Allen^a) den, die disen brief ansehent lesent oder horent lesen, tun ich Jacob Schmidli von Liehtenstaig¹ kund vnd vergich offenlich mit disem brief fur mich vnd all min erben, L dz ich mit guter vorbetrahtung vnd beschaidenhait funfthalben mut kernen gutes vnd vngeuarliches Wiler² messes vnd sibenzehen schilling pfenning Costentzer muns L vssgandes vnd ewiges jarliches geltes ab vnd vsser dem hof ze Brunberg³, dz ich ze lehen gehebt han von dem erwirdigen gotzhus ze sant Gallen, reht vnd redLlichen ains ewigen iemer werenden vnwiderruffenden kofs verkoft vnd ze koffen geben han dem hohwirdigen fursten abt Cun ze sant Gallen⁴ sinen nachkomen vnd dem gotzhus vmb nunzig pfunt guter vnd Ytaliger haller, der ich och gantzlich von im gewert bin vnd an minen offen nûtz bewendet, vnd han dz selb jarlich vnd vssgand ewig gelt ab vnd vsser dem vorgeschriben hof ze Brunberg dem obgenanten minem gnadigen herren abt Cun an sin hand vnd zu sinen siner nachkomen vnd sines gotzhus handen braht vffgeben vnd geverget vnd och in liplich nûtzlich gewer gesetz, alz reht sitt vnd gewonlich wz vnd craf vnd maht haben solt vnd moht ietz vnd hienach, mit der beschaidenhait, dz der obgenant min gnadiger herr abt Cun vnd sin nachkomen dz vorgenant iarlich vnd ewig vssgandes gelt ab kernen vnd ab pfenningen ab vnd vsser dem vorgenanten hof ze Brunberg nû hinnan hin vnd ewiklich innemen haben vnd niessen sond an minen vnd vnd miner erben vnd allermenglichs von vnser wegen sûmen vnd hinderren, vnd darvmb so han ich mich verzigen vnd verzich mich och mit disem brief fur mîch vnd all min erben redlich vnd reht zu dem selben minem gnadigen herren abt Cun vnd siner nachkomen vnd ze des vorgeschribnen gotzhus handen aller aigenschaft aller lehenschaft aller kûntschaft aller gewer aller besazzung aller zugnust lut vnd brief, die ich von des vorgenanten jarlichen vnd vssganden geltes an kernen vnd an pfenningen ietz han gehebt oder min erben hienach iemer darzu gewinnen mohten, aller vordrung vnd ansprach aller reht vnd ^b) rehtung, die ich an dem vorgenanten jarlichen gelt ie gehebt han oder min erben noch gewinnen mohten, alles gaistliches vnd weltliches gerihtes, damit ich oder min erben oder ieman ander an vnser statt vnd von vnser wegen den vorgenempten minen gnadigen herren abt Cun sin nachkomen vnd dz gotzhus an dem selben jarlichen gelt bekumberren oder an gesprechen mohten in dehain weg, an all geuard. Ich han och gelobt bi guten truwen vnd loben mit disem brief fur mich vnd all min erben, des vorgenanten jarlichen geltz ab kernen vnd ab pfenningen vnd och diz kofs reht wer ze sin nach lehens reht fur allermenglichs ansprechen gaistlicher vnd weltlicher lut vnd gerihtes vnd den obgenanten minen gnadigen herren abt Cun sin nachkomen vnd dz gotzhus darvmb ze versprechen vnd ze verstan mit dem rehten, alz dik^c) darvmb angesprochen werdent, an allen iren schaden. Vnd des ze vrkund aller vorgenanter ding han ich Jacob Schmidli da vorgenant erbetten die beschaidnen Wernher den Keller schulthaizzen ze Liehtenstaig vnd Johansen Aichernen amptman miner gnadigen herschaft von Tokkenburg, dz si ir aignu insigel fur mich vnd all min erben offenlich gehenkt hand an disen brief, won ich aigens insigels nit enhan, des och wir die ietzgenempten Wernher der Keller schulthaizz ze Liehtenstaig vnd Johans Aichern vergehent, dz wir von ernstlicher bett wegen des vorgenempten Jacob Schmidlis vnsri aignen insigel fur in vnd sin erben ze ainer zugnust diser vorgenanter ding vnd vergicht offenlich gehenkt^d) an disen brief doch vns vnd vnsern erben gantzlich vnschadlich. Geben an sant Mathies tag des zwelfbotten in dem jar, do man zalt von Cristi geburt tusent druhundert nunzig vnd vier jar.