Ich^a) Eglolf von Altstetten² der êlter tun kûnt vnd vergich offenlich mit disem brieue fur mich vnd fur alle min êrben allen, die in sehent L lesent oder horent lesen, daz ich mit wolbedâchtem mute vnd von miner rechter rêdlicher note wegen rêdlich vnd recht verkofft vnd L ze koffenn geben han den wisen wolbeschaidenn luten Nycolausen Rupreht, Vlrichen Rudger vnd Vlrichen Kochler phleger vnd maister L der siechen dez spittâls ze sant Gallen³ an dez selben spittâls stâtt vnd an den selben spittâl disen nâchgenempten êrbern knecht Vlrich den Knêllen sesshaft vff Ruti⁴ mit libe vnd mit allen sinen gutern vmb acht vnd zwainzig phûnt phenning guter Costenzer munse vnd vmb zwen mût gutes vnd vngefârlichs kernen, daz ich von den obgnanten phlegern vnd maistern dâr vmb enphangen han vnd dez ich alles von inen gantzlich gewert bin worden vnd an minen offenn nûtz bewendet ist an den stetten, dâ ich minen grossen schaden mit verkomen han, der selb Vlrich Knêll von dem libe min aigen gewesen ist vnd belêhent von dem êrwirdigen gotzhus ze sant Gallen, vnd han och den selben ietzgenempten Vlrichen Knêllen mit libe mit gut vnd mit allen zugehorden dez egedâchten spittâls phlegern vnd maistern an dez selben spittâls statt vnd an den selben spittâl vfgeben geuêrtigot vnd zu irn handen brâcht mit dez êrwirdigen fursten mines genadigen herren abt Cunen hand abt dez gotzhus ze sant Gallen⁵ vnd mit miner hand, wie recht sitte vnd gewonhait waz vnd alz ez kraft vnd maht sol vnd mag han ietz vnd och hie nâch, vnd dâr vmb so han ich mich frylich vnd willeklich entzigen vnd verzich mich mit kraft vnd vrkunde diz brieues gantzlich vnd gar aller aigenschaft aller lehenschaft aller kuntschaft alles besêtzenns vnd aller gewêr lute vnd brieue aller recht vordrûngen vnd ansprâchen gaistlichs vnd weltlichs gerichtes, so ich vnd min êrben an dem vnd zu dem obgenanten Vlrichen Knêllen zu sinem libe vnd zu sinen gutern benempt vnd vnbenempt, die er gehebt hât vnd nû hinnenhin iemer mêr gewunt ald in angefallent, ie gehebt hant ald hie nâch iemer mêr gehaben oder gewunnen mochtint. Ich han och gelobt mit miner truwe vnd loben mit disem brief, dez obgnanten Vlrichs Knêllen sines libes vnd sines gutes vnd och dez koffes recht wer ze sinne nâch recht vnd den vorgedâchten spittâl vnd sin phleger, wer die sint, dâr vmb ze versprechenn vnd ze verstanne vff gaistlichem vnd vff weltlich gerichte vnd an allen stêtten gen aller manglichem, wenn wâ vnd wie dik su dez nâch dem rechten notdurftig sint ald dâr vmb mit dem rechten angesprochen geschadgot genotigot oder vfgetriben werdent, ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so han ich Eglolf von Altstetten dâ vor genempt min insigel fur^b) vnd min êrben offenlich an disen brief gehenket. Der geben wart in dem jâre, do von Cristi geburt wârent druzehenhûndert jâr vnd dâr nâch in dem aim vnd nunzigosten jâre, an sant Andres âbent dez zwelfbotten.