Wir^a) grâff Albrecht von Werdenberg vom Hailigenberg¹ der elter herr ze Bludentz² vergehent vnd tugint kund allermanglichem mit disem offenn brieff fur vns all vnser erben von der L vogtyg vnd von des vogtrechtz wegen, daz wir habint vsser dem hôf ze Ruti³ von luten vnd gutern, was zu dem selben hôf ze Ruti vnd darin gehoret, der mit aller siner zugehorde des gotzhûses L ze Pfafers⁴ recht aygen ist, da habint wir gesundes libes vnd mutes mit guter williger vorbetrachtung mit wolbedâchtem sinn vnd mut ze den ziten vnd tagen, do wir es mit recht wol getun mochtent, L recht vnd redlich ze kôffend geben habint ains bestaten vngevârlichen ewigen kôffes aigen fur aigen vnd lehen fur lehen dem erwirdigen in gott hern Burkarten von Wolffurt abs^b) des vorgenanten gotzhûses ze Pfafers⁵ sant Benedicten ordens gelegen in Churer bystum vnd allen sinen nâchkomen vnd och mit namen dem selben gotzhus vnd sinem conuent gemainlich ze Pfafers die vorgeschribenn vogtyg vnd daz vogtrecht ze Ruti vnd mit namen allu du recht, so wir habint zu dem selben hôf ze Ruti ze luten vnd gutern, die darzu vnd dar yn gehorent, es syg von aygenschafft von lehenschafft von vogtyg ald von andrer sach wegen, wie sich daz je gefuget hât von recht ald von gewonhait, mit gerichten twingen vnd bannen mit diensten mit sturen vnd mit allen rechten nutzzen gewonhaiten vnd zugehorden benempten vnd vnbenempten vnd namlich mit aller der gewaltsami ehaffti vnd rechtung, als wir die selben vogtyg von vnsren vordern ererbt vnd sy vntz her getruwklich vnd fridlich vnd och von manglichem vnansprachig inn gehebt besessen vnd genossen habint. Vnd ist der ewig redlich kôff der ietzgedâchten vogtyg vnd aller vnsrer rechten, so wir daran habint, alsusz beschehen vmb zwayhundert pfund vnd vmb sibenzig pfund guter vnd genamer pfenning Costentzer munsz, der wir von dem obgenanten abt Burkarten vnd sinem gotzhûs ze Pfafers nutzzlich vnd och gar vnd gantzlich nâch vnserm willen an barem gelt gewert vnd bezalt sigint. Vnd darumb so habint wir die obgeschribenn vogtyg vnd daz vogtrecht ze Ruti mit lut vnd mit gutern mit twingen mit bannen vnd mit allen nutzen gewonhaiten vnd zugehorden vnd och mit aller gewaltsami ehaffti vnd rechtung nichtzit vsszgenomen, was dar zu ald darin gehoret von recht ald von gewonhait, es sig benempt ald vnbenempt wissent ald vnwissent gesucht ald vngesucht, dem vorgenanten abt Burkarten sinem conuent vnd gotzhûs gemainlich ze Pfafers vnd allen sinen nâchkomen fur ledig vnd lôs vnd von manglichem vnuerkumbert aigen fur aigen vnd lehen fur lehen redlich frilich vnd vnbetwungenlich vffgegeben vnd vns des alles in iren ewigen nutzz vnd gewalt entzigen vnd verzigen vnd es och gantzlich zu iren handen vnd in irn gewalt brâcht vnd gefertgot mit worten werkken raten vnd getaten vnd mit aller der krafft, die darzu gehort vnd notdurfftig was, als man sollich sachen vsszbringen tun vnd vollfuren sol nâch recht vnd gewonhait vnd och mit dem geding, daz wir noch enkain vnser erben noch niemant anders von vnser wegen den vorgenanten abt Burkarten noch sin gotzhûs ze Pfafers noch enkain sin nâchkomen an dem vorgenanten hoff noch an der vogtyg ze Ruti noch an enkainen luten gutern nutzzen noch rechten, die dar zu gehorent gar halb noch an enkainem tail, niemer gesûmen bekumbern bekrenken vffgetriben noch angesprechen sollint weder mit gericht gaistlichem noch weltlichem noch ân gericht mit enkainen andern vffzugen noch rechten susz noch so in dekain wyse ân all gevard, won wir vns gen dem dikkbenempten abt Burkarten gen sinem gotzhûs ze Pfafers vnd gen allen sinen nâchkomen aller aigenschafft aller lehenschafft vnd namlich aller vnser vordrung ansprâch gewaltsami ehaffti vnd rechtung baidi gaistlichs vnd weltlichs gerichtes vnd rechtes dar an gantzlich entzigen vnd verzigen habint, vnd entzihent vns och des alles wissenklich mit krafft vnd vrkund disz offenn brieffs fur vns vnd all vnser erben des ewigen kôffes vnd aller dirr vorgeschribnen gedingden stukk vnd artikkel wir vorgenanter grâf Âlbrecht der elter von Werdenberg vnd all vnser erben des egenanten abt Burkartz