Wir^a) diz nâchgenempten Eglolf von Altstetten der êlter vnd Eglolf von Altstetten¹ sin êlicher sûn tugint kûnt vnd veriehent offenlich mit disem brieue fur vns vnd fur alle L vnser êrben allen, die in sehent lesent oder horent lesen, daz wir baid mit ainhellem wolbedachtem mute vnd mit guter vorbetrachtûng vnd von vnser rechten rêdlicher L note wegen verkofft hant disu nachgeschribenn menschen Ruschen inn Wyden², Elzbethen sin êlichen wirtinnen, Hainrichen, Cunraten, Adelhaiten, Elzbethen vnd KatheriLnen iru kind, Johansen inn Wyden, Annen sin êlichen husfrowen vnd Hainrichen iro sûn, Elzbethen Hainrichs saligen inn Wyden wilent êlichen husfrowen, Eglolfen, Vlrichen, Johansen, Adelhaiten, Annen vnd Elzbethen iru kind, Hannin Waltis, Katherinen sin êlichen husfrowen, Johansen, Hainrichen vnd aber Johansen, Bryden vnd Elzbethen iru kind, Johansen Waltis den eltern, Elzbethen sin êlichen husfrowen vnd Elzbethen iro tochter, vnd dez selben Johansen Waltis sweher, den man nemmet Johans ab Kapf³, Elzbethen sin êlichen husfrowen vnd Gesen iro tochter, Hainrichen, Johansen, Cunraten, Hugen vnd Vlrichen die Zimbermann gebruder, Elzbethen, Adelhaiten vnd Nesen iro swostren Johansen Zimbermans saligen kind, Johansen Wilden, Elzbethen sin êlichen husfrowen, Elzbethen, Bryden vnd Adelhaiten iru kind, Hainrichen Zurnen den eltern, Adelhaiten sin êlichen husfrowen, Clausen, Vlrichen, Johansen, Werlin, Hainrichen, Elzbethen vnd Annen iru kind, Hainrichen Omlis ze disen ziten sesshaft vff Hardern⁴ vnd Adelhaiten sin êlichen husfrowen allu von Luchingen⁵, mit liben vnd mit allen irn gutern, wie du genempt ald gehaissen sint, besucht vnd vnbesucht^b) vnd mit allen iro zugehorden, so inen von recht ald von gewonhait zugehort, vnd aines staten êwigen koffes recht vnd rêdlich ze koffenn geben hant an daz êrwirdig gotzhus ze sant Gallen vmb dru hûndert phunt vnd vmb siben vnd zwainzig phunt phenning guter Costenzer munse, die wir von inen dâr vmb enphangen habent vnd deren wir gantzlich von inen gewert sint worden vnd an vnsern offenn nûtz bewendet sint an den stetten, dâ wir vnsern grossen schaden mit verkomen hant, du selben vorgeschribenn menschen allu von den liben vnser aigen gewesen sint vnd belêhent von dem vorgeschribenn gotzhus ze sant Gallen, vnd habent och du selben menschen allu, alz su da vor benempt sint, mit iro liben vnd mit allen iro gutern vnd och mit allen iro zugehorden an dez hohwirdigen fursten vnsers genadigen herren abt Cunen hand von gotes genâden abt dez egedâchten gotzhus ze sant Gallen⁶ vnd zu sinen vnd siner nâchkomen vnd dez selben gotzhus handen von vnsern handen vfgeben vnd geuêrtigot, wie recht sitte vnd gewonhait waz, daz ez kraft vnd maht sol vnd mag han ietz vnd hie nâch, mit dem geding vnd in den rechten, daz du selben vorgeschribenn menschen allu vnd allu die kind, die nû hinnenhin iemer mêr von inen koment ald geborn werdent, mit iro liben vnd mit allen iro gutern, wie du genempt ald gehaissen sint, besuchtz vnd vnbesuchtz benemptz vnd vnbenemptz vnd och mit allen iro zugehorden, so inen von recht ald von gewonhait zugehort ald zugehoren sol, an daz vorgeschriben gotzhus ze sant Gallen iemer mêr êweklich gehoren vnd dez aigen sin sont, vnd dâr vmb so haben wir baid vnuerschaidenlich