Ich^a) Margareta du Truchsaszin von Diessenhouen¹ her Brun(en) saligen von Hertenstain² elichu witwe vnd ich Hainrich von Hertenstain³ ir sun verkundent vnd vergenhent offenlich mit disem brief vnd tugent kunt aller menglich, L daz wir baidu fur vns vnd fur vnser erben mit wolbedâhtem sinne vnd mut vnd mit solichen worten werken raten vnd getaten vnd ze den ziten vnd an den stetten, als ain ieglich kôff billich nach reht vnd nach gewonLhait wol kraft vnd maht hât haben sol vnd mag ietz vnd hie nach an allen stetten vnd vor allen luten vnd gerihten gaistlichen vnd weltlichen vnd ôch mit rât haissent gunst vnd gutem willen Wernhers von Hertenstain⁴ min des obgenanten L Hainrichs von Hertenstain bruder aines rehten redlichen staten vnd ewigen kôfs ze kôffent gêben habent mit kraft diss briefs fur rehtu ledigu vnverkummertu vnirrigu vnd vnansprachigu guter der wolbeschaidenn frowen vnser lieber mumen Nesen von Bernhusen Hannsen von Bernhusen⁵ elicher wirtenn von Hornstain⁶ geborn vnd iren erben disu hie nachgeschriben vnsru ligendu guter, du allu ze Rutlingen⁷ dem dorf gelegen sint, vnd sint diss du guter, des ersten vnsern hof, da nun ze mâl Haintz Ratich vff sitzet vnd in buwet vnd ist in allen eschen acht vnd funfzig iuchart akers vnd suben mansmad wisan vnd der hof ist aigen, item vnsern hof, den nun ze mâl Vtz der Haller da selbs buwet vnd hât in allen eschen achzehen iuchart akers vnd vier mansmad wisan vnd ist ôch aigen, item vnser gut da selbs gelegen, da nun ze mâl der obgenant Vtz der Haller vff sitzet vnd es ôch buwet vnd daz wilent Waltz von Husen⁸ buwet vnd hât in allen eschen ôch achzehen juchart akers vnd dru mansmad wisan vnd ist lehen von ainem abt von sant Gallen, item vnd daz gut, daz wilent der Spath gebuwen hât vnd dar nach du Ôstainin gebuwen hât vnd hât in allen eschen sechs iuchart akers vnd zway mansmad wisan vnd ist ôch lehen von ainem abt von sant Gallen, vnd du selben vorbenempten zway lehen sol man ôch lihen der frowen als dem man, vnd habent ir vnd iren erben du obgeschriben guter vnd hof aigen vnd lehen vnd dar zu alles das, was wir iendert vff disen hutigen tag, als dirr brief gêben ist, ze Rutlingen dem dorf ligender guter gehebt habent, in der obgeschriben wise ze kôffent gêben mit allem dem, was iendert gemainlich oder besunder nach reht vnd nach gewonhait dar zu vnd dar in gehoret vnd gehoren sol nach dem vnd her Brun von Hertenstain ritter daz alles denn bis an sinen tôd vnd wir bis hêr ingehebt hêrbrâht vnd genossen habent, es sy an luten vnd guten vnd besunder den vorgenanten Vtzen den Haller fur aigen vnd es sy ôch an husern an hofraitinen an schuren an garten an akern an wisan an zwingen an bannen an vogtyan an vogtrehten an diensten an zenhenden an stêgen an wêgen an wasen an zwy an waiden an witraitinen an gemainmerken an holtz an holtzmarken an wunn an veld an wasser an wasserlaitinen mit besetzent vnd mit ze entsetzent an hallergelt an korngelt an lantgarben an allen nutzen vnd gelten an gebuwem an vngebuwem ob erd vnd vnder erd nutzit uber al darawssgesetzt befundens vnd vnbefundens besuchtz vnd vnbesuchtz vnd es sy benempt oder vnbenempt vmb vierthalb hundert pfunt Ytaliger genger guter vnd gaber haller, die su vns dar vmb ôch in aines rehten kôfs wise also bar gêben vnd bezalt hât vnd die ôch dar vmb in vnsern vnd in vnsrer erben offenn vnd redlichen