Wir^a) Cun von gottes gnaden abt dez gotzhus ze sant Gallen¹, daz an alles mittel zu gehort dem stul ze Rom, L veriehent mit disem brief, daz fur vns kam vff vnsers gotzhus vesti der beschaiden Hainrich Schnider L von Berg² vnd veriach vor vns offenlich, das die zehenden von den vnd ab den nahgeschribnen schuppassen L vnd gutern vnd och diz nahgeschribnen akker sin reht lehen warin von vns^b) vnd vnserm vorgeschribnen gotzhus ze sant Gallen, vnd ist das der zehend von des Rappen schuppas, item der zehend von Hainrich Bachwilles schuppas, item den zehenden von Rudolfs von Bachwille³ schuppassen, item den zehenden von Hainrich Mayers schuppassen, item den zehenden von dem akker ze Wolfnitzbrunnen³, item den zehenden von dem Alber akker³, item den zehenden von dem akker am Juch³, item den zehenden von dem akker ob der Grutz³, item den zehenden von dem akker an der Langen Spekli³, item den zehenden von dem akker, den man nempt die Vnder brait³ ze dem Holennussbom³, vnd den zehenden vom aim akker haisset Rutli⁴ bi dem Sûrenbom³ gelegen, so sind dis die akker, item der akker, den man nempt der Finger akker³, gelegen bi dem Sûrenbom vnd ain akker stosset gewiller an den herweg mit allen rehten vnd zugehorden, vnd die selben zehenden vnd akker er Elsen siner elichen tohter vnd Hainrichen Bomgarter ir elichen man fur der selben siner tohter Elsen hainstur geben wolt, vnd batt vns ernstlich, dz wir im des gundin vnd die selben zehenden von den vnd ab den vorgenanten schuppassen vnd akkern vnd die vorgenempten zwen akker von im vff namint an vnser hand vnd die lihint der selben Elsen siner tohter vnd Hainrichen Bomgarter ir elichem man vnd den kinden, die si ietz bi enandern hand oder noch elich bi enandern gewinnent knaben vnd tohtran glich, ze rehtem lehen, darumb aber wir den selben Hainrichen Schnider siner bett geêrot habint vnd namen die vorgenanten zehenden vnd akker, als vorgeschriben stat, von im vff an vnser hand vnd lihent die den egenanten Elsen siner tohter vnd Hainrichen Bomgarter siner tohter man vnd den kinden, die si ietz bi enandern hand oder noch elich bi enandern gewinnent knaben vnd tohtran glich, ze rehtem lehen, vnd lihent inen mit disem brief , was wir inen durch reht lihen sullent vns vnd vnserm vorgenanten gotzhus an vnsern rehten vnd gewonhaitan gantzlich vnschadlich vnd also, dz ir elichen kind die selben lehen ie nach tod von vns oder vnsern nahkomen enpfahen sond. Vnd ist diz beschehen vnd redlich vollfurt, als es billich nah dem rehten kraff vnd maht haben sol vnd mag ietz vnd hie nah. Vnd ze warem vrkund habent wir vnser insigel gehenkt an disen brief. Der^c) geben ist am sunnentag vor sant Jacobs tag dez zwelfbotten, do man zalt von Cristi geburt dusent druhundert nuntzig vnd zwai jar.