Ich^a) Dietegan von Marmles¹ ritter bekenn vnd tun kunt mit disem offenn gegenwurtigen brief allen den, die disen brief an sehent oder horent lesen, L vnd vergich offenlich fur mich vnd fur alle min erben von der zuspruchen misshellung vnd stosz wegen, so ich hab zu gemainer statt vnd den burgern ze sant L Gallen von der Cûmer wegen, die ich fur min aigen lut ansprachig han, dar vmb ich och Rudolfen Schorant burger ze sant Gallen geuangen hab, sol^b), L das ich den selben Rudolfen Schorant vff ain widerantwurten vsgelaussen hab vmb hundert vnd funf guldin gut vnd volleswar an gold vnd an gewigt vntz vff die ersten kunftigen alten vasnacht, so nû aller erste kunt nach disem tag, als diser brief geben ist, also vnd mit der beschaidenhait, das gemainu statt vnd burger ze sant Gallen vnd och ich oder min erben zwuschent dem vorges(chriben) zil vnd tag gen Veltkirch² in die statt komen vnd da gegen enander tag laisten sond. Vnd sol aber ich oder min erben ainen gemainen man vss dem rât ze Veltkirch nemen vnd dar geben, der in der sach vnd vmb alle stosz vnd misshellung ain gemainer man syg, vsgenomen vmb die angriff, so ich vnd min helfer der statt vnd den burgern ze sant Gallen getân hând, daz sol mir vnd minen erben vnd vnsern helfern kainen schaden bringen vnd sollint gemainer statt vnd den burgern ze sant Gallen dar vmb nut gebunden sin. Och sol ich den raten vnd burgern ze sant Gallen acht tagen vor hin verkunden, wenn ich mit inen tag laisten wil, vnd sond och die burger ze sant Gallen zu dem tag komen ân alle widerred. Vnd zu dem selben gemainen man sol ich oder min erben zwen erber vngeuarlich schidman vnd gemainu statt ze sant Gallen och zwen vss gemainem rât ze Veltkirch setzen vnd dar geben, vnd sond den selben funf erbern mannen baidenthalb vnser red vnd widerred furlegen vnd erzellen. Mugent denn die funf erber mann der gemain vnd die vier schidlut, die wir ze baiden tailen dar geben vnd gesetzt habent, als vorges(chriben) stât, vns mit enander vber ain bringen vnd verrichten mit der minn, daz ist wol vnd gut. Mugent aber sy das nit getun, so sond die selben erbern lut ain bloss recht dar vmb sprechen, vnd wes sich denn die selben funf gemainlich oder der mertail vnder inen erkennent ze dem rechten, das sond wir baidenthalb wâr vnd stat haben. Och ist mer berett, war das ich oder min erben zwuschent dem vorges(chriben) zil vnd tag nit ze tagen mocht komen, als vorges(chriben) ist, alle die wil denn ich oder min erben gemainer statt vnd burgern ze sant Gallen ainen andren gerennden tag nit verkundent, so sol du sach also gen manlichem in gutem stân, vnd sol der obges(chriben) Rudolf Schorant vnd och gemainu statt vnd burger ze sant Gallen von mir vnd minen erben vnd helfern vnd och ich vnd alle min erben vnd helfer gen gemainer statt vnd burgern ze sant Gallen vnd gen iren helfern geruwet sin vnd beliben. Vnd wenn ich oder min erben denn dar nach gegen gemainer statt vnd burgern ze sant Gallen oder gen den, die ich ansprachig hân, tag laisten wil, das sol ich obges(chribner) Dietegan von Marmles ritter oder min erben gemainer statt ze sant Gallen aber acht tagen vor hin kunt tun, vnd sol doch der satz vnd du sach allwegent vff den funf erbern mannen, die wir baidenthalb darzu geben werdent vnd als wir ietz vber ain komen sind, beliben vnd dar ab nit komen ân alle widerred. War aber, dz gemainu statt vnd burger ze sant Gallen zu dem tag nit kamint, als ich oder min erben inen verkundent, vnd daz sy des tags mutwilleklich abgiengint vnd sich das erfundi mit der warhait, nach den selben acht tagen, als sy denn gemant sind, in den ersten acht tagen sol sich der obges(chriben) Rudolf Schorant by geswornem ayd wider antwurten in min vnd miner erben gevangnuss vnd gewalt vnd geuangen legen in die band, da er vor mals inn gelegen ist. Tate er des nit, so ist mir vnd minen erben gemainu statt vnd burger ze sant Gallen die vorges(chriben) hundert vnd funf guldin an gold verfallen ze geben vnd vszerichten ân alle widerred, doch allen minen rechten vnd zusprechen vnschadlich, ân alle widerred vnd irrung. Des alles ze ainem waren staten vrkund vnd gantzer sicherhait so hân ich obgeschribner Dietegan von Marmles ritter min aigenn insigel fur mich vnd fur min erben offenlich gehenkt an disen brief. Der geben ist ze Cûr an sant Johans tag des zwelfbotten vnd ewangelisten in den wihennachten^c) in dem jar, do man zalt von der geburt Cristi druzehenhundert vnd nuntzig jar vnd dar nach in dem vierden jare.