Ich^a) Herman von Landenberg¹ der êlter sesshaft ze Hagenwille² tun kûnt vnd vergich offenlich mit disem brieue fur mich vnd alle min êrben allen, L die in sehent lesent oder horent lesen, daz ich mit den êrbern wolbeschaidenn luten Bartholome Blârer, Vlrichen Rudger vnd Vlrichen Kochler L phleger dez spittâles ze sant Gallen³ liepclich vnd gutlich in ain vnd uberain komen vnd gantzlich vnd gar verricht bin von der zuspruch L wegen, die ich zu dem hof ze Hêfenhofen⁴, den man nemmet der Hennowerhof⁵ vnd dem vorgeschribenn spittâl zugehort, von lêhens ald von verlihens wegen von besetzenns vnd entsêtzenns wegen gehebt han vff disen huttigen tag, alz dirre brief ist geben, mit samlicher beschaidenhait vnd in dem rechten dinge vnd gedinge, daz ich noch min êrben noch dehain vnser lute, ez sien vnser amptlute vnser vogtlute vnser aigen lute oder wie ald von waz sachen su vns zu gehorent noch niemant andre an vnser statt noch von vnsern wegen, nû hinnenhin zu dez vorgeschribenn spittâls hof ze Hefenhofen noch zu dehainen sinen zugehorden von lêhens noch von verlihens wegen von besêtzenns noch von entsetzzenns wegen dehainu recht noch zuspruche mêr hant noch furbaz hienâch niemer mêr haben noch gewunnen sont weder mit gaistlichem noch mit weltlichem gerichte noch ân recht noch mit dehainen andern sachen ân gefarde, vnd han dâr vmb von dem obgenanten spittâl vnd von sinen phlegern enphangen vier phûnt phenning guter Costenzer munse, der ich gantzlich von inen gewert bin worden vnd an minen offenn nûtz bewendet sint, vnd dâr vmb so han ich mich willeklich entzigen vnd verzich mich mit kraft vnd vrkunde diz brieues gantzlich vnd gar aller recht vnd zuspruche, so ich vnd min êrben an dez vnd zu dez vorgeschribenn spittâls hof ze Hefenhofen von lêhens ald von verlihenns wegen von besêtzenns vnd entsêtzenns wegen ie gehebt hant ald hie nâch iemer mêr gehaben oder gewunnen mochtint, vnd daz ich noch min êrben noch dehain vnser lute, wie ald von waz sachen su vns zu gehorent, noch niemant andre an vnser statt noch von vnsern wegen den vorgeschribenn spittâl noch sin phleger, wer die sint, noch dehain iro botten, die su vs schikent ald sendent, noch iro buwlute, die su vff den vorgeschribenn hof ze Hefenhofen setzent ald in verlihent, an dem selben ietzgedâchten hof niemer mêr sullent noch wollent sûwmen ierren hinderren noch in dehain wise beswaren weder von lêhens noch von verlihenns wegen von besetzenns noch von ensetzenns wegen weder mit gericht noch ân recht ân alle gefarde. Vnd ze offenem wârenn vrkunde vnd stater sicherhait aller dirre vorgeschribenn dinge vnd gedinge so han ich obgenanter Hêrman von Landenberg min aigen insigel fur mich vnd alle min êrben offenlich an disen brief gehenket. Der geben wart ze Hagenwille in dem jâre, do von Cristi geburt wârent druzehenhûndert jâr vnd dâr nâch in dem aim vnd nunzigosten jâre, an dem nahsten donstag nâch sant Agten tag.