nutz komen vnd bewendet sint, vnd sullent ôch wir du obgenanten lehen zu iren handen bringen von dem lehen herren nach solicher lehen reht in dem nahsten mânod nach datum diss brief vngeuarlich an alles verziehen vnd sol du egenant Nesa von Bernhusen vnser mum von Hornstain geborn vnd ire erben die obgeschriben hof vnd guter aigen vnd lehen lut vnd gut mit allen zugehorden, als vor beschaiden ist, die su alle erkôft hât, vmb ir rehten morgengâb nun furo mer hie nach allweg geruwenklich inne haben vnd niessen besetzen vnd entsetzen nach irem nutz als ander ir aigen gut an vnser an vnser erben vnd an aller menglichs irrung sumsely vnd ansprâch, wan wir vns fur vns vnd fur vnser erben gen ir vnd gen iren erben der obgeschriben hof lut vnd guter vnd aller ir zugehord gentzlich verzigen haben vnd verzihent vns ôch also gen ir vnd gen iren erben mit disem brief aller reht aller vordrung aller brief aller ansprâch vnd aller der ding, wie du genant vnd geschaffen sint, dar vmb oder da mit wir oder vnser erben oder iemant von vnsern wêgen zu dehainen vorgeschriben dingen zu ainem stuk oder zu mer zu lutzel oder zu vil dehain reht oder ansprâch hettent oder ymmer mer wider disen obgeschriben kôff oder wider dehain vorgeschriben ding gehan mohtent gemainlich oder besunder oder da mit man disen vorgeschriben kôff widertriben oder geirren moht in dehain wise an all geuard. Wurd ôch hie nach dehain brief funden oder utzit mit worten oder mit werken dehainest wider disen obgeschriben kôff oder wider dehain ding, was an disem brief geschriben stât, an dehainen stetten fur gezogen, daz alles sol doch dehain kraft noch maht nit haben an dehainen stetten^b) noch vor dehainen luten noch gerihten gaistlichen noch weltlichen in dehain wise an all geuard. Wurd ôch ir oder iren erben an dehainen vorgeschriben dingen an luten oder an guten oder an dehainen iren zu gehorden dehainest lutzel oder vil utzit irrig oder ansprachig, dar vmb sol su oder ir erben tag machen vnd vns oder vnsern erben den tag beschaiden, vnd sullent wir vnd vnser erben ir vnd iren erben daz da denn vssrihten vertgen versprêchen vnd verstan mit dem rehten vnd gentzlich vnirrig vnd vnansprachig machen daz aigen nach aigens reht vnd lehen nach lehens reht vnd sy baidu nach lands reht vnd nach reht an allen iren vnd ir erben schaden, vnd sient ôch also wir vnd vnser erben dar vff ir vnd ir erben rehten gewêrn an all geuard. Vnd ze ainer merrer sicherhait aller vorgeschriben ding so haben wir die obgenanten Margareta du Truchsassin vnd Hainrich von Hertenstain ir sun wir baidu zu vns vnd zu vnsern erben der vorgenanten Nesen von Bernhusen vnsrer mumen von Hornstain geborn vnd iren erben ze burgen gesetzt diss fromen vesten herr Hannsen von Hornstain von Wulflingen⁹, her Ludwigen von Hornstain ze Nufren¹⁰ gesessen, her Berhtolten von Stain¹¹ von Marhtal¹² all ritter, Hannsen von Stadgen¹³ vnd Wolflin vom Stain von Klingenstain¹⁴ sy alle funf mit ain ander vnuerschaidenlich vnd mit der gedingt, war daz wir oder vnser erben ir oder iren erben allu vorgeschribenn ding, war an su oder ir erben denn bruch oder gebresten hettent, nit versprachent verstundent vssrihtent oder vollefurent in aller der wise, so da vor an disem brief geschriben stât, so hât su oder ir erben dar nach, wenn sy wend, gewalt vnd gut reht, die vorgenanten burgen dar vmb ze manent ze