Allen^a) den, die disen brief ansehent lesent oder horent lesen, kund ich Ôthmar Wildrich burger ze sant Gallen vnd vergich offenlich mit disem brieue fur mich fur alle min erben vnd L nachkomen, daz ich mit wolbedahtem mut vnd guter vorbetrahtung nach miner frunde vnd nach ander erber lut rat vnd och von miner redlicher not wegen daz gut, das L man nempt Pfawen mos, den wingarten, der darzu gehort, vnd ainhalb stosset an die strasse, die gen Stainach gat, vnd anderthalb an daz holtz, das ze Stainach bi der L burg lit, mit hus mit hof mit stadel mit torggel mit reban mit rebstal mit bongarten mit akker mit wisen mit wasen mit zwi mit holtz mit veld mit grunt mit grat mit stok mit stain mit wunn mit waiden mit allen rehten nutzzen vnd gewonhaiten vnd mit allem dem, so darzu ald darin gehort von reht ald von gewonhait, ez sie genemptz oder vngenemptz gesuchtz oder vngesuchtz wissentz oder vnwissentz, redlich vnd reht aines iemerwerenden staten ewigen koffes verkoft vnd ze koffenn geben han dem wolbeschaidenn Peter Vogel dem kupfersmit och burger ze sant Gallen vnd sinen erben, ob er enwar, vmb hundert phunt drissig phunt siben phunt vnd vmb zehen schilling phenning alles guter Costentzer munse, dero ich gantzlich vnd gar von im gewert bin vnd enphangen han vnd an minen offenn nutz bewendet, das selb gut wingart hus stadel torggel vnd bongart mit aller zugehorde min lehen was von dem erwirdigen vnser frowen gotzhus ze Costentz, dannen ich im och das selb gut wingarten hus hofstat stadel torggel akker wisen vnd bongarten genant Pfawen mos mit allen rehten nutzzen vnd gewonhaiten vnd mit aller zugehorde reht vnd redlich geuertigot vnd zu sinen handen braht han, alz reht sitte vnd gewonlich waz vnd alz es kraft vnd maht sol vnd mag han, vnd sunderlich mit solicher beschaidenhait vnd in dem rehten, das man daz vorgeschriben gut vnd wingarten genant Pfawen mos mit aller zugehorde lihen sol frowen alz mannen tohtren alz knaben, wenn vnd als dik es ze schulden kumpt, ân geuarde, vnd das och von dem selben gut vnd wingarten genant Pfawen mos vnd waz darzu gehort noch darab kainer lay ander rehtung gang noch gan sulle danne aller jarlich zwen schilling phenning Costentzzer munse gen Arbon an die lutkylchen, vnd von dem vnd ab dem akker gelegen hinderm hus, der wilunt gehort zu der closterfrowen von sant Katherinen¹ gut, daz man nempt Frankenruti², aller jarlich ain mutt guter vnd vngefarlicher vesan sant Galler messes den egenanten closterfrowen von sant Katherinen closter gelegen ze sant Gallen in der vorstat ze rehtem jarlichem zins vnd niht anders weder zins noch zehend noch kainer lay ander rehtung. Vnd darumb so han ich mich willeklich verzigen vnd verzich mich mit disem brief gantzlich vnd gar fur mich vnd fur alle min erben des vorgeschribenn gutes vnd wingarten genant Pfawen mos mit aller zugehorde aller aigenschaft aller lehenschaft aller kuntschaft aller gewer lut vnd brief alles vszugs alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben, ob ich enbin, an dem zu dem vnd von des vorgeschribenn gutes vnd wingarten wegen genant Pfawen mos vnd waz darzu gehort ie gehebt habent ald hie nach iemer gehaben oder gewinnen mohtint, vnd das ich noch dehain min erben noch nieman andre an vnser stat noch von vnseren wegen den vorgenanten Peter Vogel noch dehain sin erben noch nachkomen von des vorgeschribenn gutes vnd wingarten wegen genant Pfawen mos vnd waz darzu gehort niemer sullent noch wellent ansprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân reht noch mit enkainer lay ander sache ân alle geuarde. Ich han och gelobt mit miner truwe vnd loben mit disem brieue fur mich vnd fur alle min erben, des vorgeschribenn gutes vnd wingarten genant Pfawen mos mit allen rehten vnd mit aller zugehorde, alz vorgeschriben stat, vnd och des koffes reht wer ze sinne, vnd han im daruber zu mir ze besser sicherhait ze rehten wern geben vnd gesetzt die ersamen Bernhart den Blarrer vnd Gerwig den Payger baid burger ze sant Gallen, die hant im baid gemainlich mit mir gelobt willeklich mit iren truwen, des vorgeschribenn gutes vnd wingarten genant Pfawen mos mit allen rehten vnd zugehorden vnd des koffes reht wer ze sinne nach des landes reht vnd och den vorgenanten Peter Vogel vnd sin erben darumb ze versprechenn vnd ze verstanne an allen stetten an allen gerihten gen aller manglichem ân allen iren schaden, wenn wa vnd wie dik su des bedurffent ald darumb von ieman angesprochen geschadgot oder vf getriben werdent mit dem rehten inwendig dem zil, als wir des vorgeschribenn gutes vnd wingarten mit aller zugehorde vnd des koffes von reht wer sullent sin. Ich Ôthmar Wildrich da vorgenant han och gelobt fur mich vnd alle min erben, den obgenanten wern iren schaden gantzlich ab ze tunne, in den su koment von der vorgeschribenn werschaft vnd gelubt wegen. Vnd des alles ze offem warem vrkunde vnd ze ainer staten sicherhait aller der vorgeschribenn dinge vnd vergiht so han ich Ôthmar Wildrich da vorgenant fur mich vnd fur alle min erben min aigen insigel offenlich gehenkt an disen brief. Darnach veriehent wir die obgenanten wern Bernhart Blârrer vnd Gerwig Payger ainer gantzen warhait aller der dinge, so von vns an disem brief da vorgeschriben stant, vnd des ze besser sicherhait der selben dinge so haben wir och vnseru aigenu insigel offenlich gehenkt an disen brief. Der geben ist ze sant Gallen in dem jar, do man von Cristus geburt zalt druzehenhundert jâr, nunzig jâr vnd darnach in dem vierden jâre, an dem nahsten donstag nach sant Mathias tag des hailigen zwelfbotten.