Wir graff Fridrich von Tockkenburg¹ graff ze Brettengo² vnd ze Thauass³ thund kund offenlich mit vrkund dis brieffs allen den, die in ansechent lesent oder horend lesen, von der stos vnd mißhallung wegen, so die von Jenatz⁴ vnd die zu inen gehorendt ze einem vnd die Walser ab Dannusen⁵ vnd die zu inen gehorent ze dem andren teil mit ein andren gehebt hond von der weid wegen, das sich da fur vns mit rechter kuntschafft vnd gedingen recht vnd redlich enpfunden hat, das die vorgenampten Walser ab Dannusen vff die vorgenampten von Jenatz an kainist triben noch weiden sond an ir gunst vnd willen denn biß an die marckstain, die zwuschent iren gutren baidenthalb gesetzt vnd usgemarchet sind, als vonn alter her komen ist. Da hond wir zwuschent beiden theilen gebatten, war das sich detheines jares fugte ald solich jar gang kammt, das es notturfftig wurdi, das die von Dannusen von ir not wegen furbas weid bedorfftint denn biß an die vorgenampten marckstain, das sond sy nit anderst tun denn mit willen vnd gunst der vorgenampten nachburen von Junatz, also das sy sond suchen an einem der von Jenatz amman vnd an die nachburen ze Junatz, das sy insachint iren gebresten vnd inan gunnint furbas zu weiden so vil zits, als sy dann uber ein komint ald noturfftig wyrd. War aber das die von Jenatz ze streg weltent sin vnd es doch denen von Dannusen notturfftig war, so sond die von Dannusen komen fur vnß vnd sond vns iren gebresten da erzellen vnd sond wir das denn an die nachburen bringen vnd die bitten, das sy inen furbaß gunnint ze weiden etwie uil zitz als es sich denn fugt, das die von Dannusen ouch ein notturfft weid mugint haben, vnd sond och die vordrung vnd bit thun vor allem schaden, das sy dar vmb meinant beschalkent noch vnrecht thun sond, vnd wenn vnd wie uil zits es ynan gunnen wirt vnd die von Junatz des erbetten werdentt, die seben zit sond die von Dannusen denn vngeuarlich vnd on alle geuard weiden bis vff die selben zil, als sy inen gunnen habent, vnd nit furbas an alle geuard mit so uil fichs, als sy gewintret habent, vnd mit kainem zu genomen vich. Weer ouch das dethein vich vngeuarlich fur die weiden luff, als ver sy denn weiden sond vnd das beschach ane geuard, dar vmb sol niemann dem andren zu sprechen. War ouch das die von Dannusen dethein how ald gadenstat detheines jares koufftint, das sond^a) mayen vnd howen vnd etzen der vorgenampten nachburen von Jenatz an ir weiden vnschadlich, vnd die beett vnd das gunnen das sol denen von Junatz an iren rechten vnd gutten gewonhaitten gantzlich an schaden sin, vnd war das wader theil an dem^b) andren uberfur anders denn hie vor geschriben statt oder ist, es war das da yeman beschalket oder mit geueerden furbaß geweidet wurd oder mitt detheinen sachen furbas vberfaren wurd, vnd vff wedrem theil sich das erfintt vnd kuntlich wirt, der ist ze geben ferfallen vnd gebunden zechen pfund pfennig Costantzer muntz, als dick vnd vil das beschicht. Vnd des zu vrkund vnd ze merer sicherheit aller vorgeschribner ding vnd geding hand wir grauff Fridrich von Dockenburg da vorgenampt vnser insigel offenlich gehenckett an disen brieff. Der geben ist ze Castell⁶ in vnser vesty an sant Jeorien abent in dem jar, do man zalt von Cristus geburt druzechen hundert jar vnd nuntzig jar vnd darnach in dem fierden jar.