vnd ietwedre besûnder vns frylich vnd willeklich entzigen vnd verzihent vns mit disem brief gantzlich vnd gar fur vns vnd fur alle vnser êrben aller aigenschaft aller lehenschaft aller rechtûng aller kûntschaft aller manschaft aller gewêr lute vnd brief alles besetzens aller recht vordrungen vnd ansprâchen gaistlichs vnd weltlichs gerichtes, so wir ald vnser êrben an den ald zu den vorgeschribenn menschen zu iro lîben ald zu iro gutern oder zu dehainen iro zugehorden ie gehebt hant oder hie nâch iemer mêr gehaben ald gewunnen mochtint, also daz wir noch vnser êrben noch niemant andre an vnser statt noch von vnsern wegen die vorgeschribenn menschen weder ains besûnder noch mêr weder iro libe noch iro guter noch dehain iro zugehorde nû hinnenhin niemer mêr sullent noch wollent ansprechen vftriben bekumberren bekrênken noch in dehain wise beswaren mit dehainerlay gerichten noch ân recht noch mit dehainer besatzûng noch mit dehainen andern sachen ân alle gefarde.Wir haben och baid vnuerschaidenlich gelobt bi vnsern truwen vnd lobent mit disem brief fur vns vnd fur alle vnser êrben, der vorgenempten Ruschen inn Wyden, Elzbethen siner êlicher husfrowen, Hainrichs, Cunratz, Adelhaiten, Elzbethen vnd Katherinen iro kinden, Johansens inn Wyden, Annen siner êlicher husfrowen vnd Hainrichs iro sûns, Elzbethen, Hainr. saligen inn Wyden wilent êlicher husfrowen, Eglolfs, Vlrichs, Johansens, Adelhaiten, Annen vnd Elzbethen ir kinden, Hannins Waltis, Katherinen siner êlicher husfrowen, Johansens, Hainrichs vnd aber Johansens, Bryden vnd Elzbethen iro kinden, Johansen Waltis dez êltern, Elzbethen siner êlicher husfrowen vnd Elzbethen iro tochter vnd dez selben Johansen Waltis sweher, den man nemmet Johans ab Kapf, Elzbethen siner êlicher husfrowen vnd Gesen iro tochter, Johansens, Cunratz, Hugens, Hainrichs vnd Vlrichs der Zimberman gebruder, Elzbethen, Adelhaiten vnd Nesen iro swostern Johansen Zimbermans saligen kind, Johansen Wildens, Elzbethen siner êlicher husfrowen, Elzbethen, Bryden vnd Adelhaiten iro kinden, Hainrichs Zurnen dez eltern, Adelhaiten siner êlicher husfrowen, Clausen, Vlrichs, Johansens, Werlis, Hainr., Elzbethen vnd Annen iro kinden, Hainr. Omlis vnd Adelhaiten siner êlicher husfrowen iro liben vnd iro guter vnd aller iro zugehorden vnd och dez koffes recht wern ze sinne nâch landes recht vnd den êrwirdigen fursten vnsern genadigen herren abt Cunen dâ vor genempt sin nâchkomen vnd daz vorgenant gotzhus vnd die selben ietzgeschribenn menschen, welhi sin notdurftig sint, ir sie ains oder mêr, ân allen iro schaden dâr vmb ze versprechenn vnd ze verstanne vff gaistlichen vnd vff weltlichen gerichten vnd an allen stetten gen aller manglichem, wenn wo ald wie dik su dez nâch dem rechten notdurftig sint oder dâr vmb angesprochen geschadgot oder vfgetriben werdent mit dem rechten, ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so haben wir vorgenempten Eglolf von Altstetten der êlter vnd Eglolf von Altstetten der junger sin êlicher sûn baid vnsru insigel fur vns vnd fur alle vnser êrben offenlich an disen brief gehenket. Der geben wart ze Altstetten in dem jâre, do von Cristi geburt warent druzehenhundert jar, nunzig jâr vnd dâr nâch in dem andern jâre, an dem nahsten mantag nâch sant Laurencien tag.