hus ze hof oder vnder ôgen mit iren brieuen botten oder selber sy all gemainlich oder als menigen sy denn vnder inen weltent besunder, vnd die selben genanten burgen sullent denn darnach in aht tagen den nahsten nach der manung dar vmb in uaren gen Rudlingen¹⁵ oder gen Mengen¹⁶ in der zwaiger stett ain, in wely ir ieglicher der selben gemanten burgen denn ie aller gernost wil, vnd sullent da denn laisten ain recht gewonlich vnd vngeuârlich giselschaft in erbrer vnd offner gastgêben wirtes husern ze vailem kôff vnbedingt ir ieglicher mit sin selbs lib vnd mit ainem pfarit oder ainem erbern kneht ôch mit ainem pfarit in den selben rehten an sin stat in die laistung legen, weler selber nit welt oder enmoht laisten, vnd sullent denn also an die selben gemanten burgen oder iro verwêser an iro stat mit den pfariden laisten vnd vsser der selben laistung nit komen noch da von nymmer ledig werden denn mit der egenanten Nesen von Bernhusen vnsrer mumen oder mit ir erben vrlob gunst vnd gutem willen oder e daz wir oder vnser erben ir oder iren erben vor alles daz habent getan vssgeriht vnd vollefurt, dar an sy denn bruch oder gebrêsten hettent nach dem vnd vorgeschriben stât vnd dar vmb die burgen vor gemant warent worden ze laistent in aller vorgeschribner wise vnd rehten an allen iren schaden. Ist dik ôch da vor, e daz du obgeschriben vertgung sich ergangen hett, der egenanten burgen ainer oder mer abgieng von tôdes wêgen oder wâ von daz war furent vom land oder wie sy sus vngeuârlich vnnutz ze burgen wurdent, als dik sullent wir vnd vnser erben ir vnd iren erben ie ainen andern oder ander als gut nêmlich vnd schidlich burgen wider setzen in den nahsten vierzehen tagen nach ir manung. Geschach des nit, so sullent inen die andern bestandenn burgen, wely von in dar vmb gemant wurdent, dar vmb ôch in uaren vnd laisten in allen vorgeschriben rehten, als lang vnz es ie beschiht. War aber, daz der vorgenanten gemanten burgen iro dehainer ainer oder mer dehain der vorgeschriben laistung dehainest wider irem willen verzugent, also daz sy ie nit laistent in der wise, als vorgeschriben stât, als dik daz ie beschach, so hând denn ie darnach die obgenant Nesa von Bernhusen ir erben vnd all ir helffer gemainlich oder besunder, wenn sy wend, gewalt vnd reht, vns die obgenanten Margareten die Truchsassinen vnd Hainrichen von Hertenstain ir sun vnser erben vnd die vorgenanten gemanten vnlaistenden burgen vnuerschaidenlich dar vmb an vnsern luten vnd guten an ze griffent ze notent vnd ze pfendent in stetten in dorffern vnd vff dem land mit geriht vnd mit tag oder ob sy wend an geriht an clag an râch vnd an allen zorn, wa wenn vnd wie sy kunnent vnd mugent, als dik vnd genug, vntz ir vnd iren erben da mit alles daz wirt vollefurt vnd vsgeriht, dar an su denn oder ir erben bruch oder gebrêsten hettent, nach dem vnd an disem brief geschriben stât, gantzlich vnd gar an allen iren vnd ir erben schaden, vnd sullent ôch noch mugent da mit wider nieman noch wider nutzit nit frafeln noch tun, noch sol inen noch iren helffern an dehainen dingen, was an disem brief geschriben stât, dehainen schaden nit bringen noch bêren weder âcht bann krieg gewaltsamy noch dehain lantfrid lantgriht lantreht stettreht gelait frihait verpuntnust gesellschaft gebott reht noch gnâd der fursten gaistlicher noch weltlicher der herren der stett noch