Wir^a) Chuno von gottes gnâden abt des gotzhus ze sant Gallen¹, das ân alles mittel zu gehort dem stul ze Rôme, tun kunt vnd veriehen offenlich mit L disem brieue allen, die in ansehent lesent oder horent lesen, daz fur vns kament ze sant Gallen in der stat in vnserm hof an der nahsten mitLwuchen vor sant Lucien tag, do wir offenlich ze geriht sâssen, diz nachgenemten erberen lut her Iohans von Wittenwiller² lutpriester ze L Altstetten³ in dem Rintal vnd Wernli von Wittenwiller⁴ sin êlicher bruder vnd offnoten vnd veriahen da mit fursprechen offenlich vor vns vnd dem geriht fur sich fur alle iro erben vnd nachkomen vnd sprachen, daz su baid mit ainberem willen mit wolbedahtem mut vnd guter vorbetrahtung vnd och von iro redlicher not wegen den wingarten gelegen ze Luchingen⁵ in dem Rintal vnd ainhalb stosset an Hugen Hofakrers iro ohaims wingarten vnd anderthalb an die lantstrasse, der von vns vnd vnserm gotzhus iro lehen war, mit reban mit rebstal mit grunt mit grat mit stok mit stain mit stegen mit wegen mit allen rehten nutzzen vnd gewonhaiten vnd mit allem dem, so darzu ald darin gehort, ez sie genemptz vngenemptz gesuchtz oder vngesuchtz wissentz oder vnwissentz, redlich vnd reht aines staten ewigen koffes verkoft vnd ze koffenn geben hettint den erbern wolbeschaidenn Johansen Eberlin vnd Herman Spanhart baid burger ze sant Gallen baiden gemainlich vnd vnuerschaidenlich vnd iren erben, ob su enwarint, vmb sechszig phunt phenning guter Costentzzer munse, dero sie gantzlich von in gewert warint vnd enphangen hettint vnd an iro offenn nutz bewendet. Vnd baten vns eruarn an ainer vrtail, wie su inen den vorgeschribenn wingarten mit allen rehten vnd zuhorden zu iren handen vertgen vnd bringen soltint, alz reht sitte vnd gewonlich war vnd daz es kraft hett vnd haben moht nv vnd och hie nach. Do fragten wir vrtail vmb vnd ward ertailt mit gemainer vrtail, daz der vorgenant her Iohans von Wittenwiller ainen vogt nemen solt an dem ring, wen er wolt, vnd daz er danne mit siner hand vnd mit des selben sines vogtes handen vnd der obgenant Wernli von Wittenwille mit siner hand den vorgeschribenn wingarten mit allen rehten vnd zugehorden an vnser hand vf geben soltint vnd vns in bitten ze lihenn den obgenanten Johansen Eberlin vnd Herman Spanhart ze lehen vnd daz es danne also wol kraft vnd maht hetti nach dem rehten. Do nam der obgenant her Iohans von Wittenwille ze vogt uber diz sache den obgenanten Hugen Hofakrer sinen ohain burger ze sant Gallen vnd gaben och do ze stett die vorgenanten her Iohans von Wittenwille mit siner hand vnd mit des ietzgenanten Hugen Hofakrers sines erkorner vogtes handen vnd der obgenant Wernli von Wittenwille mit siner hand den vorgeschribenn wingarten mit allen rehten vnd mit aller zugehorde willeklich vnd frilich gantzlich vnd gar vf an vnser hand vnd baten vns den selben wingarten ze lihenn den vorgenanten Johansen Eberlin vnd Herman Spanhart, die och do vor vns an dem geriht vnder ogen stunden, baiden gemainlich vnd vnuerschaidenlich ze lehen. Do erhorten wir iro ernstlichen bet vnd lihen den selben vorbenempten wingarten mit allen rehten vnd zugehorden vnd lihen in mit vrkund diz brieues den obgenanten Iohansen Eberlin vnd Herman Spanhart baiden gemainlich vnd vnuerschaidenlich ze lehen vns vnd allen vnseren nachkomen vnd dem selben vorbenempten vnserm gotzhus ze sant Gallen an allen vnseren rehten vnd gewonhaiten gantzlich vnschadlich. Vnd ist dis alles beschehen vnd vollefurt reht vnd redlich nach vnsers gotzhus reht vnd gewonhait mit allen den worten werken vnd getaten, so nach reht vnd nach gewonhait darzu gehortent ald horen soltent vnd notdurftig warent vnd alz es kraft vnd maht sol vnd mag han. Vnd des alles ze offem warem vrkunde aller der vorgeschribenn dinge vnd vergiht so haben wir abt Chun da vorgenant vnser insigel offenlich gehenkt an disen brief. Darnach veriehen wir die obgenanten her Iohans von Wittenwille, Hugo Hofakrer sin vogt in der vorgeschribenn sache vnd Wernli von Wittenwille ainer gantzzen warhait aller der dinge, so der erwirdig furst vnser gnadiger herre abt Chun da vorgenant von vns an disem brief veriehen hat, vnd ze merer sicherhait der selben dinge so haben wir die ietzbenempten her Iohans vnd Wernli von Wittenwille gebruder vnd Hugo Hofakrer in vogtes wise och vnseru aigenu insigel offenlich gehenkt an disen brief doch mir obgenantem Hugen Hofakrer vnd allen minen erben vnschadlich. Diz beschach vnd ward dirre brief geben ze sant Gallen an der vorgeschribenn mitwuchen in dem jar, do man von Cristus geburt zalt druzehenhundert jar, nunzig jâr vnd darnach in dem vierden jâre.