Wir^a) dis nachgenanten Vlrich von Ebersperg¹, Agnes sin elichi wirtenn wilent herr Eglof salgen von Wolfurt² ritters elichi tohter vnd Hainrich von Ebersperg³ iro baider elicher sun veriehen vnd tunt kund allermenglichem mit disem brief, L daz wir allu dru gemainlich vnd vnuerschaidenlich mit guter vorbetrachtung vnd beschaidenhait ainbarlich mit gutem willen nach rat vnd vnderwisung vnser besten frund vnd ander erber wiser lut von vnser kumberhaftin wegen, die wir L in kainen andren weg verkomen mohtent, ains vngeuarlichen vnwiderruflichen ewigen kofs fur vns vnd fur alle vnser erben verkoft haben die burg ze Obern Burren⁴ mit hofstatt mit hofraiti vnd mit allem dem, so dar an vnd dar zu iendert L gehort, vnd och dise nachgeschribnen lut guter vogtyen gericht twing bann pfandschatz vnd anuall. Des ersten der kelnhof ze Obern Burren mit den schupuzzen vnd mit allen andern gutern vnd rechtungen, die dar zu ald dar in iendert gehorent, wie die rechtungen vnd guter genant ald gehaissen sint ald wa die guter gelegen sint. Item die gericht twing vnd bann vnd och die vischitzen mit aller ehafti vnd zugehord, die zu derselben burg ze Obern Burren gehorent. Item der wingart ze Ebersol⁵ vnd der torggel ze Obern Burren. Item die bluwel an der Glatt⁶ ze Buch⁷ mit allen rechten vnd zugehorden. Item ain gutli ze Durstudlen⁸ gelegen. Item ain gutli ze Asperstaig⁹ bi Bruwille¹⁰ gelegen. Item der hof ze Nidern Vtzwille¹¹ gelegen. Item der hof ze Zukkenried¹², den wir vor ziten koft hant von dem Raiser von Costentz mit allen rechten vnd zugehorden. Item vnser tail des holtz im Burwald¹³. Item vnser vierdentail der vogtye ze Nidern Vtzwille mit gerichten mit twingen mit bannen vnd mit aller zugehord. Item vnser halbtail der vogtye vber die kichen^b) ze Obern Burren. Item vnser tail der kamerlehen ze Obernvtzwille¹⁴. Item die manschaft vnd lehenschaft aller lut vnd guter, die wir in dem Turgow furbas von hand lihent oder lihen soltent oder mohtent. Item alle die lut, die wir vff disen hutigen tag, alz dirr brief geben ist, iendert gehebt haben, si sien aigen lehen ald vogtlut, die zu der obgenanten burg ze Burren gehorent, mit lib vnd mit gut vnd mit aller zugehord, wie die lut alle genant ald gehaissen sint ald wa si wonhaft oder gesessen sint. Item der anual vnd allu vnsru recht des gutes genant Tufelsruti⁹ vnd aller andren guter, die herr Albrecht von Bussnang¹⁵ ritter ietz ze libding hat, die an vns vallen soltent oder mohtent, wie die genant ald wa si gelegen sint. Item vnsern tail des kernen geltz, daz wir jarlich von den ietzgedahten gutern, die her Albrecht von Bussnang ze libding hat, ze gewer ingenomen vnd dar von genossen haben. Item der anual vnd allu vnsru rechtung des kelnhofs ze Hennow¹⁶ halbes vnd ains gutlis ze Erizell¹⁷ vnd ains gutlis ze Buch in dem Burwald gelegen, denselben halben kelnhof ze Hennow vnd daz gutli ze Erizell vnd daz gutli ze Buch die ersamen gaistlichen ffrowen vnser lieben mumen die^c) Schenkinen closterfrowen ze Kalkerren¹⁸ ietz ze libding hant. Item alle ander nutz zins vnd guter, so wir in dem Turgow vff hut disen tag, alz dirr brief geben ist, iendert haben, die wir von ieman geledgot ald erkoft haben sid dem zit, daz wir ze dem ersten mit wesen gen Obern Burren kament, wa dieselben nutz zins ald guter iendert gelegen sint ald wie si genant ald gehaissen sint, daz alles vnser lehen gewesen ist von dem hohwirdigen fursten vnserm gnadigen herren abt Cun von gottes gnaden des gotzhus ze sant Gallen¹⁹ vnd von demselben sinem gotzhus. Item darzu alles daz, so wir vff disen hutigen tag, alz dirr brief geben ist, an dehainen nutzen ald zinsen an luten oder an gutern in dem Turgow iendert gehebt haben, daz vnser lehen von dem gotzhus ze sant Gallen gewesen ist, wie die lut ald guter genant ald gehaissen sint oder wa von vns die nutz vnd zins in dem Turgow geuallen vnd gangen sint. Item vnsern tail des pfandschatz des maigerampts ze Scheftnow²⁰, das von dem ietzgenanten gotzhus ze sant Gallen vnser pfand gewesen ist vmb zwai hundert pfund haller. Item vnsern tail des pfandschatz der vogtye ze Scheftnow, die pfand ist von dem hailgen Romschen rich, alz die hoptbrief wisent, die der nachgeschriben Lutolt Schenk²¹ dar vmb inne hat. Vnd haben dis