Venerabili fratri Theoderico episcopo Signensi¹ in diocesi Curiensi commoranti salutem etc. Vite ac morum honestas aliaque probitatis et virtutum merita, super quibus dilectus filius Diethelmus Leman clericus Constanciensis diocesis apud nos fidedigno commendatur testimonio, nos inducunt, ut sibi reddamur ad graciam liberales, hodie siquidem ad audienciam nostram deducto, quod Vlricus Burgouer² canonicus Curiensis tam dampnate memorie Bartholomeo olim archiepiscopo Barensi³, qui per impressionem et violenciam notorias, dum viveret, sedem apostolicam occupare contendebat, quam Perrino de Thomasellis⁴, qui eidem Bartholomeo succedens invicem dictam sedem dampnabiliter occupare conatur, adheseret, prout eidem Perino adherebat tunc, nos attendentes, quod veris existentibus supradictis idem Vlricus canonicatu et prebenda ecclesie Curiensis, quos tunc temporis obtinebat, reddiderat se indignum, tibi per alias nostras litteras dedimus in mandatis, ut vocatis dicto Vlrico et aliis, qui forent evocandi super premissis, inquireres auctoritate nostra diligencius veritatem, et si per inquisicionem huiusmodi ea repieris veritati fulciri, eundem Vlricum canonicatu et prebenda predictis eadem auctoritate sententialiter privares et amoveres penitus ab eisdem, prout in eisdem litteris plenius continetur. Nos igitur volentes prefato Diethelmo premissorum meritorum suorum intuitu graciam facere specialem, fraternitati tue per apostolica scripta mandamus, quatinus, si contingat dictum Vlricum eisdem canonicatu et prebenda per te privari et amoveri ab eis, ut prefertur, ipsos canonicatum et prebendam, cum illos per privacionem huiusmodi vacare contingerit, prefato Diethelmo cum plenitudine iuris canonici ac omnibus iuribus et pertinenciis suis auctoritate predicta conferas et assi­gnes, inducentes per te vel alium seu alios eundem Diethelmum vel procuratorem ­suum eius nomine in corporalem possessionem canonicatus et prebende ac iurium et pertinenciarum predictorum et defendens inductum amoto exinde dicto Vlrico et quolibet alio illicito detentore ac faciens ipsum vel dictum procuratorem pro eo in eadem ecclesia auctoritate supradicta in canonicum recipi et in fratrem stallo sibi in choro et loco in capitulo eiusdem ecclesie cum dicti iuris plenitudine assignatur, sibique de ipsorum canonicatus et prebende fructibus redditibus proventibus iuribus et obventionibus universis integre responderi, contradictores auctoritate nostra appellacione postposita compescendo non obstantibus quibuscumque statutis et consuetudinibus eiusdem ecclesie contrariis iuramento confirmacione apostolica vel quacumque firmitate alia roboratis aut si aliqui apostolica vel alia quavis auctoritate in eadem ecclesia in canonicos sint recepti vel ut recipiantur insistant, seu si super provisionibus sibi faciendis de canonicatibus et prebendis eiusdem ecclesie speciales vel aliis beneficiis ecclesiasticis in illis partibus generales dicte sedis vel legatorum eius litteras impetrarint, eciam si per eas ad inhibicionem reservacionem et decretum vel alias quomodolibet sit processum, quibus omnibus in assecucione canonicatus et prebende predictorum prefatum Diethelmum volumus anteferri, sed nullum per hoc eis quoad assecucionem canonicatuum et prebendarum aut beneficiorum aliorum preiudicium generari, seu si venerabili fratri nostro episcopo et dilectis filiis capitulo Curiensibus vel quibusvis aliis communiter vel divisim a dicta sit sede indultum, quod ad recepcionem vel provisionem alicuius minime teneantur et ad id compelli aut quod interdici suspendi vel excommunicari non possint, quodque de canonicatibus et prebendis ipsius ecclesie vel aliis beneficiis ecclesiasticis ad eorum collacionem provisionem presentacionem seu quamvis aliam disposicionem communiter vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mencionem et qualibet alia dicte sedis indulgencia generali vel speciali, cuiuscumque tenoris existat, per quam presentibus non expressam vel totaliter non insertam effectus earum impediri valeat quomodolibet vel differri et de quacumque toto tenore habenda sit in nostris litteris mencio specialis, aut si dictus Diethelmus presens non fuerit ad prestandum de observandis statutis et consuetudinibus eiusdem ecclesie solitum iuramentum, dummodo in absencia sua per procuratorem ydoneum et cum ad ecclesiam ipsam accesserit corporaliter illud prestet, nos enim exnunc irritum decernimus et inane, si secus super hiis a quoquam quavis auctoritate scienter vel ignoranter contingerit attemptari. Datum Auinione idus ianuarii pontificatus nostri anno quartodecimo. Exp(editum) VIII. kl. novembris anno XIIII^o. R. de Valle. T. VII. kl. novembris anno XIIII^o. Ri. Colini.