Ich^a) Engelhart herre zu Winsperg² miner genedigen herschaft von Osterich etc. lantuogt tun kvnt, als etwz stozz vnd L misshellvng sint zwischent dem erwirdigen herren hern Ludwigen von gotz gnaden abt des gotzhus zu den Einsideln³ L an einem teil vnd den erbern den burgern von Rappraswile⁴ von der iren wegen an dem andern teil, dieselben stozz L aber dar ruerent von der vachern hurden vnd vischentzen wegen gelegen zwischent Rappraswile vnd Hurden⁵, dar vmb aber vormals von minem stathalter minem svnder guten frund graff Rudolfen von Sultz⁶ dem erbern vesten Rudolfen von Bonstetten⁷ enpfolhen was ein kvntschaft ze verhorenn, die kvntschaft von beyden teiln er verhort hat vnd fur mich vnd dis nachgeschriben miner herschaft rat bracht, des selben Bonstetters red vnd kvntschaft wir och verhort habent, die aber nit volendet noch vsgetragen ist, als dz billich gewesen werre, vnd nach aller red vnd sach so habent ich vnd miner herschaft rat dem obgenanten Rudolfen von Bonstetten enpfolhen, das er tag dar vmb fur sich beyden teiln bescheiden sol nach disen nechsten ostrenn, wenn im dz fugklich ist, vnd ir kvntschaft verhoren, also dz sy nieman ze liep noch ze leid ein warheit dar vmb sagen sollent, als sy got dar vmb antwirten wellent, vnd darnach des sweren liplich eyd zu den heiligen, in welicher mazze vnd mit welhem sitten vnd gewonheit die obgenanten vacher hurden vnd vischentzen herkomen vnd bracht sijen, also mit den gedingen, dz vmb die selben sach vnd stozz in derselben kvntschaft nieman sagen sol denne solich lut, die da denn die nechsten anstozzer sint vnd die an den vachern hurden vnd vischentzen weder teil noch gemain dar an habent. Vnd wenn das verhoren der kvntschaft von dem egenanten Bonstetter beschicht, so sol er dz fur mich oder minen stathalter bringen vnd sol ich oder min stathalter denn da beyden teiln tag fur mich vnd miner herschaft rat verkunden vnd aber denne nach der kvntschaft beschehen, dz recht sy, ane geuerde. Vnd sint dis die rat der edel wolgeborn herre graff Hans von Habspurg⁸ vnd der edel frije Wilhelm von End⁹, die erbern vesten ritter hern Herman von Gruenenberg¹⁰, hern Hans von Bodmen¹¹ der eltest, hern Hans vnd aber hern Hans die truchsezzen von Diessenhofen¹² geuettern vnd hern Heinrich Gessler¹³, Rudolf von Bonstetten, Herman von Bubendorf¹⁴ vnd Hans Krie­ch der elter. Vnd des ze warem offenne vrkund so gib ich nach erkantnuss vnd nach rat miner herschaft rat disen brief besigelt mit minem anhangendem insigel. Der geben ist ze Baden¹⁵ an dem nechsten fritag vor dem palm tag nach Cristus geburt druzehenhvndert vnd nuntzig jar, dar nach in dem vierden jare.