Ich^a) Cunrat von Schina¹ ze disen ziten trager der lehen, die Elsbeht wilent Eberharts salgen von StrLazz² elichi tohter ze lihent hat, vnd ir vogt vergich vnd tun kund allermenglichem mit disem brief, daz L fur mich kam hut dis tags, alz dirr brief geben ist, die erber ffrow Anna wilent Haini Schmids salgen L von Betwisen³ elichi tohter Johansen Ffriien von Winthertur⁴ elichi wirtenn mit demselben irem elichen man vnd offnot vor mir vnd bewist mich die selb Anna Ffriin, wie daz si vnd der obgenant ir vatter salig von Eberharten von Strass salgen gemainlich ze lehen hettint ain wisen ze Trungen⁵ gelegen, die etwenn Bertschi Rudolfs was vnd die man nempt Rudolfs wise vnd ainhalb stosset an der ffrowen gut von Maggnow⁶ vnd anderthalb an der ffrowen gut von Zouingen⁷, dieselb wis aber nu an si geuallen wari, vnd gab mir dieselb Anna Ffriin die ietzgenant wis mit aller zugehord do zestett ledklich vnd ffrilich vff an min hand vnd batt mich ernstlich, daz ich dieselben wisen mit allen rechten vnd mit aller zugehord an der obgenanten Elsbethen von Strass statt lihen wolti ir vnd dem obgenanten Johansen Ffriien irem elichen man inan baiden gemainlich ze lehen. Dar vmb erhort ich ir ernstlich bett vnd lech do zestett wilklich vnd wolbedaht an der obgenanten Elsbethen von Strass statt vnd lich och redlich vnd recht mit disem brief den obgenanten Johansen Ffriien vnd Annen siner elichen wirtennen inan baiden gemainlich die obgenant wisen mit allen rechten nutzen gewonhaiten vnd mit aller zugehord ze rechtem lehen vnd ze rechter gemaind vnd in gemaind wis vnd recht an geuard, vnd och also, daz die obgenant Anna Ffriin dieselben wisen mit aller zugehord von des ffriien manrechts wegen, daz ich ir hier vber geben han, in lehenswis an allermenglichs sumen vnd widerred inne haben vnd niessen sol in glicher wis vnd in allem rechten, alz ob si ain man vnd ain knab wari. Vnd ist dis alles geschehen mit aller gewarsamin worten vnd werken, so dar zu gehorten nutz ald noturftig warent von recht ald von gewonhait, an geuard. Vnd des alles ze warem offem vrkund so han ich obgenanter Cunrat von Schina min insigel in tragers wis des obgenanten lehens offenlich gehenkt an disen brief. Der geben ist an dem nahsten dunstag nach sant Hylarien tag, do man zalt von Cristus geburt druzehenhundert vnd nuntzig jar, dar nach in dem dritten jar.