Wir^a) graf Donat von Tokkenburg¹ graf ze Brettengo² vnd ze Thafaus³ tund kunt offenlich mit disem brief allen den, die in an sehent L lesent oder horrent lesen, daz fur vns kam ze Liehtenstaig⁴ in vnser statt der erber kneht Hainrich Keller von Stetfurt⁵ vnd offnot, L das er vnd fro Anna sin elich wirtinn vnd Bertolt vnd Rudolf iro baider elich sun von vns ze lehen hetten ain schuposs gelegen L ze Stetfurt genant des Kellers schuposs, vnd vss vnd ab der selben schuposs mit aller zugehord hettind su verkoffet zwen mut kernen jarlichs geltes Wiler⁶ mess vnd hettint die selben zwen mut kern jarlichs geltes vss vnd ab der vorgenanden hub allu gemainlich vnd ir ieglichs besunder vnuerschaidenlich fur sich vnd iro erbun mit guter vorbetrahtung vnd beschaidenhait ains rehten redlichen ewigen bestaten vngefarlichen vnd vnwiderruflichen koffes ze koffen geben Hainrichen von Bichwille⁷ burgern ze Liehtenstaig vnd fro Margreten der Schubingerin siner elicher wirtinn vnd irn erbun vmb vierzehen pfunt pfenning alles guter vnd genamer Costenzer munss, dero su gar vnd gantzlich gewert sint nach warer iro vergiht vnd in iren schinbern offen nutz komen vnd bewendet sint, vnd batt vns ernstlich von sin selbs wegen vnd in namen vnd an stat dero obgenanden fro Annen siner elicher wirtinn vnd iro kinden, der gewisser vogt vnd bott er war, die vorgenanden zwen mut kern jarlichs geltes vss vnd ab der vorgenanden schuposs von im vf nemen an vnser hand vnd die mit allen rehten vnd zugehorden lihen denan obgenanden Hainrichen von Bichwille vnd fro Margreten siner elicher wirtinn, do erhorten wir sin ernstlich bett von sinen siner elicher wirtinn vnd siner kinden wegen vnd nament die obgenanden zwen mut kern jarlichs geltes vss vnd ab der vorgenanden schuposs mit allen rehten vnd zu gehorden von im vf an vnser hand vnd luhent die vnd lihent si och wissentlich mit disem brief mit allen rehten nutzen gewonhaiten vnd zu gehorden, so von reht vnd gewonhait dar zu vnd dar in gehort vnd gehoren sol, denan obgenanden Hainrichen von Bichwil vnd fro Margreten siner elicher wirtinn inan baiden gemainlich ze ­ainem rehten redlichen lehen vnd in lehens wise, daz su baidu gemainlich du selben gut vnd lehen inne haben vnd niessen sond vnd mugint nach landes vnd lehens reht. Wir hant och von besundern gnaden der obgenanden fro Margreten Bichwilerin die gnad getan vnd tund si ir wissentlich mit disem brief, daz si die obgenanden gut vnd lehen inne haben vnd niessen sol vnd mag nach landes vnd lehens reht, der obgenand Hainrich Keller offnote och, daz der koff beschehen war mit den gedingen, daz^b) er vnd sin obgenanden elicher wirtin vnd kind vnd iro erben oder wer du obgescriben schuposs vnd gut buwet oder inne hat nû oder hienach, daz die dem obgenanden Hainrichen Bichwil, Margreten siner elicher wirtinn vnd irn erbun jarlich ze sant Martis tag die obgenanden zwen mut kern ane alle minrung vnd abgang gen Wil in die statt rihten vnd weren sond vngeuarlich, vnd sol hie vor nit sin weder hagel noch wind noch enkain ander sach ane gevard. Der obgenand Hainrich Keller hat och gelobt mit guten truwen fur sich fur die obgenanden fro Annen sin elicher wirtinn, Bertolten vnd Rudolfen iro elich sun vnd fur alle iro erbun, des obgenanden koffes lehens vnd gutes in aller wise, als vorgescriben ist, reht gut getru wern ze sin nach reht gen manlichen vf gaistlichen vnd weltlichen gerihten vnd och an allen den stetten, da es denan obgenanden Hainrichen Bichwil vnd fro Margreten siner elicher wirtinn vnd iren erbun notdurftig wirt, wenne wie wa vnd als dik su baidu oder deweders vnder inan besunder oder iro erbun dar vmb vfgetriben oder angesprochen wrdint, daz er sin wip vnd iro sun vnd iro aller erbun die egenanden Hainrichen Bichwil, fro Margreten sin elicher wirtinn vnd dero erbun dar vmb versprechen verstan entrihen vnd ledig machen sond ane gefard. Es ist och beret vnd bedinget, welhes jares daz beschah, daz ain zins den andern rurti, daz der obgenand Hainrich Bichwil, Margret sin elicher wirtinn vnd iro erbun die obgenanden schuposs vnd gut besezzen vnd entsezzen sond vnd mugint dannenhin yemerme als ander ir aigenlich gut, wie su oder wem su wellent, vnd sol hie vor enkain schirm sin, wie der gehaissen ist, ane geuard, vnd sint allu vorgescribnu ding vnd geding beschehen vnd vollefurt mit aller ehafti hantvesti gewarsami worten werchen raten vnd getaten, so dar zu gut nutz vnd notdurftig warent. Vnd des ze vrkund vnd ze merer sicherhait aller vorgescribner ding vnd geding hant wir graf Donat von Tokkenburg da vorgenant vnser insigel offenlich gehenket an disen brief. Der geben ist in vnser vorgenanden stat ze Liehtenstaig an dem nachsten mantag vor aller hailgen tag in dem iar, do man zalt von Cristus geburte druzehenhundert iar vnd dar nach in dem nunzigosten iare.