des lands noch dehain lut noch geriht gaistlich noch weltlich noch nieman noch nutzit, daz ieman da wider vss geziehen oder erdenken kan oder mag in dehain wise. Vnd wir vnd vnser erben sullent ôch die obgenanten burgen hie von losen an allen iren vnd ir erben schaden. Brach ôch der insigel vngeuârlich ains oder mer, du an disem brief warent oder du an disen brief gehorent wurdent, missehenkt missekert oder ir etlichs an disen brief nit wurd gehenkt oder ob dirr brief ietz vngeuârlich an dehainem wort sillaben oder buchstâben misseschriben war oder in weler wise dirr brief hie nach vngeuârlich verschwecht oder arkwenig wurd an den insigeln oder an andern dingen, das alles sol der obgenanten Nesen von Bernhusen iren erben iro helffern noch disem brief dehain schad nit sin an alle geuard. Vnd wan Vlrich von Hertenstain min des vorgenanten Hainrichs von Hertenstain bruder noch nit ze sinen tagen komen ist, da von so versprêchen wir die obgenanten Margaret du Truchsassin sin muter vnd Hainrich von Hertenstain sin bruder vnuerschaidenlich vnd vnser erben des fur den selben Vlrichen von Hertenstain vnd fur sin erben, daz er noch sin erben wider dehain vorgeschriben ding nymmer mer getun sullent vnd daz sy ôch dehain reht noch ansprâch zu dehainen obgeschriben luten noch gutern nit mer sullent haben noch gewinnen in dehain wise, vnd wenn er zu sinen tag kump vnd wir denn gemainlich oder besunder dar vmb gemant wurdent, daz wir in dar zu ôch denn halten sullent, daz er ir vnd iren erben des ôch ainen guten brief gêb mit sinem aigenn insigel vnd mit zwayger byderber mann aignen angehenkten insigeln, daz allu vorgeschriben ding sin guter will vnd gunst sient vnd daz ôch er noch sin erben da wider nymmer getugent noch dehain reht uber al dar zu nit habent in dehain wise an all geuard, vnd wâ das nit geschach, daz sy die obgenanten burgen dar vmb denn ôch manen mugent vnd dar vmb ôch an griffen mugent in allen den rehten als vmb die andern obgeschriben sachen an all geuard. Vnd ze ainem wâren vrkund aller vorgeschriben ding so haben wir die obgenanten Margareta du Truchsassin von Diessenhouen vnd Hainrich von Hertenstain ir sun wir baidu fur vns vnd fur vnser erben vnsru aignu insigel offenlich gehenkt an disen brief. Dar zu vergich ôch ich der obgenant Wernher von Hertenstain, daz der obgeschriben kôff vnd allu vorgeschriben ding beschenhen sint mit minem rât vnd gutem willen vnd daz ôch ich noch min erben zu dehainen obgeschriben luten noch guten dehain reht noch ansprâch nit sullent haben noch nymmer mer gewinnen wider die egenant Nesen von Bernhusen min mumen noch wider ir erben noch wider nutzit, was da vor an disem brief geschriben stât, nymmer nutz angeuahen noch tun sullent in dehainn wêg an all geuard. Vnd des ôch ze ainem waren vrkund so hân ich der selb Wernher von Hertenstain fur mich vnd fur min erben min aigen insigel ôch offenlich gehenkt an disen brief. Vnd wir die obgenanten burgen vergenhent vnuerschaidenlich dirr obgeschriben burgschaft vnd aller der ding, was da vor von vns an disem brief geschriben stât, vnd des ôch alles ze ainem wâren vrkund vnd merrer sicherhait so haben wir all funf vnsru aignu insigel ôch offenlich gehenkt an disen brief. Der gêben ist an sant Margareten tag in dem jâr, do man zalt von Crists geburt druzehen hundert jâr vnd dar nach in dem funf vnd nuntzigostem jâr.