alles, so vor geschriben stat vnd was dar zu vnd dar in gehort, an luten vnd gutern mit gerichten mit twingen mit bannen mit ehafti mit zinsen mit vogtrechten mit sturen mit erschatzen mit erbschaft mit diensten mit vallen mit gelassen mit husern mit hofen mit hofstetten mit hofraitinen mit garten mit akkern mit wisan mit holtz mit veld mit wunn mit waiden mit wasser mit wasserlaitung mit bruggen stegen vnd wegen vnd mit allen rechten nutzen zinsen gewonhaiten vnd mit allem dem, so zu disem allem ald zu iro dehainem besunder von recht ald von gewonhait iendert gehort, besuchtem vnd vnbesuchtem, es sye ietz funden oder es werd hienach funden, wie daz alles genant ald gehaissen ist, es sye mit worten an disem brief begriffen oder nit, vnd alz vnser vordern vnd och wir daz vntz har gehebt genossen vnd bracht haben, also redlich vnd recht ze koffent geben dem ffromen vnserm lieben ohan Lutolt dem Schenken von Landegg vnd allen sinen erben vmb sehszehen hundert gemainer guldin guter an gold vnd volswarer an der gewiht, dero wir aller gantzlich vnd gar nach vnserm nutz vnd willen von demselben Lutolt Schenken an barem beraitem gelt gewert vnd bezalt syen an den stetten, da wir vnsern vnd vnser erben gemainen nutz dar mit geschaffot haben. Vnd haben demselben Lutolt Schenken vnd sinen erben die obgenant burg ze Obern Burren mit lut vnd gutern vnd alle andru obgenanten guter vogtyen gericht twing vnd bann pfandschatz anuall vnd alles daz, so hie vor geschriben stat, mit allen vorgedahten rechten vnd mit aller zugehord ledklich vnd frilich fur vns vnd fur alle vnser erben vffgeben vor dem obgenanten vnserm gnadigen herren abt Cun von gottes gnaden des gotzhus ze sant Gallen, do er ze Wil²² in siner gotzhus statt in sinem hof vmb dis sach offenlich ze gericht sazz, vnd haben daz zu sinen vnd zu siner erben handen vnd gewalt wir obgenanten Vlrich vnd Hainrich von Ebersperg mit vnsern handen vnd ich obgenante Agnes von Wolfurt mit miner hand vnd mit mines lieben bruders Rudolfs von Wolfurt, der mir mit des ietzgenanten mines elichen mans willen vor dem egenanten abt Cunen minem gnadigen herren mit gericht vnd vrtail vber dis sach ze uogt geben wart, rat willen vnd hand geuertgot vnd si des in nutzlich gewer gesetzt, alz recht sitt vnd gewonlich was vnd alz nach des obgenanten vnsers gnadigen herren abt Cunen des gotzhus ze sant Gallen frag mit gemainer vrtail ertailt wart. Vnd wan wir disen kof also redlich vnd recht fur vns vnd fur vnser erben gegen dem obgenanten Lutolt Schenken vnd gegen sinen erben vnd nachkomen getan vnd volfurt haben, dar vmb so haben wir vns allu dru gemainlich vnd vnuerschaidenlich vnd vnser iekliches besunder fur vns vnd fur alle vnser erben vnd nachkomen hin in des obgenanten Lutolt Schenken vnd in siner erben vnd nachkomen vnd in aller der hand vnd gewalt, den si daz verkoffent schaffent fugent ald gebent von friem willen ledklich vnd ffrilich, verzigen vnd entwert vnd verzihent vnd enwerent vns och redlich vnd recht mit disem brief aller aigenschaft aller lehenschaft aller manschaft aller gewer aller besatzung aller kuntschaft aller zugnust lut vnd aller briefen. Also verr war, daz wir oder vnser dehaines besunder oder vnser erben oder ieman andra, wer der war, dehainen brief ald handuesti von der obgeschribnen burg ze Obern Burren mit aller zugehord ald von oder vber dehain andru vorgeschribnen ding ietzo hettint ald hienach von vns ald von ieman anderm funden wurdent, die daz alles ald dehaines besunder an rurtent, dieselben brief alle sollent wir vnuerzogenlich zu des obgenanten Lutolt Schenken oder zu siner erben oder nachkomen handen keren vnd antwurten, wa aber wir daz nit also tatent, wa ald an welhen stetten ald gerichten derselben briefen dann dehainer gezogt geoffnot verhort oder gelesen wurdi, da sont si alle gantzlich tod gewust vnd kraftlos sin vnd ensont noch mugent vns noch vnsern erben noch nieman anderm furbas dehainen nutz noch ffromen bringen noch dem obgenanten Lutolt Schenken noch dehainen sinen erben noch nachkomen furbas kainen schaden noch gebresten beren, wan wir die alle tot verwust vnd kraftlos sagent mit disem gegenwirtigen brief. Dar zu haben wir vns verzigen alles rechten gaistlichs vnd weltlichs gerichts alles tails