Wir^a) Itt von Dockenburg greuinn ze Werdenberg¹ tun kunt aller menglichen vnd verienhen offenlich an disem brief, daz L wir mit guter zitlicher vorbetrahtung vnd rehter vernunfftikait, als ietzt vnd hie nach ze allen ziten kraft vnd maht L han sol vnd mag, gott vnd den hailgen ze ainem lobe vnd eran vnd den selan ze ainem drost vnd och dar vmb, daz L die hailigen werk der erbarmhertzkait an armen luten vnd durfftigen vollebraht werden, luterlich reht vnd redlich ledclich vnd aigenlich ergeben haben an daz spital ze Horw² der stat glegen vnd geben och mit disem brief wissentlich dez ersten vnsern tail dez dorffs ze Saltstetten³ vnd waz wir iender vber al da haben, vnd darzu vnser dorff Althain⁴ mit vnsern rehten vnd waz wir och vber al da haben, vnd also habent wir ietzt mutwillenclich dem vorgenanten spital ze Horw vnd sinen pflegern an sin stat die obgenanten zwai dorffer mit vnsern rehten ietzt mit hande vnd mit munde frilich vffgeben vnd ingeben mit allen nutzen geniessen gewonhaiten rehten vnd zugehorden, als wir sy vntz her gehebt vnd genossen haben, dar vmb dem vorgenanten spital vnd den pflegern an sin stat die vorgenanten dorffer Saltstetten vnsern tail vnd Althain gantzlich nv hinna hin vmer mer mit luten mit gutern mit sturan mit zinsen mit gelten, ez sig korngult oder haller gult, mit vellan mit freflinan mit vogty mit vogtreht mit gerihten mit gewaltsami mit gewer mit ehafti mit husern mit schuran mit hofstetten mit garten mit eggern mit wisan mit mulinan mit mulstetten mit wasser mit wasser laiti mit vischentzen mit holtz mit holtzmarggen mit stigen mit stegen mit wegen, ez sig fundens oder vnfundens benemptz oder vnbenemptz nutzit vzgenomen, mit allen vnsern rehten vnd mit allen irn zugehorden ewenclich ze habenn ze niessenn ze besetzent vnd ze entsetzent geruwenclich an aller menglichs irrung vnd hindernust vnd och in aller der wis, als wir die obgenanten dorffer vnd die lut vnd guter da selbs vntz her gehebt vnd genossen haben. Darzu verzihen wir vns mit disem brief gegen dem obgenanten spital aller reht aller ansprach aller wideruordrung aller zuwartung, so wir zu den egenanten dorffern vnd zu irn rehten, als dauor ist gerett, ie gehattent oder wir oder dehain vnser erbe vnd nachkomen hienach darzu vmer han solten oder gewinnen mohten, ez sig mit reht oder an reht suss oder so. Weri och, ob ietzt oder hie nach dehain brief ander geogt gezogt oder gemeldot wurdi, die dem obgenanten spital von diser obgenanten guter wegen ze schaden mohtin komen vnd vns oder vnsern erben vnd nachkomen ze fromen, die selben brief alle, wie sy genant sint, sagen wir ietzt rehtlos kraftlos vnd tode mit disem brief. Waz och wir vnd vnser erben vnd nachkomen oder ieman ander von vnser wegen wider disen brief oder wider diz gab oder wider vtzit, daz hie verschriben ist, vmer redtint tetint oder furzugint, da soltent wir ze allen ziten an allen stetten an allen gerihten ze allen tagen allwent vnreht han vnd daz obgenant spital vnd sin pfleger an sin stat vnd alle ir nachkomen reht. Vnd dez alles ze offem vnd warem vrkunde vnd daz diz obgenante gab vnd alle egenanten sach vnd geding ietzt vnd hienach dem obgenanten spital vnd sinen pflegern vnd allen irn nachkomen statt vnd war belibin, so geben wir disen brief fur vns vnd alle vnser erben vnd nachkomen besigelt mit vnserm aigenn insigel. Der geben wart an sant Georyen abent, do man zalt von Cristz geburt druzehenhundert iar vnd dru vnd nuntzig iar.