Wir^a) Cuno von gottes gnaden abt des gotzhus ze sant Gallen, daz ân alles mittel zugehort dem stul ze Rom, L sant Benedicten ordens in Costenzer bistum tun kund vnd veriehen offenlich mit disem brief allen den, die in sehent L lesent oder horent lesen, daz fur vns kam ze sant Gallen in der stat, do wir offenlich ze geriht sâssen, vff disen L huttigen tag, als dirre brief ist geben, Heinrich der Blarrer Albrehtz Blarrers des eltern burgers ze Costentz elicher sun mit vollem gewalt an statt vnd in namen des ietzgenampten sines vatters vnd offnot vor vns mit sinem fursprechen, als wir Cristoffeln Mayer von Altstetten vff die nahsten mitwuchen nach sant Gregorien tag des hailigen bapstes ze dem dritten mal fur vns verkunt hettin ze komen zu dem rehten von sines vatters wegen vmb den zehenden an dem Kornberg in dem Rintal gelegen, der von vns vnd vnserm gotzhus ze sant Gallen lehen war, also stund vnd wartoti er och vor vns an statt vnd in namen des vorgeschribnen sines vatters des egenampten Cristoffeln Mayers vnd batt vns mit sinem fursprechen an ainer vrtail ze eruarent, was sines rehten wari. Daz taten wir vnd ward ertailt mit gemainer vrtail, das er wartoti, alle die wil vnd wir ze geriht sassin, vnd kami denn derselb Cristoffel Mayer nit ald aber sin gewissi bottschaft mit vollem gewalt an siner statt, die wil vnd wir sassin, dz denn der obgenampt Albreht Blarrer sin sach von desselben zehenden wegen an dem Kornberg behebt solt han. Darnach batt vns aber der vorgenamt Hainrich Blarrer an ainer vrtail ze eruaren, sid dem vorgenampten sinem vatter der korn zehent ab vnd vsser den gutern, die zu denselben gutern am Kornberg gehorent, bis her vff disen huttigen tag, als dirre brief geben ist, ruwklich wurd vnd worden wari, ob im den der win vnd ander gewahst zehent, so vff denselben guter wachset, iht och als billich werden solti, ob reben vff dieselben guter, die im vormals zehenden geben hand vnd noch geben sond, gelait ald gesetzt warint ald noch dar uf gelait ald gesetzt wurdint. Darum fragen wir vnd ward mit gesamnoter vrtail ertailt, wo vnd an welhen stetten vff den selben gutern am Kornberg, die im zehenden gend vnd geben hand, da pflug vnd segess vff gangen vnd gefurt war, der korn zehend im geben vnd geriht ist, daz im och vff den selben gutern billich werden solli der win vnd aller gewahst zehend, so dar uff wachset oder wirt. Der vrtail vnd aller vorgeschribner ding batt vns im der egenamt Hainrich Blarrer an statt vnd in namen des vorgenampten sines vatters des gerihtes brief hierumb ze gebent, den wir im och mit vrtail von des gerehtes^b) wegen ze offemm waren vrkund aller vorgeschribner ding vnder vnserm insigel gegeben haben. Dis beschah vnd ward dirre brief geben ze sant Gallen in der statt vor offenem geriht an der nahsten mittwuchen nach sant Gregorien tag des hailigen bapstes des jares, do man zalt von gottes geburt tusent druhundert nuntzig vnd funff jare.