Ich^a) Berhtolt Brandli von Kempten¹ priester kapplan der armen veldsiechen an dem Linsibul² ze sant Gallen vor der stat tun kunt vnd vergich offenlich mit L disem brieue allen, die in ansehent lesent oder horent lesen, fur mich vnd fur alle min erben, daz ich mit wolbedahtem mut mit friiem willen gesund libes vnd L och mutes durch miner vnd miner vordern vnd durch aller der selan, die mich hier zu gefurdert hant, nutz vnd hailes willen den wingarten, den man L nempt die Kamer, gelegen ze Bernang³ in dem Rintal in Zaissenriet⁴, der ainhalb stosset an des spittals wingarten ze sant Gallen⁵ och genant die Kamer⁶ vnd anderthalb an der Hub bach⁷, der zu des Hochsters muli vnd mulstat gat, der selb wingart min lehen waz von dem erwirdigen gotzhus ze sant Gallen, mit grund mit grat mit reban mit veld mit allen rehten nutzen vnd gewonhaiten vnd mit aller zugehorde willeklich vnd frilich reht vnd redlich geben han den ersamen Johansen Appaceller, Vlrichen Keller dem bader vnd Johansen Gupsiner alle burger ze sant Gallen ze disen ziten maister vnd phleger der vorgenanten armen velt siechen an dem Linsibul vnd zu der selben siechen handen vnd gib inen vnd allen iren nachkomen an der selben siechen vnd an ir nachkomen stat mit vrkund diz brieues, vnd han och den selben vorgenamten phlegern vnd maistern an der egenamten armen siechen vnd an ir nachkomen stat den vorgeschribenen wingarten mit allen rehten vnd zugehorden reht vnd redlich geuertgot vnd zu iren handen braht, alz reht sitte vnd gewonlich was vnd alz es kraft vnd maht sol vnd mag han ietz vnd och hie nah, mit solicher beschaidenhait vnd in dem rehten dinge vnd gedinge, daz die vorgenemten phleger vnd maister vnd alle iro nachkomen, weli ie danne da selbs an dem Linsibul der armen velt siechen phleger vnd maister sint, zu der selben armen siechen mund vnd zu iro pfrunde den vorgeschribenn wingarten, den man nempt die Kamer, mit allen rehten nutzen vnd mit aller zugehorde hinnenhin eweklich ân alles verkeren vnd ân alle verwandlung haben niessen besetzen vnd entsetzen sont vnd daz die vorgenanten phleger vnd maister der egenanten siechen noch dehain ir nachkomen noch nieman andre an ir stat noch von iro wegen den vorgeschribenn wingarten gantzlich noch in dehainen tail besunder niemer veranderren noch verkumberren sont weder mit versetzen mit verkoffen mit lipding darus ze gebenn noch in kain ander wise, so ieman vinden oder erdenken kan, won daz der selb vorgeschriben wingart mit allen rehten nutzen vnd zugehorden den egenanten armen siechen an dem Linsibul vnd allen iren nachkomen, weli siechen da selbs an dem Linsibul danne sint, zu iro pfrunde vnd zu iro munde dienen vnd volgen sol ân furzug ân alle widerred ân alle verandrung vnd ân alles verkeren, vnd darumb so han ich vorgenanter Berhtolt Brandli mich willeklich verzigen vnd verzich mich mit disem brieue gantzlich vnd gar fur mich vnd fur alle min erben des vorgeschribenn wingarten mit aller zugehorde aller aigenschaft aller lehenschaft aller kuntschaft aller gewer lut vnd brief alles gaistlichen vnd weltlichen rehtes aller vordrung vnd ansprachen alles vszugs aller reht vnd rehtung, so ich oder min erben an dem zu dem vnd von des vorgeschribenn wingarten wegen ie gehebt habent ald hie nach iemer gehaben oder gewinnen mohtint, vnd ist diz alles beschehen vnd vollefurt reht vnd redlich mit der ersamen wisen des burgermaisters des rates gemainlich ze sant Gallen vnd mit der egenamten phleger vnd maister rat gutem willen gunst vnd verhengde mit allen den worten werken vnd getaten, so von reht ald von gewonhait darzu gehortent ald horen soltent vnd notdurftig warent vnd alz es kraft vnd maht sol vnd mag han. Vnd des alles ze offem warem vrkunde vnd ze ainer staten sicherhait aller der vorgeschribenen dinge vnd vergiht so han ich Berhtolt Brandli priester vnd kapplan da vorgenant fur mich vnd fur alle min erben min aigen insigel offenlich gehenkt an disen brief. Wir der burgermaister vnd der rat gemainlich der stat ze sant Gallen vnd wir die vorgenamten phleger vnd maister ze disen ziten der armen siechen an dem Linsibul veriehent offenlich an disem brieue, das alles das, so an disem brief geschriben stant, mit vnserm rât gutem willen gunst vnd verhengde beschehen zu gangen vnd vollefurt ist, vnd daz dis alles war stat vnd vnuerkertes belibe vnd hie wider nieman nut tuie, so haben wir die vorgedahten der burgermaister vnd der rat gemainlich ze sant Gallen vnser stat grosses insigel offenlich gehenkt an disen brief, doch vns vnd allen vnseren erben vnd nachkomen gantzlich vnschadlich. Vnd des ze merer sicherhait der selben dinge so habent wir die vorgedahten phleger vnd maister och vnseru aigenu insigel offenlich gehenkt an disen brief. Der geben ist ze sant Gallen an dem hailigen abent ze phingsten in dem jâr, do von Cristus geburt warent druzehenhundert jâr, nunzig jâr vnd darnach in dem andern jâre.