Allen^a) den, die disen brief ansehent lesent oder horent lesen, kunden wir Cunrat Kummer der junger vnd Hainrich Kummer sin bruder Cunrat L Kummers salgen von Herisow¹ êlichen sun burger ze sant Gallen vnd veriehent offenlich mit disem briefe fur vns vnd fur alle vnser erben L vnd nachkomen, daz wir mit ainberem willen mit wolbedahtem mut vnd guter vorbetrahtung zwen mutt korn geltes sant L Galler messes von dem vnd vss dem hof ze Oberwille² gelegen vff dem Honuirst³ vnd vnsern tail vnd vnseru reht des korn zehenden, der vns gat vss dem selben hof ze Oberwille, das selb jarlich korn gelt vnd och der zehend vns an gefallen vnd an erstorben ist von dem obgenanten vnserm vatter salgen, daz selb jarlich korn gelt vnd och der zehend vnser friies aigen was, daruber der ersam Nycolaus Rupreht burgermaister ze sant Gallen vogt ist, mit allen rehten nutzen vnd gewonhaiten vnd mit aller zugehorde, alz es der obgenant vnser vatter salig biz an sinen tod vnd wir bis her vntz vff disen huttigen tag, alz dirre brief geben ist, inne gehebt vnd genossen habent, redlich vnd reht aines staten ewigen koffes verkoft vnd ze koffenn geben haben dem obgenanten Nycolausen Rupreht vnd sinen erben, ob er enwar, vmb nun phunt vnd aht schilling phenning guter Costentzer munse, dero wir gantzlich vnd gar von im gewert sient vnd enphangen haben vnd an vnsern offenn nutz bewendet, daz selbe jarlich korn gelt vnd och den korn zehenden ze Oberwille haben wir im mit allen rehten nutzen vnd gewonhaiten vnd mit aller zugehorde reht vnd redlich geuertgot vnd zu sinen handen braht, alz reht sitte vnd gewonlich waz, vnd darumb so haben wir vns willeklich verzigen vnd verzihen vns mit disem brieue gantzlich vnd gar fur vns vnd fur alle vnser erben des vorgeschribenn korn geltes vnd och des korn zehenden ze Oberwille mit allen rehten vnd zugeorden aller aigenschaft aller lehenschaft aller kuntschaft aller gewer lut vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so wir oder vnser erben, ob wir enwarint, an dem zu dem vnd von des vorgeschribenn jarlichen korn geltes vnd zehenden wegen ie gehebt habent ald hie nach iemer gehaben oder gewinnen mohtint, vnd daz wir noch enkain vnser erben noch nieman andre an vnser stat noch von vnseren wegen den vorgenanten Nycolausen Rupreht noch dehain sin erben noch nachkomen von des vorgeschribenn korn geltes vnd zehenden wegen mit aller zugehorde niemer sullent noch wellent ansprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân reht noch mit enkainer lay ander sache ân alle geuarde. Wir habent och gelobt mit vnseren truwen vnd lobent mit disem brief fur vns vnd fur alle vnser erben, des vorgeschribenn jarlichen korn geltes vnd des zehenden mit aller zugehorde vnd des koffes reht wer ze sinne nach des landes reht vnd och den vorgenanten Nycolausen Rupreht vnd sin erben darumb ze versprechenn vnd ze verstanne an allen stetten gen aller manglichem ân allen iren schaden, wenn wa vnd wie dik su darumb angesprochen geschadgot oder vf getriben werdent mit dem rehten. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so haben wir die vorgenanten Cunrat vnd Hainrich die Kummer gebruder baid fur vns vnd fur alle vnser erben vnseru aigenu insigel offenlich gehenkt an disen brief. Der geben ist ze sant Gallen an der nahsten mitwuchen nach des hailigen crutzes tag, alz es funden ward, in dem jar, do von Costus^b) geburt warent druzehenhundert jâr, nunzig jâr vnd darnach in dem dritten jâre.