Allen^a) den, die disen brief ansehent oder horent lesen, kund ich Herman Keller von Tuggen¹ vnd vergich L offenlich mit disem brief, als ich etwaz stoss hatt mit dem vogt den raten vnd den burgern gemeinlich L der statt ze Rapreschwîl², dar vmb sy mich gefangen hattend, daz ich da von der selben stoss vnd L vanknuss wegen lieplich vnd tugentlich mit inen verricht bin vnd sy mit mir, vnd dar vmb so hân ich inen vrfeh geschworen vnd han och einen gelerten eid ze den heilgen geschworen, wâr vnd stat ze habenn, als hie nach geschriben stât, vnd daz ze tund ân geuard. Des ersten sol ich all min frund ze frunden gewinnen gen den vorgenanten burgern vnd der statt ze Rapreschwîl, war aber, daz dehein min frund oder ieman von minen wegen da wider sin oder tun wolte, so sol ich mich vnuergenlich gen Rapreschwil in die statt antwurten vnd niemmer dannen komen bi dem eid, so ich dar vmb geschworen han, e daz der selb min frund och der von Rapreschwîl guter frund wirt. Es ist och mit namen beret, daz ich wider min herrschafft von Osterrich vnd wider die vorgenanten burger vnd die statt ze Rapreschwil niemer me getun sol noch schaffen getân in keinen sachen weder mit worten noch mit werchen an geuard. War daz ich daz brache vnd da wider tat vnd daz kuntlich wurde, so sol ich miner herrschafft von Osterrich vnd och den burgern vnd der statt ze Rapreschwîl hundert pfunt pfenning verfallen sin guter vnd gaber Zuricher muntz. Dar vmb mugent sy min lib vnd min gut angriffen so ferr, vntz daz sy der selben hundert pfund pfenning gantzlich gewert werdent an ir schaden, vnd sol mich noch min gut da vor nit schirmen weder geischlich noch weltlich gericht kein fryheit noch burgreht kein krieg noch vnfrid noch kein sach, die ieman erdenken moht, an geuard. Vnd dez allez ze einem vrkund der warheit so han ich der vorgenant Herrman Keller erbetten minen lieben vetteren Rudi Vogtz von Wangen³, daz er sin insigel fur mich gehenkt hât an disen brief, dar vnder ich mich willeklich verbunden hân allez dez, so an disem brief geschriben ist, won ich eigens insigels nit hân. Dez vergich ich Rudi Vogtz, daz ich min insigel von mines vetern Herman Kellers ernschlicher bett wegen doch mir vnd minen erben vnschadlich gehenkt han an disen brief. Der geben ist, do man zalt von Crists geburt drutzehen hundert vnd eins vnd nuntzig jar, an dem nachsten samstag vor sant Bartholomeus tag dez heilgen zwelffbotten.