Burckhardus dei et apostolicæ sedis gratia episcopus Constantiensis¹ universis et singulis confratribus decanatus apud S.Gallum sive Constantiensis diocœsis salutem in domino. Cum, ut ex parte vestri nobis est expositum, querelose in vestra loca et vestras parochias hactenus etiam pro pecuniario debito et alias irrationabiliter sint prolata ecclesiastica interdicta, vnde non tantum vos verum etiam vestri subditi contra iustitiam gravamina multa pertulistis vosque petieritis per nos in hac parte oportunum remedium adhiberi. Nos, in quantum de iure valemus, huiusmodi oportunum remedium adhibere volentes vobis et cuilibet vestrum firmiter et districte præcipiendo mandamus, quatenus deinceps constitutioni felicis recordationis domini Bonifacii papæ VIII, cuius tenor est talis. Proinde attendentes quod ut frequentius quamvis non sine causa sine culpa tamen cum multorum interdicti sententiæ proferuntur, quamquam nonnulli sunt iudices nimis prompti ad proferendas easdem etiam in negociis sine causa, que plus interdum ex cupiditatis quam charitatis radice perspicuis indiciis procedere arguuntur, quodque tempore interdicti divina organa suppenduntur et laudes nec ecclesiastica sacramenta ministrantur ut solent, tolluntur mortuis seu minuuntur suffragia præsertim per oblationem frequentem hostiæ salutaris et parvuli participantes rarius sacramenta minus inflammantur et solidantur in fide fidelium tepescit devotio, hæreses pullulant et multiplicantur pericula animarum præsentis constitutionis providemus edicto, ut nulla provincia civitas castrum villa locus territorium vel districtus authoritate ordinaria vel delegata sub ponantur ecclesiastica interdicto pro pecuniario debito vel pro cuiusvis monetæ vel pecuniæ quantitate sub quacunque occasione vel causa seu quovis quæsito colore pro eo maxime, quid ipsorum domini rectores seu officiales, quocunque nomine censeantur, vel incolæ seu habitatores aut singulares personæ ipsorum statutis seu statuendis ordinatis vel ordinandis terminis huiusmodi seu quantitatem non solverunt hactenus aut in antea non persolvant, nos enim ex nunc decernimus irritum et inane, si secus hactenus existit attemptatum vel contigerit attemptari, illudque revocavimus omnino non obstantibus quibuscunque contractibus obligationibus pactis conventionibus compositionibus submissionibus fideiussionibus consensibus et sententiis super hoc habitis vel habendis iuramentorum pœnarum spiritualium et temporalium seu multarum vel quæcunque alia firmitate vallatis, nisi talis suppositio interdicti hactenus foret facta vel in antea fieret de apostolicæ sedis speciali licentia et expressa per ipsius sedis patentes litteras apparente attentatis et custodiatis nec aliquod incommodum ecclesiasticum contra mentem et tenorem præscriptæ constitutionis deinceps usque ad nostram vel nostrorum successorum revocationem specialem et expressam apostolica vel ordinaria seu quacunque alia auctoritate promulgandum advertatis vel aliquatenus observetis. Datum Constantie anno domini millesimo trecentesimo nonagesimo primo, III idibus iulii, ind. XIIII.