Wir^a) Rudolf von gotz gnâden apt des erwirdigen gotzhuses ze sant Johann gelegen im Turtal¹ L in Costentzer bystum sant Benedicten ordens vnd dz cappittel gemainlich dez selben gotzhusz verLgehin vnd tun kunt mit disem brief, das wir ainmuteclich vnd willenclich habin verlihen vnd L gelihen Haintzen Folin von Kalcheren² vnd sinen erben die zwen acker gelegen ze Kalcheren ze Bruderstadel³ an den furhoptern anenander stossent vndnan an den spitzigen acker obnan an dez selben Volis gut vnd ôch an den stig an den Holder³ ainhalb an die strâss vnd anderhalb aber an Volis gut, dis obgenanten acker baide mit grûnd mit grât mit wun mit wayd mit stokk mit stain mit steg mit weg vnd mit allen iren zugehorden, die ôch ledig vnd los sind, die habin wir vorgedahter apt Rudolf vnd dz cappittel gemainlich ze sant Johann alsus frylich vnd willenclich fur vns vnd all vnserr nahkomen dem obgedâhten Haintzen Volin vnd allen sinen erben reht vnd redlich verlihen jemer mer ze rehtem ewigem erblehen vnd nach erblehens reht, mit solicher beschaidenhait vnd also, das er selb sin erben oder wer denn je die obgenanten acker baid inne hât vnd buwet, vns vnsern nâhkomen ald vnsern pflegern an vnsrer statt jarklich vnd allu jâr ân widerred vnd ân vnsern schaden dauon ze rehtem zinse richten geben vnd in den Bruderhof⁴ antwrten sond funff schilling pfenning alles guter Costentzer munss, doch ân als geuare ze der werung vnd ân all jerrûnge. Wir habin ôch vmb disz ewig erblehen der obgenanten acker baide ze rehtem erschatz von im enpfangen vnd ingenomen funff pfunt pfenning alles guter vnd gnamer Costentzer munss, dero wir gar vnd gantzlich nâch allem vnserm willen erberclich vnd nûtzlich von im gewert vnd bezalt sind, das es vns wol benuget hât. Vnd sollin vnd wellin ôch wir vnd alle vnser nachkomen dez selben Haintzen Volis vnd aller siner erben gut gewern vnd troster sin nach gewonhait vnd reht vmb disz ewig erblehen der obgenanten acker baide mit allen iren zugehorden, wâ wie oder gen wem es inên jemer notdurftig wirt, an gaistlichen oder an weltlichen gerichtan mit guten truwen ân aller slaht geuarde. Des allez ze wârem offem vrkunde vnd gantzer vester sicherhait so habin wir vorgeschribner apt Rudolf ze sant Johann im Turtal vnd daz cappittel glichlich dez selben gotzhuses fur vnsselb vnd fur all vnser nahkomenn vnsru insigel offenlich gehenkt an disen brief. Der geben ward an des milten lieben herren sant Martis abent nâch Cristes geburte druzehenhûndert vnd in dem ain vnd nuntzigossten jar.