Allen^a) den, die disen brief ansehent oder horent lesen, kund ich Frik Horwer vogt ze Jonen¹ L vnd vergich offenlich mit disem brief, daz ich ze Jonen in dem hof des tags, als diser brief L geben ist, offenlich ze gericht sasse an statt vnd in namen des fromen vesten herr Eglolfs L von Roschach ritter vogt ze Rapreschwil². Do kamen fur mich vnd fur offen gericht Hans Hurtzel ze einem teil, Hans Biderman pfleger vnd Burgi Senn meister des huses vnd der armen lut an der Fluch³ ze dem andern teil, vnd offnot der vorgenant Hans Hurtzel, daz er fur sich vnd sin erben den vorbenempten dem pfleger den meistern dem hus vnd den armen luten an der Fluch vnd ir nachkomen recht vnd redlich ze koffenn geben hett den vbernutz vnd allu sinu rechten an dem gut, daz man nempt Luti Scherers gut, gelegen ze Lenggensê⁴ mit holtz mit veld mit aker mit wisan vnd mit aller zugehord, vnd dar vmb so hett er von inen enpfangen vnd war gentzlich gewert nun pfunt guter haller in eins rechten ewigen koffes wîs, vnd offnot och furbas der selb Hans Hurtzel, daz die vorbenempten armen lut vnd daz hus an der Fluch vormals zwei stuk geltz in dem vorgenanten gut gehebt hettind, darzu so gieng och iarlich dar ab ein mut kern armen luten ze einer spend vnd ein viertâl kernen gen den Einsidellen⁵. Vnd do daz also geoffnot ward, do stund dar der vorgenant Hans Hurtzel vnd fertgot daz vorgenant gut vnd allu sinu rechten daran mit aller zugehord vnd gab es vff den egenanten Hansen Biderman vnd Burgi Sennen ze des huses vnd der armen lut handen an der Fluch vnd entzech sich daran aller vordrung vnd ansprach fur sich vnd sin erbenn vnd lopt bi guten truwen, dez selben gutz wêr vnd troster ze sin, vntz daz die vorbenempten Fluch lut oder ir nachkomen ein gewêr da bi schirmet nach gewonheit vnd recht dez hofes ze Jonen an geuard. Vnd beschach daz also an dez gerichtz stab mit allen den worten vnd werchen, so dar zu hort vnd noturfftig waz vnd als gericht vnd vrteil gab, daz es billich krafft vnd macht hett nv vnd hie nach. Vnd dez alles ze einem vrkund der warheit so han ich der obgenant Eglolff von Roschach min insigel von dez gerichtz wegen offenlich gehenkt an disen brief, won der vorgenant Frik Horwer an miner statt ze gericht sass in diser sach, als vorgeschriben stât. Dis beschach vnd ward diser brief geben, do man zalt von Crists geburt drutzehen hundert vnd eins vnd nuntzig jar, an dem nachsten zinstag vor sant Gallen tag. Hie bi warent Bilgri Russinger der elter, Berhtolt Schnepf vnd ander erber lut.