Wir^a) diz nahgenempten Vt Dietrich Welters¹ elichi tohter Albrehtz von Haidelberg² elichi husfrow vnd L Johans von Haidelberg³ des egenanten Albrehtz elicher bruder veriehent offenlich mit disem brief fur vns L vnd all vnser erben, ob es ze schulden kam, daz der halbtail des pfandschillings Singenberg⁴, L den der egenant Albreht von Haidelberg min elicher huswirt zu minen handen braht^b) vnd mich darvff gewist hat vnd im zu gehort vnd versezt ist von dem erwirdigen gotzhus ze sant Gallen, an mich obgenanten Vten oder an mich Johansen von Haidelberg oder an min erben geuallet, so sollent wir dem hohwirdigen fursten Cunen von gottes gnaden abt des gotzhus ze sant Gallen⁵ sinen nahkomen dem gotzhus vnd iren gewissen botten der losung gestatten vnd wartent sin, wenn oder welhes jares daz an vns gevordrot wirt, an alles verziehen vnd an all geuerd, doch also vor sant Johans tag des Toffers ze sunnwendi mit dem nûtz vnd darnach an nûtz. Vnd des ze warem vrkund aller vorgenanter ding vnd vergiht han ich Johans von Haidelberg da vorgenant min insigel fur mich vnd min erben offenlich gehenkt an disen brief. Won aber ich Vt Albrehtz von Haidelberg elichi husfrow nit aigens insigels han, so han ich mich verbunden vnder des egenanten Albrehtz mines elichen huswirtz insigel, war vnd stat ze halten alles, daz an disem brief ich mich verschriben han, des och ich der selb Albreht von Haidelberg vergich, dz ich min aigen insigel offenlich fur die obgenant Vten min elichen husfrowen offenlich vnd ir erben gehenkt han an disen brief. Geben an dem nahsten zinstag nah sant Gallen tag in dem jar, do man zalt von Cristi geburtt dusent druhundert nuntzig vnd zwai jar.