Allen^a) den, die disen brief ansehent lesent oder horent lesen, kund ich Johans Stabiner, den man nempt der Grôss, burger ze sant Gallen vnd vergich offenlich L mit disem brieue fur mich fur alle min erben vnd nachkomen, daz ich mit wolbedahtem mut vnd guter vorbetrahtung daz holtz, das da stat in WiserLtan¹, das ainhalb stosset an min holtz vnd anderthalb an der swestran hofraiti ze Noggersegge², als das selb holtz vsgeschaiden vnd vndermarchot L ist, daz selb holtz vnd alles daz holtz, das hienach iemer vffen dem selben ietzgenanten vsgemarchotem grund vnd boden wahset, redlich vnd reht aines iemer werenden staten ewigen koffes verkoft vnd ze koffenn geben han disen nachgenemten erberen swestran swester Vrsullen Brunnerinen, swester Adelhaiten von Vrnaschen³, swester Cristinen von dem Rin⁴, swester Elzbethen Koffmaninen vnd swester Margarethen von Kesswille⁵, die ze Noggersegge im Tan¹ in gaistlichem schin gesessen sint, vnd allen iren nachkomen, welhi ie dann da selbs vnd vff der selben hofstat im Tân in gaistlichem schin sesshaft werdent ald sesshaft sint, vmb zwai phunt phenning guter Costentzer munse, dero ich gantzlich vnd gar von inen gewert bin vnd enphangen han vnd an minen offenn nutz bewendet. Vnd darumb so han ich mich willeklich verzigen vnd verzich mich mit disem brieue fur mich vnd fur alle min erben gegen den obgenanten swestran vnd gegen allen iren nachkomen aller der reht vordrung vnd ansprachen gaistlichs vnd weltlichs gerihtes aller aigenschaft aller lehenschaft aller kuntschaft aller gewer lut vnd brief aller reht vnd rehtung, so ich oder min erben, ob ich enbin, an dem zu dem vnd von des vorgedahten holtzes wegen, als ez vnder marchot ist, ie gehebt hattent ald hie nach iemer gehaben oder gewinnen mohtint, vsgenomen vnd mir vnd minen erben behalten den grunt vnd den boden, da daz vorgedaht holtz vff stat, vnd daz ich noch min erben noch nieman andre an vnser stat noch von vnsern wegen die obgenanten swestran noch kain iro nachkomen gemainlich noch besunder von des vorgedahten holtzes wegen, ez sie ietz vff dem egenanten minem boden ald es wahse noch hinnenhin iemer daruff, niemer me sullent noch wellent ansprechen vf triben bekunberren bekrenken noch in kain wis beswaren weder mit gaistlichem noch mit weltlichem geriht noch ân geriht noch mit enkainer lay ander sache ân geuarde, doch mir vnd allen minen erben vnd nachkomen vsbedingot vnd behalten den grunt vnd den boden, da das egenant holtz vff stat. Ich han och gelobt mit miner truwe vnd loben mit disem brief fur mich vnd fur alle min erben, des vorgeschribenn holtzes im Tan ân den boden vnd des koffes reht wer zu sinne nach reht vnd och die vorgedahten swestran vnd alle iro nachkomen, alz vor ist beschaiden, darumb ze versprechenn vnd ze verstanne vff gaistlichem vnd vff weltlichem geriht an allen stetten gen aller manglichem ân allen iren schaden, wenn wa vnd wie dik su darumb angesprochen geschadgot oder vf getriben werdent mit dem rehten. Vnd des alles ze offem warem vrkunde vnd ze ainer staten sicherhait aller der vorgeschribenen dinge vnd vergiht so han ich Johans Stabiner da vorgenant erbetten den wolbeschaidenn Johansen Blârrer Pfilippen Blârrers salgen sun och burger ze sant Gallen, daz er sin insigel fur mich vnd fur alle min erben offenlich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, dez och ich obgenanter Johans Blârrer offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten zinstag nach sant Martis tag in dem jâr, do von Cristus geburt warent druzehenhundert jâr, nunzig jâr vnd darnach in dem andern jare.