder person besunder, alz mangen wir in dann der selben iro vient viengint ald totint, alz vor ist beschaiden, zu dem obgenanten vnserm sold sechs phunt guter haller geben vnd weren. Wir sullent och alle die kuntschaft, der wir bedurffent vnd darzu haben mussent, haben tun vnd vsrihten vsser vnserm gelt ân alles dez obgenanten burgermaisters der rat vnd der burger gemainlich ze sant Gallen schaden. Wir haben och baid willeklich gesworn gelert aid liplich zu got vnd zu den hailigen mit vf gehabenen vingern, dem vorgenanten dem burgermaister dem rat vnd den burgern gemainlich ze sant Gallen truw vnd warhait vnd alle vorgeschriben artikel getrulich ze laistenn ze tunne vnd ze vollefurenn, alz verre wir mugent, ân geuarde. Vnd dez alles ze offemm warem vrkunde vnd stater sicherhait aller der vorgeschribenn dinge vnd vergiht so haben wir die vorgenanten Branthoch von Sax vnd Hanni Babi erbetten den ersamen Wilhelm den Blarrer burger ze sant Gallen, daz er sin insigel fur vns gehenkt hat an disen brief, vnder dez selben insigel wir vns willeklich gebunden haben, won wir aigener insigel niht habent, dez och ich obgenanter Wilhelm Blarrer offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten zinstag vor sant Symon vnd sant Judas tag der zwelfbotten in dem jâr, do man zalt von Cristus geburt druzehenhundert jar vnd darnach in dem nunzigostem jare.