Allen^a) den, die disen brief ansehent lesent oder horent lesen, kund ich Andres Entzziswiller burger ze sant Gallen vnd vergich offenlich mit disem brieue L fur mich vnd fur alle min erben vnd nachkomen, das ich mit wolbedahtem mut vnd guter vorbetrahtung dem beschaidenn kneht Johansen Maiier L von Ranwille¹ reht vnd redlich verlihen han vnd lich im vnd allen sinen erben mit vrkund diz brieues frowen mannen tohtren alz knaben den hof geLlegen ze Ranwille, den man nempt der Entzziswiller hof, der min lehen ist von dem erwirdigen gotzhus ze sant Gallen, mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit strassen mit wasser mit wasserflussen vnd gengen mit allen rehten vnd mit aller zugehorde ze ainem rehten staten erbzinslehen vmb ainen staten zins, vnd han och darumb von im willeklich genomen vnd enphangen druzehen phunt vnd zehen schilling phenning, die in minen offenn nutz komen vnd bekert sint, mit solicher beschaidenhait vnd in dem rehten dinge vnd gedinge, daz der selb vorgenant Johans Mayger vnd sin erben, ob er enwar, den vorgeschribenn hof ze Ranwille, den man nempt der Entzziswiller hof, mit allen rehten vnd mit aller zugehorde in erân vnd vnwustklich haben niessen vnd buwen sont nach erblehens reht, vnd sont mir vnd allen minen erben vnd nachkomen von dem selben hof hinnenhin aller jarlich ie ze sant Gallen tag vier malter vesan vnd ain malter haber alles gutes vnd vngevarliches kornes Byschoffzeller² messes vnd vier herbst hunr vnd darnach aller jarlich ie ze dem hailigen abent ze ostran hundert aiger ze rehtem jarlichem zins ân furzug ân alle minrung vor aller manglichem vnd ân allen vnsern schaden ze sant Gallen in der stat geben rihten vnd antwurten. Ez ist och mit namen beredt vnd bedingot, beschach daz ich oder min erben ald nachkomen dehaines jares von vnseren rehten des vorgeschribenn hofes ze Rânwille gan vnd die verkoffen woltint gantzlich oder in dehainen tail, das ich danne oder min erben ald nachkomen dem obgenanten Iohansen Maiger oder sinen erben, ob er enwar, ald iren nachkomen die selben vnseru reht des ersten vail bieten vnd vor manglichem ze koffenn geben sullent funf schilling phenning guter Costentzzer munse naher dann ieman andre, ob su si koffen wellent, war aber, daz su si niht koffen woltint ald mohtint, so mugent wir dannenhin die selben vnseru reht wol ze koffenn geben, wem wir wellent, doch inen an allen iren rehten gantzlich vnschadlich. Des selben glich ist och beredt vnd bedingot, beschach daz der obgenant Iohans Maiger oder sin erben ald nachkomen dehaines jares von iren rehten des vorgeschribenn hofes vnd erblehens gan vnd die verkoffen woltint gantzlich oder in dehainen tail, so sont su mir oder minen erben ald nachkomen die selben iru reht des ersten vail bieten vnd vor manglichem ze koffenn geben och funf schilling phenning guter Costentzzer munse naher dann ieman andre, ob wir su koffen wellent, war aber, daz wir su niht koffen woltint ald mohtint, so mugent su dannenhin die selben iru reht wol ze koffenn geben, wem su wellent, doch mir vnd allen minen erben vnd nachkomen an allen vnseren rehten gantzlich vnschadlich, vnd wem su och danne die selben iru reht ze koffenn gebent, dem selben vmd sinen erben sullen ich vnd min erben ald nachkomen den vorgeschribenn hof ze Ranwille, den man nempt der Entzziswiller hof, mit aller zugehorde ân furzug vnd ân alle geuarde lihen in dem zins vnd in allen den rehten dinge vnd gedinge, alz ich in ietz dem obgenanten Iohansen Maiger verlihen han. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so han ich Andres Entzziswiller da vorgenant fur mich fur alle min erben vnd nachkomen min aigen insigel offenlich gehenkt an disen brief. Der geben ist ze sant Gallen an sant Johans abent des Toffers ze sunnwendi in dem jar, do man von Cristus geburt zalt druzehenhundert jar, nunzig jar vnd darnach in dem vierden jare.