Allen^a) den, die disen brief ansehent lesent oder horent lesen, kund ich Burkart Ris burger ze Wil¹ vnd vergich offenlich mit disem brief, daz L ich wissentklich vnd wolbedaht von miner kumberhaftin wegen redlich vnd recht fur mich vnd fur alle min erben verkoft han die wiLsen zwischan der ffrowen in der samnung garten vnd dem mulibach, der an die klaffenden muli gat, gelegen, die vornan stosset an die L landstrazz, mit grund vnd mit grat vnd mit allen rechten nutzen gewonhaiten vnd mit aller zugehord, dieselb wise min recht aigen was, vnd han dieselben wisen fur recht aigen ains vngeuarlichen ewigen kofs ze koffent geben den ersamen gaistlichen ffrowen ffrow Annen von Henkart priorinen vnd den ffrowen vnd dem couent gemainlich der samnung ze Wil² vor der stat in Costentzer bystum gelegen vnd allen iren nachkomen zu desselben couents vnd samnung handen vnd gewalt vmb nun vnd viertzig pfund pfen(ning) alles guter vnd genamer Costentzer muns, dero ich och aller gantzlich nach minem nutz vnd willen von inen bezalt bin. Vnd han inen dieselben wisen mit aller zugehord ledklich vnd ffrilich fur mich vnd alle min erben vffgeben vnd zu iro vnd iro samnung vnd couentes handen vnd gewalt bracht vnd geuertgot vnd si der in liblich nutzlich gewer gesetzt, alz recht sitt vnd gewonlich was vnd alz es billich nach recht vnd nach gewonhait kraft hat nu vnd hienach. Vnd han mich hier vber an derselben wis mit aller zugehord ledklich vnd ffrilich gegen den obgenanten ffrowen vnd gegen allen iren nachkomen verzigen vnd entwert vnd verzich vnd entwer mich och redlich vnd recht mit disem brief fur mich vnd fur alle min erben aller aigenschaft aller lehenschaft aller manschaft alles tails aller gemaind aller gewer aller kuntschaft aller zugnust lut vnd briefen alles rechten gaistlichs vnd weltlichs gerichts aller rechtung aller vordrung vnd ansprachen, so ich ald min erben zu der obgenanten wisen mit aller zugehord ie gehattent ald hernach iemer mer gewinnen ald erwerben mohtent von recht ald von gewonhait ald von dehainerlay andren sach wegen, so ieman erdenken kan, an geuard. Ich sol vnd geloben och bi guten truwen fur mich vnd fur alle min erben, die ich vesteklich herzu bind, der obgenanten wisen mit aller zugehord vnd dis redlichen kofs der obgenanten priorinen vnd gemaines couents in der obgenanten samnung gen allermenglichem vff gaistlichem vnd vff weltlichem gericht recht wern ze sint nach dem rechten vnd nach des landes sitten vnd gewonhait, wenn wa ald wie dik si ald ir nachkomen dar vmb von ieman mit dem rechten vffgetriben ald angesprochen werdent, daz ich vnd min erben si dar vmb allweg an allen iren schaden verstan vnd versprechen vnd von der ansprach entrihen vnd ledig machen sollen an furzug vnd an alle widerred an geuard. Vnd des alles ze offem vrkund vnd zugnust der warhait so han ich obgenanter Burkart Ris min insigel fur mich vnd fur alle min erben offenlich gehenkt an disen brief. Der geben ist ze Wil in der statt an dem nahsten fritag nach sant Mathyas des hailgen zwelfbotten tag, do man zalt von Cristus geburt druzehenhundert vnd nuntzig jar, dar nach in dem andern jar.