Bonifacius etc. Dilecto filio officiali Constanciensi salutem etc. Dignum arbitramur etc. Exhibita siquidem nobis nuper pro parte dilecti filii Johannis Sclichtingh de sancto Gallo clerici Constanciensis diocesis peticio continebat, quod olim perpetuo beneficio prebenda nuncupato in ecclesia sancti Leonhardi de sancto Gallo¹ Constanciensis diocesis per liberam resignacionem dilecti filii Johannis Zoller clerici tunc perpetui beneficiati in ipsa ecclesia per eum de illa in manibus dilecti filii Cunonis abbatis monasterii sancti Galli² ordinis sancti Benedicti dicte diocesis, cum ad abbatem dicti monasterii, qui est pro tempore, eiusdem beneficii resignacionis recepcio et admissio necnon collacio provisio presentatio seu quevis alia disposicio de antiqua et approbata et hactenus pacifice observata consuetudine dumtaxat pertineant, extra Romanam curiam sponte factam et per ipsum abbatem extra eandem curiam auctoritate ordinaria admissam vacante, idem abbas prefatum beneficium sic vacans auctoritate predicta eidem Johanni Sclichtingh contulit et de illo eciam sibi providit. Cum autem, sicut eadem peticio subiungebat, ipse Johannes Sclichtingh dubitet huiusmodi collacionem et provisionem ex certis causis iuri-bus non subsistere et, sicut accepimus, predictum beneficium adhuc, ut prefertur, vacare noscatur, nos volentes dictum Johannem Sclichtingh apud nos de vite ac morum honestate aliisque probitatis et virtutum meritis multipliciter commendatum horum intuitu favore prosequi gracioso discrecioni tue per apostolica scripta mandamus, quatinus, si post diligentem examinacionem dictum Johanni Sclichtingh ad hoc ydoneum esse reppereris, super quo tuam conscienciam oneramus, predictum beneficium, quod sine cura est, cuiusque fructus redditus et proventus viginti florenorum auri secundum communem extimacionem valorem annuum, ut ipse Johannes Sclichtingh asserit, non excedunt, sive ut premittitur iure alias quovismodo vel ex alterius cuiuscunque persona vacet, dummodo tempore dati presencium non sit in eo alicui specialiter ius quesitum, cum omnibus iuribus et pertinenciis suis apostolica eidem Johanni Sclichtingh auctoritate conferas et assignes, inducentes per te vel alium seu alios eundem Johannem Sclichtingh vel procuratorem suum eius nomine in corporalem possessionem beneficii iuriumque et pertinenciarum predictorum eadem auctoritate et defendens inductum amoto exinde quolibet illicito detentore ac faciens ipsum Johannem Sclichtingh vel dictum procuratorem pro eo ad huiusmodi beneficium, ut est moris, admitti sibique de ipsius beneficii fructibus redditibus proventibus iuribus et obvencionibus universis integre responderi. Contradictores autem nostra etc. Non obstante, si aliqui super provisionibus sibi faciendis de huiusmodi vel aliis beneficiis ecclesiasticis in illis partibus speciales vel generales dicte sedis vel legatorum eius litteras impetrarint, eciam si per eas ad inhibicionem reservacionem et decretum vel alias quomodolibet sit processum, quibus omnibus eundem Johannem Schlichtingh in assecucione predicti beneficii volumus anteferri, sed nullum per hoc eis quo ad assecucionem beneficiorum aliorum preiudicium generari, seu si venerabili fratri nostro episcopo Constanciensi et eidem abbati vel quibusvis aliis communiter vel divisim ab eadem sit sede indultum, quod ad recepcionem vel provisionem alicuius minime teneantur et ad id compelli aut quod interdici suspendi vel excommunicari non possint, quodque de huiusmodi vel aliis beneficiis ecclesiasticis ad eorum collacionem provisionem presentacionem seu quamvis aliam disposicionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mencionem, et qualibet alia dicte sedis indulgencia generali vel speciali, cuiuscunque tenoris existat, per quam presentibus non expressam vel totaliter non insertam effectus earum impediri valeat quomodolibet vel differri et de qua cuiusque toto tenore habenda sit in nostris litteris mencio specialis. Nos enim, si dictus Johannes Schlichtingh ad hoc repertus fuerit ydoneus, ut prefertur, exnunc perinde irritum decernimus et inane, si secus super hiis a quoquam quavis auctoritate scienter vel ignoranter contigerit attemptari, ac si die dati presencium eidem Johanni Schlich­tingh ad hoc reperto ydoneo de predicto beneficio cum interposicione decreti provideri mandavissemus. Datum Rome apud sanctum Petrum nono kl. iulii pontificatus nostri anno secundo. N XXII de beneficio.