Ich^a) Rudolf von Rosenberg¹ ritter sesshaft ze Bernang² im Rintal tun kûnt vnd veriech offenlich mit disem brief fur mich vnd fur all min erben L vnd nâhkomen allen den, die disen brief ansehent lesent oder horent lesen, das ich mit wolbedachtem mut vnd mit guter vorbetrachtung disu L nâhgescriben guter den wingartun am bul gelegen ze Luchingen³ im Rintal stosset ainhalb an wur vnd anderhalb an Hûgen Hofakkrers wingLartun, vnd dz hûs vnd die hofstat vnd hofraiti darob gelegen mit allem dem invang, so darzu gehôret, vnd mit aller zugehôrde vnd den akker gelegen ob der Halten⁴ vnd den akker gelegen am Laimit⁵ vnd den anwander, der daran stosset vnnan an Ruschen hûs inn Widan⁶, vnd den akker am Bubenbul⁵ gelegen an Særris wingartun mit winreban mit grûnd mit grat mit zwien mit bômen mit wûnn mit waid mit stegen mit wegen mit allen rechten nutzzen vnd gewonhaiten mit allem dem, so von recht ald von gewonhait zu disen ietzgescribenen gutern ald darin gehoret, es sige benempt oder vnbenempt wissent oder vnwissent gesucht oder vngesucht, vnd mit aller zu gehôrde recht vnd redlich verkoft vnd ze koffen geben han vnd gib su ze koffen mit disem brief disen ersamen nâhbenempten hern Johansen von Wittenwil⁷ bestættem lutpriester ze Altstetten⁸ vnd Wernlin von Wittenwil⁹ sinem elichen bruder inen baiden gemainlich vnd vnuerschaidenlich vnd allen iren erben, ob su enwærint, vmb sechtzig phûnt phenning guter vnd genæmer Costentzer muns, dero ich gantzlich vnd gar von inen gewert vnd bezalt bin, die ich an minen redlichen guten nûtz bewent vnd bekert han, die vorgescribenen guter wingart hûs hofstat hôfraiti vnd akker mit aller zugehôrde min recht lehen gewesen sint von dem erwirdigen gotzhûs ze sant Gallen, dannen ich och die selben guter wingartun hûs hofstat hofraiti vnd akker mit allen vorgescribenen zu gehôrden den vorbenempten hern Johansen von Wittenwil vnd Wernlin von Wittenwil sinem elichen bruder vnd iro erben gemainlich vnd vnuerschaidenlich geuergot vnd zu iren handen recht vnd redlich pracht han, als recht sitt vnd gewonlich was vnd als es kraft vnd macht sol vnd mag han nû vnd hie nach, vnd darvmb so han ich mich verzigen vnd verzich mich mit disem brief fur mich vnd fur all min erben vnd nachkomen gen den vorbenempten hern Johansen von Wittenwil vnd Wernlin von Wittenwil sinem elichen bruder vnd gen allen iren erben vnd nâhkomen der vorgescribenen guter wingartun hûs hofstat vnd hofraiti vnd akker mit allen vorgescribenen zugehôrden vnd rechten aller aigenschaft aller lehenschaft aller manschaft aller kûntschaft aller bewisung aller zûgnust aller gewer lut vnd brief alles gaistlichen vnd weltlichen rechtes aller vordrung vnd ansprachen aller recht vnd rechtung, so ich oder dehain min erben oder nâhkomen an den zu den vnd von der vorgenanten guter wingartun hûs hofstat hofraiti vnd akker wegen ie gehept hand ald hie nach iemer gehaben oder gewinnen môchtint, vnd das ich noch dehain min erben noch nâhkomen noch niemand andre an vnser stat noch von vnser wegen die vorgenanten hern Johansen von Wittenwil vnd Wernlin von Wittenwil sinen elichen bruder noch dehain iro erben noch nâhkomen von der vorgescribenen guter wingartun hûs hofstat hofraiti vnd akker mit allen vorgescribenen rechten vnd zugehôrden wegen niemer me sollent noch mûgent ansprechen vfftriben bekumberen bekrenken noch in dehain wis beswæren sûmmen noch ierren weder mit gaistlichem noch mit weltlichem gericht noch ân gericht noch mit enkainer lay ander sache noch furzug vber al ân all geuerde, darzu so han ich obgenanter Rudolf von Rosenberg ritter sesshaft ze Bernang im Rintal gelopt mit miner truwe vnd loben mit disem brief fur mich vnd fur all min erben vnd nahkomen, der vorgescribener guter wingartun hûs hofstat hofraiti vnd akker mit allen vorbescribenen rechten vnd zugehôrden vnd des vorgescribenen kofs recht wer ze sin nâh dem rechten vnd die obgenanten hern Johansen von Wittenwil vnd Wernlin von Wittenwil sinen elichen bruder vnd all iro erben vnd nâhkomen darvmb ich vnd min erben vnd nâhkomen ze versprechen vnd ze verstænne an allen stetten gen allermænglichem ân allen iren schaden, wenn wa vnd wie dik su des bedurfent ald darvmb von iemand an gesprochen geschadgot oder vffgetriben werdent mit dem rechten. Vnd ist dis alles beschechen vnd vollfurt recht vnd redlich mit allen den worten werken vnd getæten, so von recht ald von gewonhait darzu hôrtent ald horen solten vnd noturftig warent vnd als es kraft vnd macht sol vnd mag han ietz vnd hie nach. Vnd ze vrkund der warhait vnd stætter gantzer sicherhait aller der dinge gedinge vnd veriecht, so da vor an disem brief gescriben vnd veriechen ist, so han ich der obgenant Rudolf von Rosenberg ritter sesshaft ze Bernang im Rintal min aigen insygel fur mich vnd fur all min erben vnd nahkomen offenlich gehenkt an disen brief. Der geben ist ze Bernang am næhsten samstag vor sant Laurencius tag nach Cristi gebûrt druzehenhundert jar, darnach in dem ainen vnd nutzigostem jare.