vnd sines gotzhûsz ze Pfafers vnd aller siner nâchkomen gut vnd getruw wern sin sollint nâch recht, wâ si des an gaistlichem ald an weltlichem gericht jemer bedurffent ald notdurfftig werdent, by guten truwen ân all gevard. Vnd habint inen daruber ze merer sicherhait zu vns vnd vnsern erben vnuerschaidenlich ze rechtem gewern geben vnd gesetzt vnsern lieben bruder grâf Hainrichen von Werdenberg⁶ herren ze Rinegg⁷ mit der gedingt vnd beschaidenhait, war ob dem vorgenanten abt Burkarten ald dem gotzhûs ze Pfafers oder sinen nâchkomen die vorgedâcht vogtyg ze Ruti ald dehain ir zugehord lut oder gut, daz darzu vnd dar yn gehoret, als vor ist beschaiden, von jemant ansprachig wurd mit dem rechten, es war mit gaistlichem oder weltlichem gericht, daz da wir vnd der vorgenant gewer vnd vnser baider erben vnuerschaidenlich su dar vmb allweg gen allermanglichem âne allen iren schaden verstân vertretten vnd versprechen sollint mit dem rechten vnd nâch aygens recht vff allen gaistlichen vnd weltlichen gerichten vnd mit namen an allen den stetten, so su des nâch dem rechten jemer bedurffent ald notdurfftig werdent, vnd inen och die obgenanten vogtyg mit aller ir zugehord, als vor ist beschaiden, von manglichem gantzlich vnd gar entrihen losen ledgen vnd vnansprachig machen by vnsern guten truwen ân all widerred vnd gevard, wâ aber wir ald vnser erben daz nit tatint, als ietz hieuor ist beschaiden, vnd das er ald sin nachkomen vnd och sin gotzhûs sich selber darumb zu dem rechten versprechen ald vertretten mustint, gen wem ald an welchen stetten daz war, vnd daz si schaden da von enpfiengint, es war von zerung von klag von bottenlon von briefen von gericht von frafli ald susz von andrer sach wegen, ald ob sich gefugt, daz inen dehain stukk der vorgedâchten vogtyg ze Ruti an luten ald an gutern ald an dehainen andern stukken gar oder des ain tail mit dem rechten an behebt ald ab gebrochen wurd, den selben schaden abgang vnd gebresten allen sollint wir vorgenanter grâff Albrecht vnd och der obgenant gewer vnser bruder grâf Hainrich vnd vnser baider erben im ald sinen nâchkomen vnd och dem vorgenanten sinem gotzhûs denn wenn si wend ân all widerred erfollen widerkeren vszrichten vnd ab tun gantzlich ân allen iren schaden vnd inen och die selben vogtyg lut vnd guter mit allen stukken rechten vnd zugehorden von manglichem gantzlich entrihen losen ledgen vnd vnansprachig machen, als och vorgeschriben stât, by vnsren guten truwen aber ân all gevard. Wir vorgenanter grâf Âlbrecht habint och dem egenantem gewern vnserm lieben bruder grâff Hainrichen von Werdenberg herr ze Rinegg by vnsern guten truwen in aydes wyse gelôbt vnd verhaissen, war ob er ald sin erben dirr obgedâchten gewerschafft vnd sach jemer schadhafft wurdint ald ze schaden kamint, wie sich daz gefugti susz oder so, daz da wir ald vnser erben, ob wir nit warint, in oder sin erben da von gar vnd gantzlich ân allen iren schaden entrihen losen ledgen vnd vnklagber machen sollint^c) an all widerred vnd gevard vnd vmb den schaden allen iren schlechten worten ze glôbent âne ayd vnd âne alle ander bewysung. Vnd des alles ze warem vnd offem vrkunde vnd ze ainer bestaten vesten sicherhait so gebent wir vorgenanter grâf Albrecht der elter von Werdenberg dem obgenanten abt Burkarten sinem gotzhûs ze Pfafers vnd allen sinen nachkomen disen gegenwirtigen brieff hieruber besigelten mit vnserm aygem angehenkten insigel fur vns vnd all vnser erben. Darnâch vergehent wir vorgenanter grâf Hainrich von Werdenberg herr ze Rinegg dirr obgedâchten gewerschafft vnd lôbent och die gen dem vorgenanten abt Burkarten gen sinem gotzhûse vnd gen allen sinen nâchkomen in der wyse, als hie vorgeschriben stât, vest vnd stat ze haltent mit guten truwen ân all gevard, vnd des och ze vrkund ainer warhait vnd staten sicherhait so habint wir vnser insigel fur vns vnd all vnser erben och offenlich gehenkt an disen brieff. Der ze Veltkilch⁸ geben ward des jares, do man zalt von Cristus geburt druzehenhundert vnd im zway vnd nuntzgosten jar, an dem nachsten samstag nach sant Valentins tag des hailigen martrers.