Ich^a) Cunrat von Ainwille hern Cunratz saligen von Ainwille¹ ritters êlicher sûn tun kûnt L vnd vergich offenlich mit disem brieue fur mich vnd alle min êrben allen, die in L sehent oder horent lesen, daz ich Johansen Haymen von Fronakker² Vlrichs Haymen L saligen êlichen sûn, der von dem libe min aigen gewesen ist vnd belêhent von dem êrwirdigen gotzhus ze sant Gallen, rêdlich vnd recht von miner hand an dez êrwirdigen fursten mines genadigen herren abt Cunen hand dez vorgeschriben gotzhus ze^b) sant Gallen³ vnd an daz selb gotzhus han vfgesendet bi Cunraten von Burron⁴ burger ze sant Gallen vnd send in vf mit kraft vnd vrkunde diz brieues an dez egenempten mines genadigen herren abt Cunen hand vnd an daz vorgedâcht gotzhus ze sant Gallen mit libe vnd mit allen sinen gutern, won er sich och an daz selb gotzhus gekofft hât von mir vnd ich mich sin och gantzlich entzigen han. Vnd ze offenem wâren vrkunde aller dirre vorgeschribenn dinge vnd vergicht so han ich obgenanter Cunrat von Ainwille min aigen insigel fur mich vnd alle min êrben offenlich an disen brief gehenket. Der geben wart ze sant Gallen in dem jâre, do von Cristi geburt wârent druzehen hûndert jâr vnd dâr nâch in dem aim vnd nunzigosten jâre, an dem nahsten sampstag vor sant Vallentins tag.