Ich^a) Margret Schmidin Hainrich des Surigen¹ saligen elichiv witwe burgerin ze Rauenspurg² vergich offenlich fur mich vnd L fur miniv kind vnd fur alle vnser erben mit disem brieue vnd tun kunt aller manglich, daz ich mit gutem willen vnd mit L wolbedauchtem sinne vnd mut mit willen vnd gunst min vnd der obgenanten miner kind vogtz Clausen Smids, den man nempt L Schindellin, mins bruders, den wir in der sach vor dem burgermaister vnd dem râte hie ze Rauenspurg zu ainem vogt genomen vnd erwellet haben, dem erbern wolbeschaidnen Haintzen dem Maiger von Mowwyler³ vnd allen sinen erben mit disem brief ietzo recht vnd redlich zu ainem staten vnd ewigen erblehen gelihen vnd verlihen han minen vnd der obgenanten miner kind maigerhof ze Mowwyler gelegen mit holtz mit veld mit akkern mit wisen mit wasen mit zwy mit steg mit weg vnd gemainlich mit aller ander zugehorde ob erd vnd vnder erde fur ledig vnd fur vnuerkumbert vnd also, daz der obgnant Haintz Maiger vnd alle sin erben den obgenanten hof ze Mowwyler, den man nempt den maigerhof, mit aller zugehord nu furbas mer eweklich vnd geruwklich ynne haben buwen vnd niessen sullen, vnd ob daz ware, daz in vff dem selben gut holtzes zerronn vnd daran gebresten gewunnen, so sont vnd mugent si in dem wald ze Mowwyler holtz howen vnd nemen, waz si vff daz gut bedurffent zem pflug vnd zem buw ald zem zinber nach notdurfft, ane alle geuerde ane min vnd der obgenanten kind vnd vnser erben vnd och allermanglichs irrung vnd widerred, vnd ouch aber also beschaidenlich, daz mir vnd minen kinden vnd vnsern erben der obgenant Haintz Maiger vnd sin erben vnd nachkomen nu hinnanhin ewklich vnd aller jarklich vnd och ie des iars allain vnd besunder vff sant Martins tag von dem selben waltlehen ze rechtem zins tugentlich richten vnd geben sullen ain pfunt vnd ainen schilling pfennig Costentzer muns ain malter haber Wanger⁴ mess vnd zwai hunr ane furzog vnd widerrede vnd gar vnd gantzlich ane allen vnsern schaden nach waltlehen recht vnd gewonhait ane alle geuerde. Ich han ouch dem obgenanten Haintzen dem Maiger vnd sinen erben daz egnant waltlehen gelihen mit den rechten, daz si daz nu hinnanthin in redlichem vngeuarlichem buw vnd in guten eren vngeuarlichen haben sullen vnd weder dauon noch von dem obgenanten wald ze Mowwyler dehainerlai holtz verkouffen noch hin geben sullen in kainen weg. Sy sont ouch daz obgnant waltlehen gen niemant weder versetzen noch verkouffen in kainen weg, ez sig denn, daz si daz tugen mit vnserm guten willen vnd gunst, doch so mugent si vnd ist in behalten, daz si iriv recht, die si an dem selben waltlehen hand, sament vnd mitainander wol verkouffen mugent, gen wem si went, ane vnser vnd vnser erben irrung vnd widerred. War aber, daz si der obgenanten artikel sunsz dehainen vberfuren oder vns den obgenanten zins alliv iar dauon nit engaben vnd vns den wider vnserm willen verzugen, so ist vns daz obgenant waltlehen mit aller zugehord wider geuallen vnd veruallen ane sin vnd siner erben vnd nachkomen vnd och aller manglichs irrung widerred vnd ansprach, vnd darumb so han ich von dem selben Haintzen Maiger in erschatz wise vnd och vmb daz, daz ich im an dem obgenanten zins etwas gemindert han, alz der vor darab gieng, vnd nu bi dem zins, als der hieuor ist beschaiden, beliben sol, jetzo also bar in genomen vnd empfangen acht pfunt pfennig guter vnd gaber Costentzer muns, die alle zu minem vnd der obgenanten miner kind gutem nutz vnd fromen komen und bewent sint. Vnd des alles ze warem vnd offem vrkund vnd stater sicherhait so han ich mich obgenantiv Margret Schmidin gebunden vnder des obgenanten mins bruders vnd vogtz Clausen Schmids vnd darzu vnder Hanggin Huntppis⁵ burgermaisters ze Rauenspurg insigel, die si von miner bett ane schaden in selb fur mich vnd div obgenanten minv kind vnd fur vnser erben offenlich gehenkt hand an disen brieff, des ouch wir die selben Claus Schmid genant Schindelli vogt vnd Hanggin Huntppis burgermaister bekennen getan, doch vns selb ane schaden. Geben ze mitteruasten, do man zalt nach Cristi geburt drivzehenhundert vnd in dem funff vnd nuntzigosten iar.