aller gemainschaft aller rechtung vordrung vnd ansprachen alles furzugs vnd vsszugs vnd aller andren sachen vnd geuarden, dar mit wir ald vnser dehaines ald vnser erben ald ieman andra von vnsern wegen die obgenant burg mit lut vnd mit gutern vnd mit aller zugehord ald dehain ander vorgeschriben ding ald den hof ze Buchs ald die manschaft vnd lehenschaft desselben hofs mit aller zugehord ald die nutz, so hie von geuallent, gantzlich ald an dehainem tail ald den obgenanten Lutolt Schenken ald dehainen sinen erben ald nachkomen von diser vorgeschribnen ding dehaines wegen iemer mer kunden ald mohtent vffgetriben ald angesprechen bekumbern ald bekrenken ald dar mit wir wider dehainu ding, so hie vor vnd hie nach an disem brief geschriben stant, in dehin^b) wis kundent ald mohtent getun ald schaffen getan, an geuard, wan och wir lieblich vnd fruntlich mit demselben Lutolt Schenken fur vns vnd vnser erben verricht syen vmb alle stozz misshellung vordrung vnd ansprachen, so wir zutz im ald mit im ie^d) gehebt haben vntz vff disen tag, alz dirr brief geben ist, von des obgenanten hofs wegen ze Buhs ald von dehainerlay andren sach wegen, an geuard. Wir sollen vnd geloben och mit disem brief fur vns vnd fur alle vnser erben, die wir vesteklich herzu bindent, der obgenanten burg ze Obern Burren mit aller zugehord vnd aller obgenanter hof lut guter vogtyen gericht twing bann pfandschatz anvall vnd aller vorgeschribnen ding mit allen vorgedahten rechten vnd mit aller zugehord des obgenanten Lutolt Schenken vnd siner erben gen allermenglichem allenthalben vff gaistlichen vnd vff weltlichen gerichten recht wern ze sint nach dem rechten vnd nach des landes sitten vnd gewonhait, wenn wa ald wie dik si des noturftig sint oder dar vmb mit dem rechten von ieman vffgetriben ald angesprochen werdent, daz wir vnd vnser erben in vnd sin erben vnd nachkomen dar vmb nach dem rechten verstan versprechen vnd si von der ansprach an allen iren schaden an furzug vnd widerred entrihen vnd ledig machen sollent bi guten truwen, so wir dar vmb gelobt haben, an geuard. Taten wir des nit also, wie ald in welhe wis ald weg er ald sin erben ald nachkomen des vnd hie von ze schaden koment, den schaden allen sollen wir vnd vnser erben inan ablegen vnd vssrichten vnuerzogenlich an widerred. Beschach daz nit, so hat der obgenant Lutolt Schenk vnd sin erben vnd nachkomen vnd alle ir helfer, wer die sint, vollen gewalt vnd recht vnd fries vrlob, vns vnd vnser erben vmb denselben schaden vffzetribent ze heftent ze notent vnd ze pfendent an allen vnsern luten vnd gutern ligenden vnd varenden, wenn wa ald wie si went kunnent ald mugent mit gerichten ald an gericht an clag vnd an allen zorn alz vil vnd alz lang, vntz daz inan allweg aller der schad, den si dar von enpfangen hant, gantzlich vnd gar an allen iren schaden dar mit vssgericht vnd abgelait wirt. Vnd sol vns noch vnser erben noch vnser lut noch guter hie vor noch hie wider nit schirmen noch nutz noch gut sin dehain fryhait noch gnad dehain recht gaistlichs noch weltlichs dehain burgrecht burgerrecht aidgnosschaft buntnust gesetzt noch gewonhait der herren der stett noch des landes noch dehain sach furzug noch vsszug, so ieman erdenken kan, an geuard, wan wir vns des alles ledklich verzigen^e) hant. Vnd des alles ze offem vrkund der warhait vnd ze ainer bestaten sicherhait so haben wir obgenanten Vlrich von Ebersperg, Agnes von Wolfurt sin elich frow vnd Hainrich von Ebersperg ir sun allu dru vnsru insigel fur vns vnd fur alle vnser erben offenlich gehenkt an disen brief. Dar nach vergich ich obgenanter Rudolf von Wolfurt der obgenanten Agnesen miner swoster vogt in dirr sach ain gantz warhait aller vorgeschribnen ding, so von mir an disem brief geschriben stant, vnd daz dieselb Agnes min swoster disen kof dis vertgung vnd allu vorgeschribnen ding mit miner hand rat willen vnd gunst in aller wis, alz vor geschriben stat, getan volbracht vnd volfurt hat. Des ze warem offem vrkund so han ich och min insigel in vogtes wis offenlich gehenkt an disen brief. Der geben ist ze Wil in der statt an der nahsten mitwochen nach vnser lieben ffrowen tag ze der liehtmizz, do man zalt von Cristus geburt druzehenhundert vnd nuntzig jar, dar nach in dem vierden jar.