Wir^a) des hayligen Romischen rychs stete Costentz, Vberlingen, sant Gallen, Wangen vnd Buchorn, die den bund mitainander haltend vmb den Se, als wir ietzo vff die mitwochen vor sant Hylaryen tag von manung wegen vnser lyeben L aidgenossen von Rauenspurg ze Buchorn biainander gewesen sien, bekennent vnd veryehent offenlich mit disem brieff, daz aber fur vns zu dem rechten komen sind der edel vnser lieber herre hern Yohans der Truchsazze ze Waltpurg mit sinem fursprechen Walthern von L Loubenberg an ainem tail vnd der vorgenanten vnser aidgenossen der burger vnd dez rates gemainlich der stat ze Rauenspurg erberiv botschafft von gemainer ir stat wegen vnd mit irem vollen gewalt mit irem fursprechen Heniggyn Huntbis L by den ziten irem burgermaister an dem andern tail, als von der zwayung vnd stos wegen, die sy mitainander hand von des walds wegen, den man nempt den Altdorffer wald, vnd darumb si gestern vff den zinstag ouch vor vns vnd vor recht gen dem egenanten hern Yohansen dem Truchsazzen gestanden warent vnd vns da ainen richtungbrieff hetten lassen verhort, den si von dem selben her Yohansen dem Truchsazzen von des obgenantenn walds wegen hetten, vnd vns daruff gebetten hetten ze sprechen vnd ze ertailen, ob si bi dem selben irem brieue iht billichen solten beliben, daruff ouch der selb her Yohans Truchsazze mit sinem fursprechen redte vnd sprach, daz er sy dauon vngern drengen vnd wisen wolt vnd den ouch wir yn nach der selben rede mit vnser erkantnus guten gesprochen vnd gegeben hetten. So baten sy vns, daz wir noch zwen brieue, die sy von desselben walds wegen hetten vnd die zu den obgenanten stossen gehorten, verhorten vnd liezzen verlesen, die selben zwen brieff wurdend ouch do ze maul vor vns vnd vor gerycht verhort vnd verlesen vnd stundend von wort ze wort, als her nach geschriben stat: Es folgt der Text der Urkunde Kaiser Karls IV. vom 29. Dez. 1366, durch welche er den Ravensburgern gestattet, im Altdorfer Wald Brenn- und Zimmerholz zu schlagen, und ihre alten Rechte am Wald bestätigt. Der ander brieff stund also: Es folgt der Text einer Urkunde vom 12. März 1367 des Oberforstmeisters Wolf Wolfegger, durch die er die Rechte aller am Altdorfer Wald Berechtigten anerkennt. Vnd vff die selben zwen brieff do redten aber die vorgenanten vnser aidgenozzen von Rauenspurg mit irem egenanten fursprechen, wie daz yn vnd der obgenanten gemainen ir stat der vorgenant her Yohans der Truchsazz in die selben ir brieue vnd recht etwas yngriff tat vnd sy dabi niht halten wolt noch beliben lan vber daz, daz er sich dez gen yn in dem vorgenanten sinem rychtung brieff den vorrgestern verhorten recht vnd redlich verschriben verricht vnd vertadingt hette, daz er si solt beliben lan bi allen iren brieuen fryhaiten rechten vnd guten gewonhaiten, die si in dem Altdorffer wald hetten, vnd bâten vns daruff sprechen vnd erkennen, wan wir yn den obgenanten ersten brieff vff gestern guten gegeben vnd gesprochen hetten, ob si denne iht billichen bi den vnd allen brieuen, die si von des walds wegen vff den tag, do der brieff geben wurd, gehebt hetten, beliben solten. Daz verantwurten der vorgenant vnser herre hern Yohans der Truchsazze mit dem obgenanten sinem fursprechen vnd sprach also, als im die egenanten von Rauenspurg zusprachen von dez Altdorffers walds wegen, do war ane lougen, er vnd die sinen hetten vorst darinne, so hetten ouch die von Rauenspurg vnd ander lute ouch darinne vorst, vnd die waren lehen von dem hayligen rich, vnd getruwete vnsern spruchen vnd erkantnus wol, wir solten sy ze baidersit