Wir^a) der burgermeister vnd die rat der statt Zurich tun kunt allen, die disen brief sechent oder horent lesen, vmb all die stoss misshellung vordrung vnd L ansprach, so die fromen wisen vnser lieben eidgnossen die burgermeister die amman die rat vnd burger gemeinlich der stetten Costentz, Rafenspurg¹, Vberlingen², Lindow³, sant Gallen, L Buchorn⁴ vnd Wangen⁵ all ir helffer vnd diener vnd die, so zu diser nachgeschriben sach irhalb gehorent ald gehaft^b), wo die gesessen oder wie die genant sint, an dem ein teil, L vnd Hans vnd Heinrich die Tachs von Goltpach⁶, Heiniman Stroly von Herdiberg⁷, Heinr. Hirtzli von Wesen⁸, Bertschi Ruscher von Frijenbach⁹, Rudi Wisso vss dem Gastern¹⁰, Heinr. Munch, Claus Stoll, Hans Munch, Hans Knopfli, Rutschman Knopfli, Claus im Gerutt¹¹, Fritschi Stroli all siben von Herdiberg vnd Herman Keller von Erlibach¹² vnd all ander ir gesellen frund helffer vnd diener, die och zu der selben sach gehorent ald gehaft sint, wo die gesessen ald wie die genant sint, an dem andern teil vntz vff disen huttigen tag, als diser brief geben ist, je mit enander hant gehept ald wie sich die sachen vntz her erloffen zugangen oder gefuget hant, der selben stoss misshellung vnd vordrung die vorgeseiten beid teil lutter vnd gantz ze dem rechtem vff vns gangen vnd komen sint. Vnd hant och die vorgenanten vnser eidgnossen von sant Gallen mit irem offennen versigelten brief fur sich vnd fur die andern sechs stett, als sie vorben(ant) sint, fur all ir burger fur all ir helffer vnd diener vnd die, so zu inen gehorent, mit guten truwen gelopt vnd verheissen, so hant die obgenanten Hans vnd Heinr. Tachs, Heiniman Stroly, Heinr. Hirtzli vnd all ir gesellen, als si och vorben(ant) sint, fur sich selber fur all ander ir gesellen fur all ir frund fur all ir helffer vnd diener vnd fur die, so irhalb zu diser sach gehorent, nach des anlasbriefs wisung vnd fur all ir erben mit guten truwen gelopt vnd offenlich ze den heilgen geswurn mit vfgehepten handen gelert eide, war vnd stat ze halten vnd ze volfuren, wes wir vns gemeinlich oder der merteil vnder vns vmb die vorgeschriben sachen erkennen vnd vsprechen. Vnd nach beider teil red vnd widerred vordrung vnd ansprach vnd nach allen sachen vnd loffen, die sich vntz her zwischend dien vorgenanten beiden teiln hant vergangen, die wir eigenlich verhort haben, so haben wir vns einhelleklich erkennet sagen vnd sprechen vs ze dem rechten also, das die vorgenanten stett Costentz, Rafenspurg, Vberlingen, Lindow, sant Gallen, Buchorn vnd Wangen all ir burger gemeinlich vnd jeklicher besunder all ir helffer vnd diener vnd all die, so von ir wegen zu der vorgeseiten sach gehaft sint gewesen, gar vnd gentzlich ledig vnd los sullen sin vmb all vordrung vnd ansprach, wie sich die vergangen hant, so die obgenanten Hans vnd Heinrich Tachs, Heiniman Stroly, Heinr. Hirtzli, Bertschi Ruscher, Rudi Wisso, Heinr. Munch, Claus Stoll, Hans Munch, Hans Knopfli, Rutschman Knopfli, Claus im Gerutt, Fritschi Stroly vnd Herman Keller vnd all ander ir geselschaft vnd diener, die zu der selben sach gehorent ald gehaft sint, wo die gesessen ald wie si genant sint, je ze sprechen hant gehept zu dien vorgenanten stetten vnd zu iren burgern ald zu dien iren gemeinlich oder zu irem deheinem sunderlich, wie ald in welen weg sich dz hat gefuget, vnd sulln och da mit vmb all vorgeschriben sachen ze beiden teiln enrander luter vnd gut frund sin ane all arge list. Es sullent och all gefangen vnd ir brief vnd gelupt, die si geben oder getan hatten, ze beider sitt och ledig vnd los sin vnd sullen och furbz vmb die sach vnd vangnusse nicht bekumbert werden an geuerd. Wir sagen vnd sprechen och vs, dz die vorgenanten beid teil gemeinlich noch nieman vnder inen sunderlich wider disen vnsern vspruch noch wider kein stuk, so dar an geschriben stad, niemer nut getun sullen noch schaffen getan mit worten noch mit werchen mit geistlichen noch mit weltlichen gerichten noch ane gericht noch mit deheinen sachen, so jeman finden oder erdenken kan, dann dz si all gemeinlich vnd ir jeklicher sunderlich disen vspruch mit allen sinen puncten vnwandelber vnd vngefarlich nu vnd hie nach war vnd stat sullent halten bi den gelupten vnd bi den eiden, als si her vmb gelopt vnd geswurn hant, als vorgeschriben stad, an all geuerd. Her vber ze einem offennen vrkund, das der vorgeschriben vspruch war vnd stat belib, so geben wir diser vspruchbrief zwen gelich jetwederm teil einen mit vnser statt anhangendem insigel offenlich besigelt. Dis beschach vnd ward diser brief geben Zurich in der statt an dem nunzehenden tag des manodes ogsten, do man zalt von Cristus geburt druzehen hundert vnd nuntzig jar, dar nach in dem ersten jar.