Wir^a) ffrow Clement grafenn von Tokkenburg¹ wilent herr Hainrich saligen herren^b) ze Hewen elichi frow vnd Peter herre L ze Hewen² ir sun veriehent vnd tund kund allermangklichem mit disem brieue, das fur vns kament hutt dz tags, alz dirre L brief geben ist, die beschaidnen Ffrantz vnd Hainrich die Meggen gebruder burger ze Wil³ vnd offnoton vor vns vnd sprachent, dz L si baid gemainlich vnd wolbedaht von iro kumberhaffti wegen redlich vnd reht fur sich vnd all ir erben verkofft hettin ain wisen vnder der muli ze Rikkenbach⁴ gelegen, die vndan stosset an Vli Schnetzers wisun vnd obnan stosset an Vlrich Gublers wisen, mit graben mit wasen mit wasser mit wasserlaytung mit grund mit grat vnd mit allen rehten nutzzen zinsen gewonhaiten vnd mit allem dem, so zu der selben wisun an dehainen dingen iendert gehort vnd als si vnd ir vatter salig die vntz her inne gehebt vnd genossen hettin, die selb wis von vns iro reht lehen wari, vnd hettint die aines vngeuarlichen ewigen koffs ze koffenn geben den erberen luten Vlin von Hofen burger ze Wil vnd Annen Ledergarwinen Hainrichs Ledergerwen elichen frowen siner swoster tohter, die do ze gegen stundant, inan baiden gemainlich vnd vnuerschaidenlich vnd allen iren erben vmb nun vnd funfzig pfund pfenning alles guter vnd genamer Costentzer muns, dero si och aller gantzlich vnd gar gewert vnd bezalt warin, vnd nah der offnung vnd vergiht do gaben vns do ze stett die obgenanten Ffrantz vnd Hainrich die Meggen die obgenanten wisen mit aller zugehord baid ledklich vnd frilich vff an vnser hand vnd baten vns die lihen den obgenanten Vlin von Hofen vnd Annen Ledergerwinen siner swoster tohter inen baiden gemainlich ze rehtem lehen vnd ze rehter gemaind. Darvmb erhorton wir gnadklichen iro bett vnd lihent do ze stett wissentlich vnd wolbedaht vnd lihent och redlich vnd reht mit disem brieue den obgenanten Vlin von Hofen vnd Annen Ledergerwinen baiden gemainlich vnd vnuerschaidenlich die vorgenant wisen mit aller zugehord ze rehtem lehen vnd ze rehter gemaind vnd in gemaind wis vnd och also, das die obgenant Anna von besundren gnaden vnd von dez volkomnen fryen manrehtes wegen, so wir ir hiervber geben haben, die selben wisen mit aller zugehord an mangklichs sumen ierren vnd widerred inne haben niessen besezzen vnd entsezzen sol vnd mag in allem rehten, alz ob si ain man war, vnd nah dem do verzigent sich do die vorgenanten Ffrantz vnd Hainrich Meggen offenlich vor vns vnd verzihent vnd entwerrent sich mit disem brief fur sich vnd ir erben gen dem vorgenanten Vlin von Hofen vnd Annen siner swoster tohter vnd allen iren erben aller aigenschafft aller lehenschafft aller manschafft aller gewer aller kuntschafft aller zugnust lut vnd brieuen alles tails aller gemaind alles gaistlichen vnd weltlichen gerihtes aller reht vordrung vnd ansprach, so si oder ir erben oder ieman ander von ir wegen an der vorgenanten wisen ietz hatten oder noch in dehain weg gehaben mohten an geuerd, vnd do lobtan die egenanten Ffrantz vnd Hainrich Meggen vor vns bi guten truwen fur sich vnd all ir erben vnd lobant och mit disem brief, der obgenanten wisen mit allen vorgedahten rehten vnd dis koffs reht wern ze sind der obgenanten Vlr. von Hofen vnd Annen Ledergerwinen siner swoster tohter vnd ir erben nah des landes reht sitt vnd gewonhait gen aller mangklichem vff gaistlichen vnd weltlichen gerihten, wenn wa vnd wie dikk si darvmb mit dem rehten von ieman vffgetriben oder angesprochen werdent, an allen iren schaden an geuerd. Vnd des alles ze offnem vnd warem vrkund haben wir obgenanten ffrow Clement vnd Peter herr ze Hewen baid vnsri aignu insigel offenlich gehenkt an disen brief. Darnach veriehent wir obgenanten Ffrantz vnd Hainrich die Meggen ain gantz warhait aller der ding, so von vns an disem brief verschriben stand, vnd ze merer sicherhait der selben ding so habent wir och baid vnsri aignen insigel offenlich gehenkt an disen brief. Der geben ist an sant Jacobs abent in dem jar, do man zalt von Cristi geburt dusent druhundert nuntzig vnd vier jar.