wisen fur vnsern herren den Romischen kunig vnd daz haylig rich, dannan daz ze lehen gieng, vnd vns ouch daruff bittent vnd begerend, daz im die vorgenanten von Rauenspurg offnoten vnd seiten, waz gebresten sy hetten oder waran er yn vberfur. Daz verantwurten ouch do die selben vnser aidgenossen von Ra­uens­purg vnd sprauchen also, sy redten ietzo weder von aigen noch von lehen aber alz er gemutot hett ze vrkundend die gebresten, die si gen ym hetten, daz wolten si gern tun, vnd war der ain gebrest, daz er den obgenanten wald sin vorst darinne gen den von Walse¹ vnd gen andern luten, die darinne nit belehent warent noch von alter darinne nit gehouwen hetten, verkoufften vnd die darinne houwen liezz vber daz, daz in dem obgenanten kuntschafft brieff vergriffen ware, daz weder er noch kainer, der in dem selben wald vorst hett, daz gen niemand tun solt. Der ander gebrest war, daz er yn werte in die selben sin vorst ze farend vnd darinne ze houwend, ouch vber daz, daz si in dem selben wald vberal in allen vorsten wol houwen vnd nemen mohten zimberholtz prennholtz zunholtz vnd pflugholtz vnd gemainlich, wes si zu dem buwe bedorfften, als daz der obgenant kuntschafft brieff vnd ouch der vorgenant ir gnad brieff sy baide daz aygentlich wisent vnd sagent vnd ouch si allweg bis her getan hetten, aber wie dem allem war, so hetten wir den brieue gestern wol verhort, den wir in guten geben vnd gesprochen hetten, darynne aigentlichen stund, daz sy solten beliben by alln iren brieuen, die sy von dez walds wegen hetten, da getruweten ouch sy got vnd dem rehten vnd vnser erkantnus wol, wir sprachen yn, daz sy bi denselben brieuen vnd rechten allen beliben solten vnd sy darumb nyendert hin anders solten wysen, wan daz vff vns recht vnd redlich verbriefft vnd vertadingt war. Daz verantwurt der egenant her Yohans der Truchsazze mit sinem fursprechen als ouch vor, wann ouch div nachred sin waz, er getruwete got vnd vnser erkantnus wol, wir solten si darumb ze baidersit wisen fur den obgenanten vnsern herren den kunig vnd daz haylig Romisch rich, dannan daz ze lehen gieng, also nach baidertail furlegung clag vnd antwurt nach dem vnd wir den obgenanten richtung brieue gestern, den si von dem vorgenanten her Yohansen dem Truchsazzen hand, aigentlich verhort vnd yn den guten gesprochen haben vnd ouch der wiset vnd seyt, daz si by allen iren brieuen fryhaiten vnd rechten, die si vber den Altdorffer wald hand, vnd ouch der egenant her Yohans der Truchsazze da wider anders nit redte, wann daz er den selben brieff gern halten wolt, vnd ouch nach dem vnd wir die obgenanten zwen brieff ouch verhort haben, die aigentlich in disem brieue verschriben sind von wort ze wort, so haben wir vns ainmutiglichen erkennet vnd darumb also ertailt vnd gesprochen, daz die obgenanten vnser aidgenozzen von Rauenspurg vnd ir nachkomen billichen beliben sullend nach vswysung derselben irr vorgeschriben irr brieue aller. Der vrtail benugt sy do aber wol, vnd bâten yn darnach ze baidersit ze sprechen vnd ze erkennen, ob man yn dez vnd aller vorgeschribnen sach yht billich vrkund vnd brieff geben solt. Daz wart yn do ouch ertailt, vnd darumb so hant die ersamen vnser lieben aydgenozzen die von Buchorn irr stat gross ynsigel von vnser aller hayssens wegen ze ainer ewigen bedahnuzz aller vorgeschribener sach offenlichen gehenkt hand an disem brieff yn selber ane schaden. Der geben yst an der vorgeschribnen mytwochen vor sant Hylaryen tag, da man zalt von Crysti geburt drivzehenhundert yare vnd darnach in dem zway vnd nvntzigostem jare.