Ich^a) Eglolf von Altstetten¹ der elter tun kûnt vnd vergich offenlich mit disem brieue fur mich vnd fur alle min êrben allen, die in L sehent lesent oder horent lesen, daz fur mich kâment an dem tag, alz dirre brief ist geben, diz nâchgenempten wisen wolbeschaidenn L lute Nycolaus Rupreht, Vlrich Rudger vnd Vlrich Kochler phleger vnd maister der siechen dez spittâls ze sant Gallen² ze ainem L tail vnd Vlrich Knêll sesshaft vff Ruti³ dez êgedâchten spittâls bûman ze dem andern tail, vnd vrkûndot vnd veriach och do der ietzgenempt Vlrich Knêll offenlich vor mir vnd erzalt da vil grosser truwen vnd mangerlay gutes, daz im dez vorgenanten spittâls maister von dez selben spittâls wegen vil vnd dik getân hêttint, dez er dem selben spittâl noch nie ergêtzt hetti, vnd won aber er den selben vorgeschriben spittâl dez gutes vnd der truwen, so im von dem selben spittâl beschehen war, nut ergêtzen konde noch im dez gedanken, so hetti er doch mit frijem gutem willen vnd mit wolbedachtem mute dem selben êgedachten spittal vnd den vorgenempten sinen phlegern vnd maistern recht vnd rêdlich geben disi nâchgeschribenn guter, item den wingarten, den man nemmet an Rûttellan⁴, gelegen ze Luchingen⁵ vff Ruti vnd ainhalb stosset an Johansen Burgowers wingarten vnd andert an dez egedâchten spittâls wingarten, item ain bomgartli hinder dez Ruschen hus in Wydan⁶ vff Ruti gelegen vnd stosset ainhalb an den bach, der durch daz dorf vff Ruti gât, item den akker im Gêramos⁷, alles mit grûnd mit grât mit holtz mit veld mit wûnne mit waiden mit wasen mit zwi mit allen rechten nutzzen vnd gewonhaiten vnd mit allen zuhorden, die selben guter sin lêhen von mir warint, vnd wolt och die selben guter mit allen zugehorden dem vorgeschribenn spittâl zufugen vnd den egenempten sinen phlegern vnd maistern an dez selben spittâls statt zu irn handen vfgeben vnd vêrtigen, wie recht sitte vnd gewonhait war, daz ez kraft vnd maht solt vnd mocht han, vnd batt mich mit ernst, daz ich die selben vorgeschribenn guter mit aller zugehorden von siner hand an min hand vfnam vnd su lihe dez vorgeschribenn spittâls phlegern an den selben spittâl. Dez erhort ich dez obgenanten Vlrichs Knêllen ernstlichen bette vnd nam die vorgedâchten guter allu mit allen zugehorden von siner hand vf an min hand vnd han su dez egedâchten spittâls phlegern an dez selben spittâls statt vnd an den selben spittâl gelihen vnd lihs in mit disem brieue mit allen rechten nutzzen vnd gewonhaiten vnd mit allen zugehorden, so von recht ald von gewonhait dârzu vnd dârin gehorent vnd vntz her gehort hant, vnd entzech sich och do der obgenant Vlrich Knêll offenlich vor mir vnd entzicht sich mit disem brieue gantzlich vnd gar fur sich vnd fur alle sin êrben aller aigenschaft aller lêhenschaft aller kûntschaft aller gewêr lute vnd brieue aller recht vordrûngen vnd ansprâchen gaistlichs vnd weltlichs gerichtes, so er ald sin êrben an den vnd zu den vorgenanten gutern ald zu dehainen irn zugehorden ie gehebt hant ald hie nâch iemer mêr gehaben oder gewunnen mochtint. Der selb obgenant Vlrich Knêll lobt och do mit siner truwe vnd lobet mit disem brieue fur sich vnd fur alle sin êrben, der vorgeschribenn guter recht wer ze sinne nâch recht vnd den vorgeschribenn spittâl vnd sin phleger, wer die sint, dâr vmb ze versprechenn vnd ze verstanne an allen stetten gen aller manglichen, wenn wâ vnd wie dik su dez notdurftig sint, nâch landes recht. Vnd ist diz alles beschehen vnd recht vnd rêdlich volfurt, wie recht sitte vnd gewonhait waz vnd alz es nâch dem rechten wol kraft vnd maht sol vnd mag han ietz vnd och hie nâch. Vnd ze offenem wâren vrkunde vnd stater sicherhait aller dirre vorgeschribenn dinge vnd vergicht so han ich Eglolf von Altstetten da vorgenempt min insigel von diser vorgeschribenn lêhenschaft wegen offenlich an disen brief gehenket, vnder daz selb insigel ich obgenanter Vlrich Knêll, won ich aigens insigels nut hatt, mich willeklich gebûnden han, stat vnd wâr ze haltenn vnd ze lassenn, alles daz von mir an disem brieue geschriben stât. Diz beschach vnd wart dirre brief geben in dem jâre, do von Cristi geburt wârent druzehenhûndert jâr vnd dâr nâch in dem aim vnd nunzigosten jâre, an sant Thomas abent dez zwelfbotten.