Wir^a) Cun von gottes gnaden abt des gotzhus ze sant Gallen¹ sant Benedicten ordens in Costentzer bystum, L daz an alles mittel zugehort dem stul ze Rôm, veriehen vnd tunt kund allermenglichem mit disem L brief, daz fur vns kam ze Wil² in vnsers gotzhus statt hut dis tags, alz dirr brief geben ist, der L erber man Johans von Mandach³ genant Hebstrit ze disen ziten rechter geborner vogt vnd pfleger Hainrichs wilent Johansen salgen von Ebnet⁴ eliches suns, vnd offnot da vor vns derselb Johans von Mandach vnd sprach, daz er mit guter vorbetrahtung nach rat vnd vnderwisung des ietzgedahten knaben von Ebnet besten frund vnd ander wiser lut rat an desselben knaben statt vnd von sinen wegen redlich vnd recht fur denselben knaben von Ebnet vnd fur alle sin erben ains vngeuarlichen ewigen kofs verkoft hetti die vogtyen ze Krillberg⁵ vnd ze Buch⁶ mit luten vnd mit gutern vnd mit allen rechten nutzen zinsen sturen vnd diensten vnd gewonhaiten vnd mit allem dem, so an holtz ald an veld ald an dehainen andren dingen benempten ald vnbenempten besuchten ald vnbesuchten ietz oder von alterher dar zu ald dar in von reht ald von gewonhait iendert gehorti, vnd alz su der obgenant Johans salig von Ebnet bi sinem leben genossen vnd vntz an sinen tod inne gehebt hetti, dieselben vogtyen des egenanten knaben von Ebnet lehen von vnserm gotzhus warint, vnd hetti dieselben vogtyen mit allen ietzgenanten rehten vnd mit aller zugehort ze koffent geben dem fromen vnserm lieben Johansen Aster, der och do vor vns ze gegen stund, vnd allen sinen erben vmb zwai vnd viertzig pfund pfenning alles guter vnd genamer Costentzer muns, dero er och aller gantzlich vnd gar an desselben knaben statt gewert vnd bezalt wari an den stetten, da er denselben knaben ab den juden ze Winterthur⁷ gelost vnd sinen wahsenden verderbenlichen schaden mit gewendet vnd verkomen hetti. Vnd nach der offnung vnd vergicht do gaben vns do ze stett der obgenant knab von Ebnet vnd Johans von^b) Mandach die vorgenanten vogtyen ze Krilberg vnd ze Buch mit allen vorgenanten rechten vnd zugehorden ledklich vff an vnser hand vnd baten vns baid ernstlich, daz wir dieselben vogtyen mit allen vorgedahten rehten vnd zugehorden lihen woltent dem obgenanten Johansen Aster ze lehen. Dar vmb erhorten wir ir ernstlich bett vnd lihen do ze stett wilklich vnd wolbedaht vnd lihent och redlich vnd reht mit disem brief dem obgenanten Johansen Aster die obgenanten vogtyen ze Krilberg vnd ze Buch mit allen vorgeschribnen rechten gewonhaiten vnd zugehorden ze lehen an geuard. Vnd nach dem do verzech sich do zestett der obgenant knab von Ebnet offenlich vor vns mit des obgenanten Johansen von Mandach sines vogtes hand gunst vnd willen fur sich vnd fur vnd alle sin erben vnd verzech sich och derselb vogt och mit im fur sich vnd fur sin erben aller aigenschaft aller lehenschaft aller manschaft aller gewer aller kuntschaft aller zugnust lut vnd brief alles tails aller gemaind alles rehten aller rechtung aller vordrung vnd ansprach, so si ald ir erben zu den obgenanten vogtyen ald zu den nutzen mit aller zugehord ie gehatten ald hernach iemermer gewinnen ald erwerben mochtent von reht ald von gewonhait ald von dehainerlay andren sach wegen an geuard. Der obgenant knab von^c) Ebnet lobt och do vor vns mit des obgenanten sines vogtes willen vnd hand vnd och mit siner hand fur sich vnd fur alle sin erben, vnd lobt derselb sin vogt och do mit im fur sich vnd sin erben, der obgenanten vogtyen mit allen vorgedahten rehten nutzen gewonhaiten vnd zugehorden vnd dis kofs des obgenanten Johansen Asters vnd siner erben gen allermenglichem allenthalben, wenn wa ald wie dik si des noturftig sint ald dar vmb mit dem rechten von ieman vffgetriben ald angesprochen werdent, recht wern ze sint nach dem rechten vnd nach des landes sitten vnd gewonhait an geuard. Vnd ist dis alles geschehen mit aller gewarsami worten vnd werken, so dar zu nach vnsers gotzhus reht sitten vnd gewonhaiten darzu gehorten nutz ald noturftig warent vnd alz es billich kraft hat nu vnd hie nach. Vnd des alles ze offem vrkund der warhait so haben wir abt Cun da obgenant vnser insigel offenlich gehenkt an disen brief. Dar nach veriehen wir obgenanten Hainrich Hansen salgen von Ebnet elicher sun vnd Johans von Mandach sin vogt ain gantz warhait aller vorgeschribnen ding, so der hohwirdig vnser gnadiger herr abt Cun von gottes gnaden des gotzhus ze sant Gallen von vns veriehen hat an disem brief. Vnd ze merer sicherhait derselben ding so han ich obgenanter Johans von Mandach min insigel in vogtes wis fur mich vnd fur den obgenanten knaben von Ebnet offenlich gehenkt an disen brief. Der geben ist ze Wil in der statt an dem nahsten zinstag nach sant Martis tag, do man zalt von Cristus geburt druzehenhundert vnd nuntzig iar, dar nach in dem andern jar.