Wir^a) der amman vnd gemainer rat der statt ze Veltkilch¹ veriehent vnd tund kund mit disem L offenn brief allen den, die in ansehent oder horent lesen, von aller der stoss vnd misshellung L wegen, so die erbern wysen vnd fursichtigen der burgermaister der rat vnd die burger L gemainlich ze sant Gallen von iro gemainen statt wegen ze ainem tail vnd vnser mitburger Claus Schonogli von Bludentz² ze dem andern tail mitenander vntzher geheppt hand von der zuspruch vechschafft vnd anfall wegen, so der selb Claus Schonogli zu der gemainen statt ze sant Gallen hatt vmb den schaden, den er vor ziten enpfangen hat von der niderlegung vnd verhafftung wegen, als im Jakli Schirmer iro mitburger ze den selben ziten ze sant Gallen sinu ross niderlait vnd verbôt, sol manglichem ze wissent sin, das su baid tail sich von der selben iro stoss vnd misshellung wegen mit rechten tadingen willeklich fur vns vertaget hand vnd och der sach gantzlich vff vns zem rechten komen sint an dem tag, als diser brief geben ist, also vnd mit solicher gedingd vnd beschaidenhait, wes wir vns nach iro baidertail furlegung clag ansprach red vnd widerred zem rechten erkantint vnd och darvmb zwuschent inen vssprachint, das su das ze baider syt fest stat vnd vnuerkert halten vnd haben woltint mit guten truwen an all gevard. Vnd also habint wir vns der sach von iro wegen zem rechten angenomen vnd vns nâch iro baidertail furlegung clag ansprach red vnd widerred erkent vnd mit gemainem vnserm rat ainhelleklich vnd vnzerworffenlich darvmb vssgesprochen, das der vorgenant vnser burger Claus Schonogli vnd all sin frund vnd helffer die gemainen statt ze sant Gallen von der selben siner sach zuspruch vnd schaden wegen furbas gantzlich vngevecht vnbekumbert vnd vngeschadget lassen sont an iro lib vnd an iro gut, es war denn, das im jemant, der des do gewalt geheppt hett, von gemainer statt wegen vmb den schaden ald fur den schaden versprochen hett, ald ob es ainer zwen oder dryg iro burger sunderbar getan hettint, ald war, das er den oder die nit vngerechtfertget lassen wolti, die in ze sant Gallen des ersten verhafftent vnd im das sin darnâch verkofftent, si sigint ir burger ald ir hindersassen, zu denen allen vnd zu iro iegklichem sunderlich, die schuld daran hand ald im ichtz darvmb verhaissen oder versprochen hand, als ietz hie vor ist beschaiden, sont im sinu recht nv hinnenhin erloubt sin ze suchent mit dem rechten. Vnd des ze vrkunde ainer warhait hab ich Hainrich Bachli ze disen ziten stattamman ze Veltkilch³ von gemains ratz enpfelhens vnd haissens wegen min insigel doch vns allen vnschadlichen gehenkt an disen brief, won die vorgenanten baidtail des ernstlich von vns begertent, das man inen der tading vnd des vsspruchs zwen gelich brief mit minem insigel besigelt gab. Das geschach vnd ward och dirr brief also ze Veltkilch geben an dem donstag in der osterwochen des jares, do man zalt von Crists geburt druzehenhundert vnd im funfften vnd nuntzgosten jar.