Wir Chun von gotz gnaden abt des gotzhus ze sant Gallen¹, das an alles mittel zugehort dem stul ze Rom, verjehend mit disem brieff, das fur vns kam ze Wil² in vnsers gotzhus statt an dem tag, als diser brieff geben ist, der bescheiden Hans von Rain³ keller ze Herisow⁴, vnd offnet vor vns vnd sprach, wie das fro Adelheit Peters ammans ze Herisow elichi husfrow vor offem gericht, wie vrtel vnd recht geben hetti, vns by im an vnser hand vff gesent hetti ein zehendli gelegen ze Enggrischwil⁵, das von vns vnd vnserm gotzhus ir lehen wari, vnd vns bitten solt, den selben zehenden mit aller zugehord lihen dem bescheiden Vlrichen Kochler burger ze sant Gallen vnd Margrethen desselben Vlrichen Kochlers eliche husfrow ze lehen, also gab ouch vns der selb Hans das vorg(enant) zehendli gelegen ze Enggrischwil vff an vnser hand vnd batt vns, das ze lihen Vlrichen Kochlern vnd Margarethen sin elichen husfrowen ze lehen, dar vmb erhorten wir sin bett vnd namen das selb zehendli von im vff an vnser hand vnd lihen das Vlrichen Kochler burger ze sant Gallen vnd Margarethen sin elichen husfrowen ze lehen vns vnd vnserm gotzhus an vnsern rechten vnuergriffenlich. Wir haben ouch der selben Margrethen die gnad getan, das si das vorgenant zehendli haben niessen besetzen vnd entsetzen sol ze glicher wis, als ob si ein knab weri. Vnd ze vrkund haben wir abt Chun da vorgenant vnser insigel offenlich gehenkt an disen brieff. Geben ze Wil in vnsers gotzhus stat an der kindli tag nach gotz geburt tusent druhundert vnd nuntzig jar, dar nach in dem andren jare.