Allen^a) den, die disen brief ansehent oder horent lesen, kund ich Johans Niedstain von Rinegg¹ burger ze Veltkilch² L vnd vergich offenlich mit disem brieue fur mich vnd fur alle min erben, daz ich mit wolbedahtem mut vnd L guter vorbetrahtung ain buchs, da mit man schiesset, redlich vnd reht aines staten koffes verkoft L vnd ze koffenn geben han den ersamen wisen dem burgermaister dem rat vnd der stat gemainlich ze sant Gallen vmb zwelf phunt guter vnd gaber haller, der selben haller ich von in gantzlich vnd gar gewert bezalt vnd vsgeriht bin vnd die an minen offenn nutz komen vnd bekert sint, vnd han in och die selben buchs ze koffenn geben mit solicher beschaidenhait vnd gedinge, daz ich inen die selben buchs versuchen vnd beschiessen sol, ist danne, daz die selb buchs also gantz vnd gut ist vnd bestat nach dem beschiessenn, so sol och der vorgeschriben koff stat vnd vnuerkert bestan vnd beliben. War aber, daz die selb buchs von minem beschiessenn vnd versuchenn zerbrach ald gewust wurd lutzel oder vil, so sol ich die selben buchs mir selb haben vnd der vorgeschriben^b) ab sin. Darzu sol ich och danne oder min erben, ob ich enwar, dem vorgenanten burgermaister dem rat vnd gemainer stat ze sant Gallen die vor(genanten) zwelf phunt guter haller bi der ersten vordrung ân allen furzug gantzlich wider geben weren vnd rihten. Ich han och gelobt bi guten truwen vnd loben mit disem brief fur mich vnd fur alle min erben, der vorgedahten buchs vnd des koffes, alz vor ist beschaiden, reht wer ze sinne vnd och die vorgenanten den burgermaister den rat vnd gemain stat ze sant Gallen vnd ir ieklichen besunder darumb ze versprechenn vnd ze verstanne an allen stetten an allen gerihten ân allen furzug gen aller manglichem, ân allen iren schaden, wenn wa wahin vnd wie dik su darumb alle oder dehainer besunder von ieman angesprochen geschadgot ald vf getriben werdent mit dem rehten. Vnd wie oder welhen weg su des ze schaden koment, wie sich daz fugti, da von sol ich vnd min erben, ob ich enbin, die obgenanten den burgermaister den rat vnd gemain stat ze sant Gallen gantzlich ân allen iren schaden ân allen furzug vnd ân all widerred losen entrihen vnd vnschadhaft machen, alz ich inen bi guten truwen fur mich vnd min erben gelobt vnd verhaissen han. Vnd dez alles ze warem offem vrkunde so han ich Hans Nietstain da vorgenant erbetten die ersamen Jacob Rupreht, den man nempt der Low, stat amman ze sant Gallen³ vnd Johansen Entziswiller vogt ze sant Gallen⁴, daz su iru insigel fur mich vnd fur alle min erben offenlich gehenkt hant an disen brief, vnder der selben insigel ich mich willeklich gebunden han, won ich aigens insigels niht han, des och wir die obgenanten Jacob Rupreht vnd Johans Entziswiller offenlich veriehent an disem brief vns vnd vnseren erben vnschadlich. Diz beschach vnd ward dirre brief geben ze sant Gallen an dem nahsten samstag nach sant Hylarien tag in dem jar, do man zalt von Cristus geburt druzehenhundert jar vnd darnach in dem ain vnd nunzigosten jare.