Ich^a) Vlrich der Burgower¹ kilchenhêrr der kilchen ze Gôssow² tun kund vnd ze wissent allermenglichem mit disem brief, das ich die nachgenampten erbern lute bruder Cuntzlin Schnetzzer ze den ziten L maister vnd sin mitbruder sant Othmars spittâls ze sant Gallen³ sant Benedicten ordens vnd herr Vlrichen vnd Johansen die Straiffen von Birbomli⁴ gebruder burger ze sant Gallen liepLlich fruntlich vnd ainbarklich mit iro baider tailn willen vnd gunst vmb alle die stoss zuspruch vnd ansprachen, so su mit ainander vnd gegen ainand vntz her vff disen huttigen tag, als dirre brief L ist geben, von dehainerlay sach ie gehept vnd getriben hand, vnd besunder von des zehenden wegen ze Birbomli, der den egenanten bruder Cuntzlin vnd andren, die vor im maister gewesen sind, vnd den brudern des vorgedahten spittales gieng vnd aller jarlich ward vnd werden solt ab vnd vsser der vorgeschribnen herr Vlrichs vnd Johansen der Straiffen gut ze Birbomli gelegen, das da ainhalb stôsset an die muli vnd an die guter an dem Aigen Buch⁵ vnd anderthalb an das gut, das man nemmet das Juch⁶, das da der Linsibuler⁷ ist, das Claus Ffritpolt buwt, vnd ze der dritten siten och an Linsibuler akker, der da von dem Linsibul oberthalb dem Bilde⁸ vshin lît, vnd ze der vierden sîten an die lantstrâss, die von der statt sant Gallen gen Tablat⁹ gât, verrihtet verainbart vnd in ain braht hân, mit solicher beschaidenhait vnd in dem rehten, das die egedahten hêrr Vlrich vnd Johans die Straiffen vnd iro erben vnd die, in dero hand vnd gewalt das vorgeschriben gut ze Birbomli iemer me kumpt ald ist, des obgenamten spittales maistern vnd brudern vnd allen iro nachkomen nu hinnenhin aller jarlich vnd iemer ewklich dru viertel vesan vnd dru viertel habern gutes vnd genames kornes sant Galler messes an alle minrung vnd ân alle geuerd ie ze sant Martins tag gen sant Gallen in die statt vnd in den vorgenanten spittâl ân allen der obgenamten sant Othmars spittales maister vnd bruder vnd iro nachkomen schaden antwurten geben vnd rihten sond ffur aller korn vnd andrer gewahst vnd fruhte zehenden nihts vsgenomen, so vff demselben gut ze Birbomli wachset oder wirt, vnd sond och des vorgedahten spittales maister vnd bruder vnd iro nachkomen desselben zehenden da mit vsgeriht vnd gar vnd gantzlich gewert sin vnd ain benugen dâr an han, alsô vnd mit solicher beschaidenhait, das su kain vordrung noch ansprach zu dem genamten gut von dehainerlay zehenden noch andren sachen wegen nit me noch furbas hand noch haben sond. Welhes jares aber die vorgenanten herr Vlrich vnd Johans die Straiffen ald iro erben vnd die, in dero hand dasselbe gut ze Birbomli iemer kumpt, das obgeschriben jarlich korngelt nit gabint vnd gantzlich vnd gar werotind ze dem tag vnd an den stetten, als vor geschriben stât, so hand des obgedahten spittales maister bruder nachkomen vnd helffer, wer die sind, nach demselben sant Martins tag vber die nahsten aht tag nach der ersten vordrung, wenne su wellent ald inen fuklich ist, ffrijes vrlob vnd vollen gewalt, vff dem vorgeschribnen gut ze Birbomli vmb das egenamt korngelt ze pfendenn vnd ze notenn mit dem rehten ald ân reht, wie si wellent oder mugent oder inen aller komlichost ist ze tunn, als vil als lang vnd als dik, vntz das su ie damit derselben drijer viertel vesan vnd drijer viertel haber jarliches zinses