Wir^a) Cun von gottes gnaden abt dez gotzhus ze sant Gallen¹, daz an allez mittel zugehord dem stul L ze Rom, veriehent, daz fur vns kam ze Wil² in vnsers gotzhus stat an dem tag, alz dirr brief geben ist, der L beschaiden kneht Ruf Schadler burger ze Lindow³ vnd zogt vns ain offen brief, der besigelt waz mit L dez statammans insigel ze Lindow, der ze end der geschrift besigelt wz, der selb brief wist vnd seit, daz frow Ann Nakkrin dez selben Rufen Schadlers elichi husfrow mit vogt vnd mit fursprechen fur offen geriht komen wari vnd den zehenden ze Henggnow⁴ mit aller zugehord vns vff gesent hett an vnser hand, wie reht vnd vrtail gab, vnd batt vns an dem vnd mit dem selben brief, daz wir den selben zehenden ze Henggnow lihint ir vnd Rufen Schadler ir elichen man vnd iro elichen kinden Rufen, Gerien, Nagger, Wilhelmen vnd Annen ze lehen, dar vmb erhorten wir ir bett vnd lihint der selben Annen Nakkerinun vnd Rufen Schadler ir elichen man vnd ir elichen kinden Rufen, Gerien, Nakker, Wilhelmen vnd Annun den selben zehenden ze lechen vns vnd vnserm vorgenanten gotzhus ze sant Gallen an allen vnsern rehten vnd gewonhaiten gentzlich vnschadlich. Wir habint och der selben frowen Annun Nakk­rin vnd Annun ir elichen tohter die fryhait vnd gnad getan, daz sy den selben zehenden haben niessen besetzzen vnd entsetzzen sond vnd mugent ze gelicher wis, alz ob sy man warint, vnd och mit solichem geding, wen ir ains ab gat von todez wegen, daz denn die andern, die denn in lib sind, den selben zehenden vnd lehen enpfahen sond, alz dikk ez ze schulden kumpt, von vns oder vnsern nahkomen. Vnd dez ze vrkund habent wir abt Cun da obgenant vnser insigel offenlich gehenkt an disen brief. Geben ze Wil in vnsers^b) gotzhus stat an dem nahsten mantag nah dem hailigen tag ze pfingsten in dem iar, do man zalt von Cristi geburt tusent druhundert nunzig vnd in dem drytten iar.