Ich^a) Jacob Rupreht, den man nempt der Low, stat amman ze sant Gallen¹ tun kunt vnd vergich offenlich an disem brief allen, die in sehent lesent oder horent lesen, L daz fur mich kament ze sant Gallen in der stat an dem nahsten samstag vor sant Gregorien tag, do ich an stat vnd in namen Nicolausen Ruprehtz mines L vettern burgers ze sant Gallen vnd von sinen wegen an des richs strasse offenlich ze geriht sass, die beschaidenn Hainrich Vogler der weber vnd Elzbeth sin êlichi L swester Peter Roschen salgen wilunt êlichi wirtinne baidu burger ze sant Gallen an ainem tail vnd der vorgenant Nicolaus Rupreht min vetter ze dem andern tail, vnd offnotent da die vorgenanten Hainrich Vogler vnd Elzbeth sin êlichi swester mit fursprechen offenlich vor mir vnd dem geriht vnd sprachent, daz su mit ainberem willen mit wolbedahtem mut vnd von iro redlicher not wegen daz gutli gelegen vff dem Honfirst² ze Obernwille³, daz man nempt der Hennbergerinen gut, daz iro friies aigen war, daz su an geuallen vnd an erstorben war von Vlrich Lutolt salgen ab dem Honfirst vnd daruber der vorgenant Nycolaus Rupreht vogt war, mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit stok mit stain mit wasser mit wasserflussen vnd gengen mit allen rehten nutzen vnd gewonhaiten vnd mit allem dem, so von reht ald von gewonhait darzu vnd darin gehort, ez sie genemptz oder vngenemtz gesuchtz oder vngesuchtz wissentz oder vnwissentz, redlich vnd reht aines staten ewigen koffes verkoft vnd ze koffenn geben hettint dem vorgenanten Nicolausen Rupreht vnd sinen erben, ob er enwar, vmb vierdhalb phunt phenning guter Costentzer munse, dero su gantzlich von im gewert warint vnd enphangen hettint vnd an iro offenn nutz bewendet, vnd baten mich eruarn an ainer vrtail, wie su im daz vorgeschriben gutli zu sinen handen bringen soltint, alz reht war vnd daz es kraft hett vnd haben moht nv vnd och hie nach. Daz tet ich vnd ward ertailt mit gemainer vrtail, daz die vorgenant Elzbeth Voglerin ainen vogt nemen solt an dem ring, wen si wolt, vnd daz danne die vorgenanten Hainrich Vogler mit siner hant vnd Elzbeth sin swester mit ir vnd mit des selben ir vogtes handen daz vorgeschriben gutli genant der Hennbergerinen gutli mit allen rehten vnd zugehorden offenlich vor mir vnd dem gerihte an des richs strasse in des vorgenanten Nycolausen Ruprehtz hand vf geben soltint vnd daz ez danne also wol kraft vnd maht hetti nach dem rehten. Do nam die vorgenant Elzbeth Voglerin ze vogt vber diz sache Johansen Garnleder ⁴ den schriber och burger ze sant Gallen, vnd gabent och do ze stett die vorgenanten Hainrich Vogler mit siner hand vnd Elzbeth sin swester mit ir vnd mit des vorgenanten Johansen Garnleders ir vogtes handen daz vorgeschriben gutli genant der Hennbergerinen gutli mit allen rehten vnd zugehorden willeklich vnd frilich gantzlich vnd gar offenlich vor mir vnd dem geriht an des richs strasse vf in dez vorgenanten Nycolausen Ruprehtz hand, vnd verzigent sich och do die vorgenanten Hainrich Vogler mit siner hand vnd Elzbeth sin swester mit ir vnd mit des vorgenanten Johansen Garnleders ir vogtes handen vnd verzihent sich mit vrkund diz brieues fur sich vnd alle iro erben des vorgeschribenn gutlis genant der Hennbergerinen gutli mit allen rehten vnd zu gehorden aller aigenschaft aller lehenschaft aller kuntschaft aller gewer lut vnd brief alles gaistlichen vnd weltlichen rehtes aller vordrung vnd ansprach aller reht vnd rehtung, so su oder iro erben an dem zu dem vnd von des vorgeschribenn gutlis wegen ie gehebt hant ald hie nach iemer gehaben oder gewinnen mohtint, vnd daz su noch enkain iro erben noch nieman andre an iro stat noch von iro wegen den vorgenanten Nicolausen Rupreht noch dehain sin erben noch nachkomen von des vorgenanten gutlis wegen mit aller zugehorde niemer sullent noch wellent ansprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân reht noch mit enkainer lay ander sache ân geuarde, vnd lobtent och do die vorgenanten Hainrich Vogler vnd Elzbeth sin swester vnd lobent mit disem brief fur sich vnd alle iro erben, des vorgeschribenn gutlis mit aller zugehorde vnd dez koffes reht wer ze sinne nach aigens vnd nach des landes reht vnd och den vorgenanten Nicolausen Rupreht vnd sin erben darumb ze versprechenn vnd ze verstanne an allen stetten an allen gerihten gen aller manglichem ân allen iren schaden, wenn wa vnd wie dik su des bedurffent ald darumb angesprochen geschadgot oder vf getriben werdent mit dem rehten. Vnd des alles ze offemm warem vrkunde so han ich Jacob Rupreht amman da vorgenant von des gerihtes wegen min insigel offenlich gehenkt an disen brief, won ez och mit gemainer vrtail ertailt ward, daz ich es tun solt. Dar­nach veriehent wir die vorgenanten Hainrich Vogler, Elzbeth sin swester vnd Johans Garnleder ir vogt in der vorgeschribenn sache ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so han ich Johans Garnleder vogt da vorgenant och min insigel in vogtes wise gehenkt an disen brief mir vnd allen minen erben vnschadlich, vnd won wir die vorgenanten Hainrich Vogler vnd Elzbeth sin elichi swester aigener insigel niht habent, so haben wir erbetten den ersamen Vlrich Kochler och burger ze sant Gallen, daz er sin insigel fur vns vnd all vnser erben offenlich gehenkt hat an disen brief, vnder des selben insigel wir vns willeklich gebunden habent, des och ich obgenanter Vlrich Kochler offenlich vergich an disem brief mir vnd allen minen erben vnschadlich. Diz beschach vnd ward dirre brief geben ze sant Gallen an dem vorgeschribenn samstag in dem jâr, do man zalt von Cristus geburt druzehenhundert jar vnd darnach in dem ain vnd nunzigostem jâre.