gar vnd gantzlich gewert bezalt vnd vsgeriht werdent vnd och des schadens, in den su ald iro nachkomen vnd helffer, wer die sind, von desselben pfendens notens vnd angriffens wegen komen sind. Beschah och oder fugti sich iemer, das des obgenamten spittales maister vnd bruder ald iro nachkomen das vorgeschriben gut ze Birbomli vmb iht anders me oder furbas ansprachint oder bekumbertint denn vmb die vorgeschribnen dru viertel vesan vnd dru viertel haber jarliches zinses, wie des die egenamten herr Vlrich vnd Johans die Straiffen ald iro erben ald die, in dero hand dasselbe gut ze Birbomli ie danne ist, ze schaden koment, vmb denselben schaden sond su danne das vorgenamt korngelt innehaben vnd selber niessen, als lang vnd als vil, vntz das su ie desselben schadens entladen vnd entrihen werdent. Beschah och oder fugti sich dehainest, das die obgenanten herr Vlrich vnd Johans die Straiffen dehaini guter ze Buch ald anderswa daselbs vnd da vmb bi Birbomli gelegen kofftint ald in dehain wîs zu iro handen zugint, die des obgenamten spittales maistern vnd brudern zehendhaft sind, von denselben gutern sond su inen den zehenden geben vnd rihten in allen den rehten vnd gewonhaiten, als in die gerihtet vnd geben hand, dero dieselben guter vormals gewesen sind. Vnd ze vrkund der warhait aller vorgeschribner ding henk ich obgenamter Vlrich Burgower kilchherr ze Gôssow min insigel von des vsspruchs wegen offenlich an disen brief doch mir vnd allen minen erben gantzlich vnschadlich. Darnach veriehen wir vorgenamten bruder Cuntzli Schnetzer vnd die bruder alle des vorgedahten spittales fur vns vnd alle vnser nachkomen ainer gantzen warhait aller der ding, so der erwirdig vnser lieber herr hêrr Vlrich der Burgower kilchherr da vorgenant von vns veriehen hât an disem brief, vnd ze mêrer sicherhait derselben ding so siyen wir komen fur den hohwirdigen ffursten abt Cunen abt des gotzhus ze sant Gallen¹⁰ vnsern genadigen herren, vnder des gehorsami wir gehorent vnd och siyent, vnd haben den mit fflissiger vnd ernstlicher bette gebetten, das er sin insigel hier vmb fur sich vnd fur das obgenamt sin gotzhus ze sant Gallen vnd alle sin nachkomen vnd och fur vns vnd den egenanten spittâl vnd fur alle vnser nachkomen gehenkt hât an disen brief. Darnach veriehen wir vorgenanten herr Vlrich vnd Johans die Straiffen von Birbomli gebruder och ainer gantzer warhait des vorgeschribnen vsspruchs vnd aller vorgedahter ding, so von vns geschriben stand an disem brief, vnd ze mêrer sicherhait derselben ding hât vnser ietwedrer sin aigen insigel fur vns vnd fur alle vnser erben vnd nachkomen offenlich gehenkt an disen brief, vnd haben och dar zu erbetten die wisen vnd wolbeschaiden manne Nicolausen Rupreht stattamman¹¹, Bilgrin Gmunder vnd Hugen Ruprehtt burger ze sant Gallen, das su ze noch merer sicherhait vnd gezuknust aller der ding, so von vns geschriben stand an disem brief, ieklicher sin aigen insigel zu den vnsern gehenkt hand an disen brief, des och wir ietzgenampten Nicolaus Rupreht, Bilgri Gmunder vnd Hug Rupreht offenlich veriehen doch vns vnd allen vnsern erben vnschadlich. Dis beschah vnd ward dirre brief geben ze sant Gallen in der statt an sant Gregorijen abent des hailigen bâpstes in dem jar, do man zalt von gottes geburt druzehenhundert jar, nunzig jar vnd darnach in dem ffunfften jare.